வெறும் 10,000 ரூபாயில் கார்ப்பரேட் பாண்ட்ஸ் முதலீடு செய்வது எப்படி?

சிறு முதலீட்டாளர்கள் மற்றும் சில்லறை முதலீட்டாளர்கள் தற்போது கார்ப்பரேட் கடன் பத்திரங்களில் முதலீடு செய்ய அதிக ஆர்வம் காட்டி வருகின்றனர். தேசிய பங்குச்சந்தை வெளியிட்டுள்ள அண்மைய புள்ளி விவரங்களின்படி, ஆன்லைன் கடன் பத்திரத் தளங்களில் நடைபெற்ற வர்த்தகம் கிட்டத்தட்ட மூன்று மடங்கு உயர்ந்துள்ளது.

கார்ப்பரேட் பாண்ட்ஸ் (Corporate Bonds) முதலீட்டாளர்கள் அதிக ஆர்வம் காட்டுவதற்கு பிரதான காரணம், வங்கி நிலையான வைப்புத் தொகைகளை (FD) விட இவற்றில் கிடைக்கும் அதிகப்படியான வட்டி விகிதங்கள் மற்றும் பங்குச்சந்தை ஏற்ற இறக்கங்கள் இல்லாத நிலையான வருவாயாகும்.

சமீப காலமாக இந்திய நிதிச் சந்தையில் சில்லறை முதலீட்டாளர்கள் (Retail Investors) முதல் பெரிய நிறுவனங்கள் வரை கார்ப்பரேட் பத்திரங்களை நோக்கி நகர்ந்து வருகின்றனர். இதற்கான முக்கிய காரணங்கள் மற்றும் முதலீட்டாளர்களின் போக்குகள் என்ன என்பதை இப் பதிவில் காணலாம்.

(1) முதலீட்டாளர்கள் ஆர்வம் காட்டுவதற்கான முக்கிய காரணங்கள்:

*அதிக வட்டி வருமானம்:

அரசு பத்திரங்கள் மற்றும் வங்கிகளின் வழக்கமான வைப்புத் தொகைகளுடன் ஒப்பிடும்பொழுது கார்ப்பரேட் பத்திரங்கள் 7% முதல் 14% வரை கூடுதல் வட்டி விகிதங்களை வழங்குகின்றன. பங்குச்சந்தை அதிக ஏற்ற இறக்கத்துடன் இருக்கும் காலங்களில், முதலீட்டாளர்கள் தங்களின் முதலீட்டு போர்ட்ஃபோலியோவை சமநிலைப்படுத்த இதனைப் பயன்படுத்துகின்றனர்.

*குறைந்தபட்ச முதலீட்டு வரம்பு குறைப்பு:

இந்திய பத்திரச் சந்தையை சில்லறை முதலீட்டாளர்களும் எளிதில் அணுகும் வகையில் செபி சில அதிரடி மாற்றங்களைக்கொண்டு வந்துள்ளது. முன்பு பெரிய முதலீட்டாளர்கள் மட்டுமே இதில் முதலீடு செய்ய முடியும் என்ற நிலை இருந்தது. ஆனால் தற்போது செபியின் (SEBI) புதிய விதிமுறைகள் மற்றும் ஆன்லைன் முதலீட்டு தளங்களின் வருகையால், சிறு முதலீட்டாளர்களும் வெறும் ரூபாய் 1000 முதல் ரூபாய் 10,000 வரை முதலீடு செய்யும் வகையில் கதவுகள் திறக்கப்பட்டுள்ளன.

தனியாரால் வெளியிடப்படும் கார்ப்பரேட் பத்திரங்களுக்கான குறைந்தபட்ச முதலீட்டுவரம்பு ரூபாய் ஒரு லட்சத்திலிருந்து ரூபாய் 10,000 ஆக குறைக்கப்பட்டுள்ளது. டோக்கனைசேஷன் (Tokenization) மற்றும் ஆன்லைன் பத்திரச் சந்தை தளங்கள் (Online Bond Marketplaces) மூலமாக சாதாரண முதலீட்டாளர்களும் இப்போது மிக எளிதாகப் பத்திரங்களை வாங்க முடிகிறது.

*பங்குச்சந்தை ரிஸ்க் இல்லாமை:

ஈக்விட்டி (Equity) சந்தையின் அதீத ஏற்ற இறக்கங்களால் நஷ்டமடைய விரும்பாதவர்கள், தங்களின் முதலீட்டு போர்ட்ஃபோலியோவை பன்முகப்படுத்த (Diversification) கார்ப்பரேட் பத்திரங்களைத் தேர்வு செய்கின்றனர்.

*வழக்கமான வருமானம்:

முன்கூட்டியே தீர்மானிக்கப்பட்ட வட்டித் தொகை முதலீட்டாளர்களுக்கு மாதம்தோறும், மூன்று மாதங்களுக்கு ஒருமுறை அல்லது ஆண்டுதோறும் எனத் தடையின்றி கிடைக்கிறது.

*நிறுவனங்களின் நிதித் தேவை மற்றும் நம்பகத்தன்மை:

இந்தியாவின் பொருளாதார வளர்ச்சி மற்றும் உள்கட்டமைப்பு மேம்பாடுகளுக்காக நிறுவனங்களுக்குப் பெருமளவில் மூலதனம் தேவைப்படுகிறது. வங்கிக் கடன்களைவிட பத்திரச்சந்தை மூலம் நிதி திரட்டுவது நிறுவனங்களுக்கு எளிதாக இருப்பதால், கடந்த ஆண்டை விட பத்திரங்களை வெளியிடும் நிறுவனங்களின் எண்ணிக்கை கணிசமாக அதிகரித்துள்ளது. குறிப்பாக AAA மற்றும் AA+ ரேட்டிங் பெற்ற உயர்தர பத்திரங்களில் முதலீடு செய்யும் போது கடன் ஆபத்து மிகக் குறைவாக இருப்பதால், முதலீட்டாளர்களின் நம்பிக்கை அதிகரித்துள்ளது.

(2) கார்ப்பரேட் பத்திரங்களில் உள்ள வகைகள்:

முதலீட்டாளர்கள் தங்களின் ரிஸ்க் எடுக்கும் திறனுக்கு ஏற்ப இரண்டு முக்கிய பிரிவுகளில் ஆர்வம் காட்டுகின்றனர்.

*உயர்தர பாதுகாப்பான பத்திரங்கள் (High-Grade Bonds):

AAA அல்லது AA+ மதிப்பீடு (Credit Rating) பெற்ற முன்னணி பொதுத்துறை மற்றும் தனியார் நிறுவனங்களின் பத்திரங்கள். இதில் ரிஸ்க்‌ மிகக் குறைவு, வட்டி விகிதம் நடுத்தரமாக (7.5% - 9.5%) இருக்கும்.

*அதிக லாபம் தரும் பத்திரங்கள் (High- Yield Bonds):

நடுத்தர அளவிலான நிதி நிறுவனங்கள் (NBFCs) மற்றும் வேகமாக வளரும் கார்ப்பரேட் நிறுவனங்களின் பத்திரங்கள். இவற்றில் ரிஸ்க் சற்று அதிகம் என்றாலும், 10% முதல் 14.5% வரை அதிக வட்டி கிடைக்கும்.

(3) எப்படி முதலீடு செய்கிறார்கள்?

முதலீட்டாளர்கள் நேரடியாகவும் அல்லது மறைமுகமாகவும் கார்ப்பரேட் பத்திரச் சந்தையில் நுழைகிறார்கள்.

*நேரடி முதலீடு:

Stable Money, Grip Invest அல்லது IndiaBonds போன்ற நவீன நிதிநுட்ப (Fintech) செயலிகள் மூலம் தங்களின் டீமேட் கணக்கை பயன்படுத்தி நேரடியாகப் பத்திரங்களை வாங்குகின்றனர்.

*மியூச்சுவல் ஃபண்டுகள் மூலம்:

நேரடியாகப் பத்திரங்களைத் தேர்வு செய்யத் தெரியாதவர்கள், 'கார்ப்பரேட் பாண்ட் ஃபண்ட்' (Corporate Bond Mutual Funds) போன்ற கடன் சார்ந்த மியூச்சுவல் ஃபண்டுகள் மூலம் முதலீடு செய்கிறார்கள். இவை தங்களின் நிதியில் குறைந்தது 80%-ஐ மிக உயர்ந்த பாதுகாப்பு மதிப்பீடு கொண்ட நிறுவனங்களில் மட்டுமே முதலீடு செய்கின்றன.

(4) முதலீட்டாளர்கள் கவனிக்க வேண்டியவை:

கார்ப்பரேட் பத்திரங்கள் நல்ல வருவாயைத் தந்தாலும் முதலீடு செய்வதற்கு முன்பு அந்த சம்பந்தப்பட்ட நிறுவனத்தின் கடன் தகுதி மதிப்பீட்டு (Credit Rating), பணப்புழக்கம் (Liquidity) மற்றும் வரிவிதிப்பு அம்சங்களை கட்டாயம் சரிபார்ப்பது அவசியம். நிறுவனம் திவாலாகும் பட்சத்தில் 'Default Risk' எனப்படும் அசல் மற்றும் வட்டி கிடைக்காமல் போகும் அபாயம் இதில் உண்டு.

வங்கிகளின் குறைந்த வட்டி லாபத்திலிருந்து விடுபட்டு, பாதுகாப்பான முறையில் உங்களது பணத்தை பலமடங்கு பெருக்குவதற்கான எளிய வழிகளை அறிந்து, எதிர்கால நிதிச் சுதந்திரத்தை உறுதிப்படுத்துங்கள்.

Reference: