வாடிக்கையாளர்களைக் காந்தமாய் ஈர்க்கும் வித்தை: மார்க்கெட்டிங் vs பிராண்டிங்!

மார்க்கெட்டிங் (Marketing) மற்றும் பிராண்டிங் (Branding) ஆகிய இரண்டும் ஒரு வணிகத்தின் வளர்ச்சிக்கு மிகவும் முக்கியமானவை. இவை இரண்டும் ஒன்றுடன் ஒன்று தொடர்புடையவை என்றாலும், அவற்றுக்கு இடையே தெளிவான வேறுபாடுகள் உள்ளன.

பிராண்டிங் என்பது வணிகத்தின் அடையாளம் மற்றும் மதிப்புகளை உருவாக்குவதாகும். இது வாடிக்கை யாளர்களுடன் நீண்டகால உணர்வுபூர்வமான உறவை ஏற்படுத்த உதவுகிறது. மார்க்கெட்டிங் என்பது தயாரிப்புகளை விளம்பரப்படுத்தி விற்பனையை அதிகரிக்கும் குறுகிய கால உத்தியாகும். சுருக்கமாக கூறுவதென்றால் பிராண்டிங் என்பது பிசினஸின் அடித்தளம். மார்க்கெட்டிங் என்பது அந்த அடித்தளத்தை மக்களிடம் கொண்டு சேர்க்கும் கருவி.

சில நிறுவனங்கள் கோடிக்கணக்கில் விளம்பரம் செய்தும் ஏன் சில ஆண்டுகளில் மறைந்துவிடுகின்றன? அதே நேரத்தில் சில நிறுவனங்கள் பெரிய விளம்பரங்கள் இல்லாமலேயே வாடிக்கையாளர்களின் நம்பிக்கையை எப்படி வென்று நிற்கின்றன? இவற்றுக்கான சரியான பதில் மார்க்கெட்டிங் மற்றும் பிராண்டிங் என்ற இரண்டு வார்த்தைகளுக்குள் மறைந்திருக்கிறது.

பிராண்டிங் என்பது ஒரு காந்தம் போன்றது. அது வாடிக்கையாளர்களை ஈர்ப்பதற்கும் தக்கவைப்பதற்கும் ஒரு நிறுவனம் உருவாக்கும் அடையாளம். இது மக்களை ஒருமுறை வாங்க வைப்பது மட்டுமல்ல; அவர்களைத் திரும்பத் திரும்ப வரவழைக்கும் நீடித்த தாக்கங்களை உருவாக்குவதாகும். ஒரு வலுவான பிராண்ட் உங்களைப் போட்டியாளர்களிடமிருந்து வேறுபடுத்தி காட்டுகிறது. பிராண்டிங் உணர்வுபூர்வமான மற்றும் உத்திசார்ந்த விசுவாசத்தை உருவாக்குகிறது.

சந்தைப்படுத்தல் என்பது உங்கள் பிராண்டைப் பற்றி மக்களுக்கு தெரிவிக்கும் ஒரு வழியாகும். சந்தைப்படுத்தலின் நோக்கம், பிறர் கவனத்தை ஈர்ப்பதும் அவர்களை நினைவில் கொள்ள செய்வதுமாகும். தெளிவான பிராண்ட் நோக்கம் இல்லாத சந்தைப்படுத்தல் குறைந்த செயல்திறன் கொண்டது.

மார்க்கெட்டிங் மற்றும் பிராண்டிங்கின் முக்கிய வேறுபாடுகள்:

பிராண்டிங் என்பது உங்கள் நிறுவனத்தின் அடையாளம், மதிப்பு மற்றும் வாடிக்கையாளர்களுக்கு நீங்கள் தரும் வாக்குறுதி. இது வாடிக்கையாளர்களிடையே விசுவாசத்தை உருவாக்கும்.

மார்க்கெட்டிங் என்பது உங்கள் தயாரிப்பு அல்லது சேவையை வாடிக்கையாளரிடம் கொண்டு சேர்க்கும் விளம்பர உத்திகள்.

பிராண்டிங் என்பது நீண்டகாலப் பயணம். இது வாடிக்கையாளர் களின் மனதில் உங்கள் நிறுவனம் மீதான நம்பிக்கையையும் பாசத்தையும் உருவாக்குகிறது.

மார்க்கெட்டிங் என்பது குறுகிய கால இலக்கு. இது தற்காலிக விற்பனையை அதிகரிக்கவும், புதிய சலுகைகளை மக்களிடம் சேர்க்கவும் பயன்படுகிறது.

முதலில் உங்கள் பிராண்ட் என்ன என்பதை தீர்மானித்த பிறகே, அதற்கான மார்க்கெட்டிங் உத்திகளை வகுக்க முடியும்.

பிராண்டிங்கின் முக்கிய கூறுகள்:

நிறுவனத்தின் பெயர், லோகோ, டிசைன், வாசகம்(slogan) மற்றும் வண்ணங்கள்.

வாடிக்கையாளர்களுடன் நீங்கள் பேசும் விதம்.

உங்கள் நிறுவனம் எதை முக்கியமாக கருதுகிறது. உதாரணத்திற்கு தரம், மலிவான விலை அல்லது சூழல் பாதுகாப்பு போன்ற மதிப்புகள் (Core values).

மார்க்கெட்டிங்கின் முக்கிய கூறுகள்:

பேஸ்புக், இன்ஸ்டாகிராம், யூடியூப் போன்ற சமூக ஊடக தளங்களில் விளம்பரம் செய்தல்.

கூகுள் தேடலில் உங்கள் இணையதளம் முதலில் வருமாறு செய்வது.

தள்ளுபடி விற்பனை மற்றும் பண்டிகை காலச் சலுகைகளை அறிவிப்பது.

பிராண்டிங் என்பது நீண்ட கால உத்தி (strategy); மார்க்கெட்டிங் என்பது உடனடி மற்றும் குறுகிய கால தந்திரங்கள் (tactics). எளிமையாக கூற வேண்டுமென்றால் பிராண்டிங் அர்த்தத்தை உருவாக்குகிறது, மார்க்கெட்டிங் அந்த அர்த்தத்தை சரியான பார்வையாளர்களுக்கு கொண்டு சேர்க்கிறது. பிராண்டிங் உங்களை நிலைநிறுத்துகிறது, மார்க்கெட்டிங் அந்த செய்தியை வாடிக்கையாளர்களிடம் கொண்டு சேர்க்கிறது.

மொத்தத்தில் பிராண்டிங் என்பது ஒரு அடித்தளம் (Foundation); மார்க்கெட்டிங் என்பது அந்த அஸ்திவாரத்தின் மீது கட்டப்படும் கட்டிடம் போன்றது. வணிகத்தின் வெற்றிக்கு இவை இரண்டும் இருவேறு விஷயங்களாக செயல்பட்டாலும், ஒன்றிணைந்து செயல்படுகின்றன. அப்படி இவை இரண்டும் ஒன்றிணைந்து செயல்படும் போதுதான் வணிகத்தில் வெற்றிபெற முடியும்.

குறுகிய கால விற்பனை சலுகைகளைத் தாண்டி, உங்கள் நிறுவனத்தின் மீதான பாசத்தையும் விசுவாசத்தையும் வாடிக்கையாளர்கள் மனதில் விதைத்து, தலைமுறை கடந்தும் உங்கள் பிசினஸ் அசைக்க முடியாத லாபகரமான சாம்ராஜ்யமாக மாறுவதை நீங்கள் உறுதி செய்யலாம்.

Reference: Harvard Business Review