ஜாமீன் கையெழுத்து போடுகிறீர்களா? இந்த 5 ஆபத்துகளை முதல்ல தெரிஞ்சுக்கோங்க!

தொடர்ச்சியான உத்திரவாதம் (Continuing Guarantee):

ஜாமின் ஒப்பந்தத்தில் தொடர்ச்சியான உத்தரவாதம் என்ற வாசகம் இருந்தால், எதிர்காலத்தில் அந்த நபர் வாங்கும் மற்ற கடன்களுக்கும் நீங்கள் பொறுப்பாக நேரிடும். எனவே இந்த வாசகம் உள்ளதா என்பதை நன்கு கவனிக்கவும்.

நீங்கள் ஜாமீன் கையெழுத்திடும் பொழுது உங்கள் சொந்த சொத்து ஆவணங்களை சமர்ப்பித்திருந்தால், கடன் செலுத்தாத பட்சத்தில் உங்கள் சொத்துக்கள் ஏலத்திற்கு வரலாம்.

ஜாமீன்தாரரின் நிதிப்பொறுப்பு (Financial Liability):

கடன் வாங்குபவர் தவணை செலுத்தத்தவறினால் அல்லது தலைமறைவானால் நம்மீதுதான் வங்கி சட்டபூர்வ நடவடிக்கை எடுக்கும். உங்கள் மீது வங்கியால் ரெக்கவரி நோட்டீஸ் அனுப்பப்பட்டு, நீதிமன்ற நடவடிக்கைகள் வரை செல்ல நேரிடலாம்.

உங்கள் சொத்துக்களை வங்கி ஜப்தி செய்ய நேரிடலாம். உங்கள் சம்பளத்தில் பிடித்தம் செய்யவும் வங்கிக்கு உரிமை உண்டு. உங்கள் வருமானம் அல்லது சொத்துக்கள் மூலம் அந்தக் கடனை அடைக்க நீங்கள் கடமைப்பட்டவர் ஆகிறீர்கள்.

உங்கள் கிரெடிட் ஸ்கோர் பாதிப்பு (Credit Score Impact):

கடன் வாங்குபவர் உரிய நேரத்தில் தவணை கட்டத் தவறினால், அது கடன் வாங்குபவரின் சிபில் (CIBIL) ஸ்கோரை மட்டுமல்லாமல், உங்களுடைய கிரெடிட் ஸ்கோரையும் கடுமையாக பாதிக்கும். இதனால் எதிர்காலத்தில் உங்களுக்குத் தேவைப்படும் பொழுது வீட்டுக் கடன், வாகனக் கடன் போன்றவை கிடைப்பதில் சிரமம் ஏற்படும். சில சமயம் கிடைக்காமல் போகக்கூட வாய்ப்பு உண்டு.

கடன் தொகையும் காலமும் (Loan Amount and Tenure):

அந்தக் கடனின் மொத்தத்தொகை எவ்வளவு மற்றும் எத்தனை ஆண்டுகள் ஜாமீன் பொறுப்பு நீடிக்கிறது என்பதை ஆராய வேண்டும். நீண்ட காலக் கடன்களுக்கு ஜாமீன் போடுவது அதிக ஆபத்தாக மாறலாம்.

உங்கள் எதிர்காலத் தேவைகள் (Personal Financial Goals):

எதிர்காலத்தில் நீங்கள் சொந்தமாக வீடு, வாகனம் அல்லது தொழில் தொடங்க கடன் வாங்க திட்டமிட்டு இருக்கலாம். நீங்கள் ஜாமீன் கையெழுத்துப் போட்டிருக்கும் கடன், உங்களின் கடன் தகுதியை (Borrowing Capacity) குறைக்கும் வாய்ப்பை ஏற்படுத்தி விடும். எனவே கவனம் தேவை.

முக்கியமாக கவனிக்க வேண்டிய விஷயங்கள்:

கடன் வாங்கியவர் எதற்காகக் கடன் வாங்குகிறார், அதை எப்படித் திருப்பி செலுத்தப்போகிறார் என்ற தெளிவான திட்டம் உள்ளதா என்று விசாரித்து தெரிந்துகொள்ள வேண்டும்.

கடன் வாங்கியவரின் வேலை, நிதி நிலைத்தன்மை மற்றும் குடும்ப சூழல் ஆகியவற்றையும் கணக்கிட்டு யோசித்து முடிவு எடுக்கவும். குறிப்பாக ஆடம்பரமான செலவுகளுக்கு (சுற்றுலா போவதற்காக அல்லது தேவையற்ற பொருட்களை வாங்குவதற்காக ஆசைப்பட்டு) கடன் வாங்குபவர்களுக்கு ஜாமீன் போடுவதைத் தவிர்ப்பது நல்லது.

உங்களால் திருப்பி செலுத்தக்கூடிய அளவிற்கு மட்டுமே ஜாமீன் கையெழுத்திட வேண்டும். உங்கள் குடும்ப சூழ்நிலை மற்றும் அவசர தேவைகளுக்கான நிதியை இது பாதிக்காமல் பார்த்துக்கொள்ள வேண்டும்.

கடன் வாங்கியவர்களின் அனுமதி இன்றி வட்டி விகிதம் மாற்றப்பட்டால் ஜாமீன்தாரர் பொறுப்பிலிருந்து விலகச் சட்டத்தில் இடம் உண்டு. நீங்கள் ஜாமீன் கேட்டு வரும் நபர் உறவினரா அல்லது நண்பரா என்பதைப் பொறுத்தும், கடனின் அளவு மற்றும் வகையைப் பொறுத்தும் சில முன்னெச்சரிக்கை நடவடிக்கைகளை எடுக்கலாம்.

அந்த நபர் இதற்கு முன்பு வாங்கிய கடன்களை முறையாகச் செலுத்தியிருக்கிறாரா? அவரது நன்னடத்தை எப்படி உள்ளது என்பதை கவனிக்கவேண்டும். இந்த முன்னெச்சரிக்கை நடவடிக்கைகள் எல்லாம் நம்மை ஆபத்தில் தள்ளிவிடாமல் இருக்கும்.

இந்தத் தகவல்களை அறிவதன் மூலம், தேவையற்ற கடன் சுமைகள், நீதிமன்ற வழக்குகள் மற்றும் சிபில் ஸ்கோர் வீழ்ச்சி ஆகியவற்றில் இருந்து உங்கள் சொந்தச் சொத்துக்களையும் குடும்பத்தின் நிதி எதிர்காலத்தையும் பாதுகாப்பாக வைத்துக்கொள்ள முடியும்.

Reference: