'இடி இடிக்குது, மின்னல் முழங்குது அவ பேரக் கேட்டா' - 'Nayanthara: Beyond the Fairy Tale'!

லேடி சூப்பர் ஸ்டார் என்ற பெயரை சொன்னதுமே அனைவருக்கும் தெரிந்துவிடும் அது நடிகை நயன்தாராதான் என்று. அந்த அளவிற்கு மக்கள் மனதில் தனது நடிப்பின் மூலம் தனி இடத்தை பிடித்தவர். சமீப காலமாக நடிகை நயன்தாரா பற்றிய பதிவுகள் வந்த வண்ணம் உள்ளன. அதற்கு எல்லாம் காரணம் 'Nayanthara: Beyond the Fairy Tale' என்ற ஆவணப்படத்தின் அப்டேட் தான்...

நயன்தாரா - யாருக்குத்தான் பிடிக்காது! தனது நடிப்பின் மூலம் அனைவரின் மனதில் இடம் பிடித்த இவர் கர்நாடகாவில் உள்ள பெங்களூரில் தான் பிறந்தார். பிறப்பால் இவர் மலையாள குடும்பத்தை சேர்ந்தவர். பெங்களூரில் பிறந்திருந்தாலும் இவரது தந்தை இந்திய விமான படையில் பணியாற்றியதால் ஜாம்நகர், குஜராத், டெல்லி போன்ற இடங்களில் பள்ளி படிப்பு. பின்னர் கேரளாவில் உள்ள மார்தோமா கல்லூரியில் இளங்கலை பட்டம். இவருக்கு லெனோ எனும் தமயன் உள்ளார்.

நடிகை நயன்தாரா 'மனசினகாரே' என்ற மலையாள மொழித் திரைப்படம் மூலம்தான் திரைப்படத்துறைக்கு அறிமுகமாகியுள்ளார். இப்படத்தினை தொடர்ந்து இயக்குனர் ஹரி இயக்கத்தில் சரத்குமார் இரட்டை வேடங்களில் நடித்து புகழ் பெற்ற 'ஐயா' திரைப்படத்தில் நாயகியாக நடித்து தமிழ் திரையுலகில் அறிமுகமாகி பிரபலமானார். சிறந்த அறிமுக நடிகையென பலரால் கௌரவிற்கப்பட்டுள்ளார்.

இப்படத்தினை தொடர்ந்து இவர் 2005-ம் ஆண்டு மாபெரும் வெற்றி பெற்ற திரைப்படமான 'சந்திரமுகி' திரைப்படத்தில் நடிகர் ரஜினிகாந்திற்கு ஜோடியாக நடித்து தமிழ் திரையில் பிரபலமாகியுள்ளார்.

இவர் பெண்களை மையமாகக் கொண்டிருக்கும் மாயா, டோரா, அறம், கோலமாவு கோகிலா போன்ற கதைகளைத் தேர்ந்தெடுத்து நடித்து அதில் வெற்றியையும் பதித்தவர். இவர் நடித்த பில்லா, ராஜா ராணி, தனி ஒருவன், இமைக்கா நொடிகள், விஸ்வாசம் ஆகிய 5 படங்கள் டாப் சூப்பர் ஹிட் படங்களாகும். அவரது நடிப்பின் மூலம் தமிழ் சினிமாவில் 2010 களில் தொடங்கி இன்று வரை 'பெண் சூப்பர் ஸ்டார்' என்று கருதப்படுகிறார். தற்போது அதிக சம்பளங்களில் நடிக்கும் நடிகையாக நயன்தாரா புகழ் பெற்றுள்ளார். இவரது திரைப்படங்கள் ரசிகர்களால் கொண்டாடப்பட்டு வருவதால் இவர் பெரிய அளவில் தன் வர்த்தகம் மற்றும் மார்க்கெட்-யை உயர்த்தி தன் திரைவாழ்க்கையில் வெற்றி கண்டுள்ளார்.

விக்னேஷ் சிவன் இயக்கத்தில் 2015ஆம் அண்டு , ‘நானும் ரெளடிதான்’ படத்தில் விஜய் சேதுபதிக்கு ஜோடியாக நயன்தாரா நடித்தார். அப்படத்தின் படப்பிடிப்பின் போதே விக்னேஷ் சிவன் மீது காதல் கொண்டுள்ளார். சில ஆண்டுகள் ரகசியமாக இருந்த இவர்களது காதலை சமூக வலைத்தளங்களில் வெளிப்படையாக அறிவித்தனர். அதன் பின், கடந்த 2022 ஜூன் 9ஆம் தேதி தமிழ் திரைப்பட இயக்குனர் விக்னேஷ் சிவன் - நடிகை நயன்தாரா இருவரும், திருமணம் செய்துக் கொண்டனர். இவர்களது திருமணம் மகாபலிபுரத்தில் உள்ள தனியார் விடுதியில் பிரமாண்டமாக நடைபெற்றது. இந்த திருமணத்தில் பல சினிமா பிரபலங்கள் கலந்து கொண்டு மணமக்களை வாழ்த்தினர். இவர்களது திருமணப் புகைப்படங்கள் சமூக வலைத்தளங்களில் வைரலாக இருந்தது.

மேலும் இந்த திருமணத்தை ஒளிபரப்பு செய்யும் உரிமையை நெட்ப்ளிக்ஸ் நிறுவனம் தான் வாங்கியிருந்தது. அதை இயக்கும் பணிகளை கெளதம் மேனன் மேற்கொண்டார். அந்த வகையில், நெட்ப்ளிக்ஸ் நிறுவனம் கடந்த 2022ஆம் ஆண்டு ஜூலையில் இவர்களது திருமணப் புகைப்படங்களை வெளியிட்டது.

அப்போது ‘நயன்தாரா; பியாண்ட் தி ஃபேரி டேல்’(Nayanthara: Beyond The Fairy Tale) என்ற தலைப்பில், திருமண வீடியோ விரைவில் வெளியாகும் எனவும் நெட்ப்ளிக்ஸ் நிறுவனம் தெரிவித்தது. அதன் பின்பு, அதே ஆண்டு செப்டம்பர் மாதம் விரைவில் திருமண வீடியோ வெளியாகும் என தெரிவித்து ஒரு புரோமோவை வெளியிட்டது. ஆனால் கூறியதைபோல் எந்த வீடியோவும் வெளியாகவில்லை.. அதற்கு பின் அது குறித்த எந்த ஒரு அப்டேட்டும் இல்லாமல் இருந்தது.

இந்த நிலையில், நெட்ப்ளிக்ஸ் நிறுவனம் 'Nayanthara: Beyond the Fairy Tale' என்ற தலைப்பில், நயன்தாரா மட்டும் இடம் பெற்றுள்ள போஸ்டரை வெளியிட்டு நவம்பர் 18 என தேதியையும் அறிவித்துள்ளது. நயன்தாரா - விக்னேஷ் சிவன் திருமண வீடியோ என்றால் இருவரும் இருக்க வேண்டுமல்லவா? என்ற கேள்வி எழுந்த நிலையில், அந்த ஆவணப்படம் நயன்தாராவின் திருமணம் அல்லாது அவரது வாழ்க்கை பயணத்தையும் விவரிப்பதாக இருக்கும் என தெரிவிக்கப்பட்டுள்ளது. இந்த அப்டேட் நயன்தாராவின் ரசிகர்களுக்கு பெரிய எதிர்ப்பார்ப்பை தூண்டியுள்ளது.

இதற்கிடையில், நயன்தாரா - விக்னேஷ் சிவன், அவர்களது திருமணத்திற்கு பின்னர், வாடகைத் தாய் மூலம் இரு குழந்தைகளை பெற்றுக் கொண்டனர். இரட்டை ஆண் குழந்தைகளான அவர்களுக்கு உயிர்-உலக் எனப் பெயரிட்டு வளர்த்து வருகின்றனர். நயன்தாரா அவ்வப்போது தங்களது மகன்களுடன் செலவிடும் நேரத்தை எல்லாம் புகைப்படங்களாகவும் வீடியோக்களாகவும் பதிவிட்டு தங்களது மகிழ்ச்சியான தருணங்களை சமூக வலைத்தளங்களில் பதிவிடுவார் என்பது குறிப்பிடத்தக்கது.

இந்த சூழ்நிலையில் தற்போது 'Nayanthara: Beyond the Fairy Tale' என்ற ஆவணப்படத்தின் ட்ரைலர் இன்று வெளியாகி அனைவரின் பார்வையையும் ஈர்த்துள்ளது. அதில், லேடி சூப்பர் ஸ்டார், லேடி சூப்பர் ஸ்டார் என அரங்கம் அதிர குரல்கள் வர நயன்தாரா என்ட்ரி கொடுக்கிறார். அப்போது, 'இடி இடிக்குது மின்னல் முழங்குது அவ பேரக் கேட்டா' என்ற பின்னணி பாடலோடு வீடியோ வெளியாகியுள்ளது......