கிரெடிட் கார்டு செலவுகளை குறைக்க இதை பாலோ பண்ணுங்க பாஸ்!

இன்றைய காலகட்டத்தில், கிரெடிட் கார்டுகள் பலரது வாழ்க்கையில் தவிர்க்க முடியாத ஒன்றாக மாறியுள்ளது. இருப்பினும், முறையான திட்டமிடல் இல்லாமல் பயன்படுத்துவதால், இவை பெரும் கடன் சுமையாக மாறிவிடுகின்றன. வாழ்க்கை முறை மாற்றங்கள், எளிதான அணுகல் போன்ற காரணங்களால் கடன் சுமை ஏற்படுவதற்கான வாய்ப்புகளும் அதிகமாகிறது. அன்றாட வாழ்க்கையில் சில எளிய பழக்கங்களை நடைமுறையில் கொண்டு வந்தால் கிரெடிட் கார்டு கடனை கணிசமாகக் குறைக்க முடியும். அதன் வகையில், இதோ 10 பயனுள்ள வழிகள்:

1. சிறிய கடன்களை முதலில் அடைத்தல்

உங்களுக்கு ஒன்றுக்கும் மேற்பட்ட கிரெடிட் கார்டுகளில் கடன் இருந்தால், முதலில் குறைந்த கடன் தொகையைக் கொண்ட கார்டுக்கு முக்கியத்துவம் கொடுங்கள். சிறிய கடனை அடைத்துவிட்டால், உங்களுக்கு ஒரு மனஅமைதி கிடைக்கும். பின்னர், அதிக கடன் உள்ள கார்டுகளின் மீது கவனம் செலுத்தலாம்.

2. அதிக வட்டி கொண்ட கடனுக்கு முன்னுரிமை

எந்த கிரெடிட் கார்டில் அதிக வட்டி வசூலிக்கப்படுகிறதோ, அந்தக் கடனை முதலில் அடைக்க முயற்சி செய்யுங்கள். இதனால், நீங்கள் செலுத்த வேண்டிய மொத்த வட்டியின் அளவு குறையும்.

3. மாதாந்திர பட்ஜெட்டை உருவாக்குதல்

உங்கள் வருமானம் மற்றும் செலவுகளை விரிவாகப் பட்டியலிடுங்கள். எந்தெந்த செலவுகளைக் குறைக்க முடியும் என்று ஆராயுங்கள். கிரெடிட் கார்டு மூலம் செய்யப்படும் தேவையற்ற செலவுகளைக் கட்டுப்படுத்துங்கள். ஒவ்வொரு மாதமும் எவ்வளவு தொகை கிரெடிட் கார்டு கடனுக்காக ஒதுக்க முடியும் என்பதைத் திட்டமிடுங்கள்.

4. தானியங்கி கட்டண முறையை பயன்படுத்துதல்

கிரெடிட் கார்டுக்கான குறைந்தபட்ச தொகையையாவது ஒவ்வொரு மாதமும் சரியான தேதியில் செலுத்துவதை உறுதிப்படுத்திக் கொள்ளுங்கள். இதற்காக தானியங்கி கட்டண முறையை உங்கள் வங்கிக் கணக்குடன் இணைத்து விடுவது நல்லது. இதனால் தாமத கட்டணமும், அதிக வட்டியும் இல்லாமல் தவிர்க்க முடியும்.

5. தேவையற்ற சந்தாக்களை ரத்து செய்தல்

நீங்கள் பயன்படுத்தாத அல்லது தற்போது தேவையில்லாத ஆன்லைன் சந்தாக்கள், பொழுதுபோக்குச் சேனல்கள் போன்றவற்றை ரத்து செய்யுங்கள். இதன் மூலம் மாதந்தோறும் கணிசமான தொகையை சேமிக்க முடியும்.

6. சிறிய சேமிப்புகளை கடனுக்கு செலுத்துதல்

உங்களுக்கு அவ்வப்போது கிடைக்கும் சிறிய தொகைகள் உதாரணமாக, எதிர்பாராத போனஸ், ஊக்கத்தொகை போன்றவற்றை உடனடியாக கிரெடிட் கார்டு கடனை அடைக்க பயன்படுத்துங்கள். சிறு துளிகளே பெரு வெள்ளம் என்பது போல, இந்த சிறிய தொகைகள் கூட உங்கள் கடன் சுமையை குறைக்க உதவும்.

7. கடன் ஆலோசனை பெறுதல்

உங்களுக்கு அதிக கடன் சுமை இருந்து அதை எப்படி சமாளிப்பது என்று தெரியவில்லை என்றால், நிதி ஆலோசகரை அணுகுவது நல்லது. அவர்கள் உங்களுக்கான சரியான கடன் மேலாண்மை திட்டத்தை ஆலோசிப்பர்.

8. தள்ளுபடி மற்றும் வெகுமதி புள்ளிகளை தெளிவாக பயன்படுத்துதல்

கிரெடிட் கார்டுகள் வழங்கும் தள்ளுபடிகள், கேஷ்பேக் மற்றும் வெகுமதி புள்ளிகள் போன்ற சலுகைகளை புத்திசாலித்தனமாகப் பயன்படுத்துங்கள். உங்களுக்கு தேவையான பொருட்களை வாங்கும் போது இந்த சலுகைகளைப் பயன்படுத்துவதன் மூலம் செலவுகளைக் குறைக்கலாம். ஆனால், அதிக வெகுமதி புள்ளிகள் கிடைக்கின்றன என்பதற்காக தேவையற்ற பொருட்களை வாங்குவதைத் தவிர்க்கவும்.

9. தொழில்நுட்பத்தைப் பயன்படுத்துதல்

பட்ஜெட் மற்றும் செலவுகளைக் கண்காணிக்க உதவும் பல்வேறு செயலிகள் இன்று இருக்கின்றன. இவற்றைப் பயன்படுத்துவதன் மூலம் உங்கள் கிரெடிட் கார்டு செலவுகளை மட்டுமல்லாமல், மற்ற செலவுகளையும் கட்டுப்பாட்டுக்குள் வைத்திருக்க முடியும். சில செயலிகள் தானாகவே உங்கள் செலவுகளை வகைப்படுத்தி, எங்கு அதிகமாக செலவு செய்கிறீர்கள் என்பதைக் காட்டிவிடும்.

10. இப்போது வாங்குங்கள், பின்னர் பணம் செலுத்துங்கள் திட்டங்களைத் தவிர்த்தல்

இன்றைய இளைஞர்கள் மத்தியில் பிரபலமாகி வரும் "இப்போது வாங்கி, பிறகு பணம் செலுத்துங்கள்" திட்டங்கள் கிரெடிட் கார்டு கடனுக்கு மாற்றாகத் தோன்றினாலும், இவையும் ஒரு வகையான கடன்தான் என்பதை நினைவில் கொள்ள வேண்டும். இது போன்ற பல கணக்குகள் வைத்திருப்பது உங்கள் கடன் சுமையை கடினமாக்கும். எனவே, முடிந்தவரை இந்தத் திட்டங்களைத் தவிர்ப்பது நல்லது.

கிரெடிட் கார்டு நம் வாழ்க்கையில் ஒரு முக்கியமான பொருளாக மாறிவிட்டது. ஆனால் அதைப் பயன்படுத்தும் விதமே நம்மைச் சிக்கலுக்கு இழுத்து செல்லக்கூடும்.

நம்முடைய செலவுகளை திட்டமிட்டு, தேவையற்றவற்றை குறைத்து, கடனை நேரத்தில் அடைத்தால் கிரெடிட் கார்டு ஒரு நன்மையான உதவியாக அமையும். சிறிய பழக்கங்களை மாற்றி, ஒவ்வொரு மாதமும் சிறிது சிறிதாக கடனைச் சீராகச் செலுத்தினால், கடன் சுமையைத் தவிர்க்க முடியும்.

இப்படி இன்றே இந்தச் சிறிய நல்ல பழக்கங்களை ஆரம்பித்தால், நாளைய வாழ்க்கை மகிழ்ச்சிகரமாக அமையும்.