வீட்டுக் கடனை முன்கூட்டியே அடைத்தால் அபராதம் உண்டா? RBI விதி சொல்வது என்ன?

சொந்த வீடு எங்க நினைக்கும் பலரும் பல ஆண்டுகளாகச் சிறுகச் சிறுகச் சேமிக்கின்றனர். இருப்பினும் பணம் பத்தாமல் வங்கிகளில் வீட்டு வசதிக் கடன் வாங்குகிறார்கள். வாங்கிய கடனை விரைவாக அடைத்துவிட வேண்டும் என்ற எண்ணம் கடன் வாங்கிய அனைவருக்கும் நிச்சயமாக இருக்கும்.

மேலும் கையில் மொத்தமாகப் பணம் கிடைக்கும்போது கடனை முன்கூட்டியே அடைக்க பலரும் விரும்புவார்கள். ஆனால் அப்படி அடைக்கும்போது வங்கிகள் ஏதாவது அபராதம் விதிக்குமா என்ற சந்தேகம் பலருக்கும் எழுகிறது. 

இந்திய ரிசர்வ் வங்கி வெளியிட்டுள்ள கடன்களுக்கான முன்கூட்டியே செலுத்தும் கட்டண விதிகள் இதற்குத் தெளிவான பதிலைத் தருகின்றன. பொதுமக்களின் நலன் கருதி உருவாக்கப்பட்ட இந்த புதிய விதிகள் 2026 ஜனவரி 1 முதல் அதிகாரப்பூர்வமாக நாடு முழுவதும் அமலுக்கு வந்துள்ளன.

மாறும் வட்டி மற்றும் நிலையான வட்டி! 

தனிநபர்கள் வணிகம் அல்லாத சொந்தப் பயன்பாட்டிற்காக வாங்கிய மாறும் வட்டி (Floating Interest) விகித கடன்களை முன்கூட்டியே அடைக்க எவ்வித கட்டணமும் கிடையாது என்று ரிசர்வ் வங்கி திட்டவட்டமாக அறிவித்துள்ளது. இந்தக் கடன்களைப் பகுதியாகவோ அல்லது முழுமையாகவோ எந்த நேரத்திலும் நீங்கள் எளிதாக அடைக்கலாம். இதற்காக வங்கிகள், வீட்டுவசதி நிதி நிறுவனங்கள் அல்லது வங்கி சாரா நிதி நிறுவனங்கள் எந்தவொரு அபராதக் கட்டணத்தையும் உங்களிடம் வசூலிக்கக் கூடாது. 

கூட்டாக இணைந்து வாங்கிய கடன்களுக்கும் இந்த முழுமையான கட்டண விலக்கு பொருந்தும். ஆனால் நிலையான வட்டி (Fixed Interest) விகிதக் கடன்களுக்கு இந்த விதி பொருந்தாது. அந்த வகைக் கடன்களுக்கு வங்கிகளின் கொள்கைக்கு ஏற்ப 2 முதல் 3 சதவீதம் வரை அபராதம் வசூலிக்கப்படலாம். 

பண ஆதாரம் மற்றும் கால வரம்பு! 

உங்களுடைய சொந்தச் சேமிப்புப் பணத்தைப் பயன்படுத்திக் கடனை அடைத்தாலும் சரி, அல்லது குறைந்த வட்டிக்கு வேறு ஒரு வங்கிக்குக் கடனை மாற்றினாலும் எந்தவொரு கூடுதல் கட்டணமும் உங்களிடம் இருந்து வசூலிக்கக் கூடாது. கடனை முன்கூட்டியே அடைப்பதற்கு எந்தவொரு குறைந்தபட்ச கால அவகாசமும் வங்கிகளால் வாடிக்கையாளர்களுக்கு நிபந்தனையாக விதிக்கப்படக் கூடாது. 

அதாவது, நீங்கள் வீட்டுக் கடன் வாங்கிய சில மாதங்களிலேயே உங்களிடம் பணம் இருந்தால் அதனை எவ்வித அபராதமுமின்றி முழுமையாக அடைக்க முடியும். கடன் ஒப்பந்தம் மற்றும் முக்கியத் தகவல்கள் அறிக்கையில் முன்கூட்டியே குறிப்பிடப்படாத எந்தவொரு புதிய கட்டணத்தையும் கடனை முடிக்கும்போது வங்கிகள் திடீரென வசூலிக்க முடியாது. வங்கியின் சொந்த முடிவின் அடிப்படையில் கடன் முன்கூட்டியே முடிக்கப்பட்டால், எந்தச் சூழலிலும் வாடிக்கையாளர்களுக்கு அபராதம் விதிக்கக் கூடாது.

கவனிக்க வேண்டிய முக்கிய விஷயங்கள்! 

இந்த புதிய விதிமுறைகள் 2026 ஜனவரி 1 அல்லது அதற்குப் பிறகு புதிதாக வழங்கப்பட்ட, புதுப்பிக்கப்பட்ட கடன்களுக்கு மட்டுமே பொருந்தும். உங்கள் கடன் ஒப்புதல் கடிதத்தில் வட்டி விகிதம் எந்தப் பிரிவில் உள்ளது என்பதை முன்கூட்டியே உறுதிப்படுத்திக் கொள்ளுங்கள். இதற்கு முந்தைய பழைய மாறும் வட்டி கடன்களுக்கும் ரிசர்வ் வங்கியின் பழைய சுற்றறிக்கைகளின்படி ஏற்கனவே கட்டண விலக்கு அமலில் உள்ளது. 

2026 ஜூலை 1 முதல் வங்கிகள் வாடிக்கையாளர்களின் கடன் விவரங்களை மாதத்தின் 9, 16, 23 மற்றும் கடைசி நாளில் கிரெடிட் பீரோக்களுக்கு கட்டாயம் அனுப்ப வேண்டும் என்று புதிய விதி வந்துள்ளது. இதனால் நீங்கள் உங்களின் வீட்டுக் கடன் கணக்கை முன்கூட்டியே முழுமையாக அடைத்தவுடன், உங்கள் சிபில் ஸ்கோரில் அது எவ்வித தாமதமுமின்றி மிக விரைவாகவே பிரதிபலிக்கும். 

வங்கிகளில் கடன் பெறும் அனைத்து வாடிக்கையாளர்களும் தங்களது அடிப்படை உரிமைகளை எப்பொழுதும் முழுமையாக அறிந்து கொள்வது மிகவும் அவசியம். நிதி சம்பந்தப்பட்ட எந்தவொரு முடிவை எடுக்கும் முன்பும் வங்கியின் விதிமுறைகளை முழுமையாகப் படித்துப் புரிந்துகொள்வது உங்களின் எதிர்காலப் பாதுகாப்பை உறுதி செய்யும் என்பதில் சந்தேகம் இல்லை.

Reference: