நீங்கள் ஆவலுடன் எதிர்பார்த்த ‘Bigg Boss season 9’ ஆரம்பமாகிறது... எப்போ தெரியுமா?

விஜய் டிவியில் வரும் ரியாலிட்டி ஷோக்களை பார்ப்பதற்கு அதிகளவு ரசிகர்கள் பட்டாளமே உள்ளது. சன், கலர்ஸ், Zee டிவிகளுடன் ஒப்பிடும் போது விஜய் டிவி எப்போது புதுப்புது ரியாலிட்டி ஷோக்களை அறிமுகப்படுத்தும். பிக்பாஸ் தமிழ் இது வெறும் ரியாலிட்டி ஷோ மட்டும் கிடையாது, மனித உணர்வுகளை வைத்து விளையாடும் ஒரு பெரிய விளையாட்டு. இந்த வகையில் விஜய் டிவியில் ஒளிபரப்பாகும் 100 நாட்கள் நடக்கும் பிக்பாஸ் ஷோ எப்போது தொடங்கும் என்று ரசிகர்கள் ஆர்வத்துடன் எதிர்பார்த்து காத்திருப்பார்கள். 8 சீசன் முடிவடைந்த நிலையில் இந்த நிகழ்ச்சி ஒவ்வொரு சீசன் ஒளிபரப்பாகும் போதும், தொடர்ந்து பார்வையாளர்களிடம் பெரும் வரவேற்பைப் பெற்றுவருகிறது.

ஆங்கிலத்தில் ஒளிபரப்பாகி வரும் பிக் பிரதர் என்கிற நிகழ்ச்சியைதான், இந்தியாவில் பிக் பாஸ் என்கிற பெயரில் பல மொழிகளில் நடத்தி வருகின்றனர். அந்த வகையில் கடந்த 2017 முதல் விஜய் டிவியில் ஒளிபரப்பாகி வரும் தமிழ் பிக் பாஸ் முதல் சீசன் தொடங்கியதில் இருந்து ஏழாவது சீசன் வரை கமல்ஹாசன் தொகுத்து வழங்கிய நிலையில், கடந்தாண்டு நடந்த 8-வது சீசனை நடிகர் விஜய் சேதுபதி தொகுத்து வழங்கினார்.

விஜய் சேதுபதி இந்த நிகழ்ச்சிக்கு சரிபட்டு வரமாட்டார் என்று அனைவரும் எதிர்பார்த்த நிலையில், நிகழ்ச்சி ஆரம்பித்த நாளில் இருந்து போட்டியாளர்களிடம் எதையும் சுற்றி வளைத்து பேசாமல் தவறு என்று பட்டதை முகத்திற்கு நேராக அடித்து பேசி ரசிகர்கள் மனதில் இடம் பிடித்தாலும், கடந்த சீசன் டி.ஆர்.பியில் பெரிய அடி வாங்கியதாக கூறப்படுகிறது.

இந்தி, மலையாளம், கன்னடம், தெலுங்கு என பல மொழிகளில் பிக் பாஸ் நிகழ்ச்சி வெற்றி பெற்றுள்ள நிலையில், இந்தியில் சல்மான் கானும், மலையாளத்தில் மோகன் லாலும், கன்னடத்தில் சுதீப்பும், தெலுங்கில் நாகார்ஜுனாவும் தொகுத்து வழங்கி வருகின்றனர்.

வியக்க வைக்கும் பிரம்மாண்ட வீட்டில் 100 நாட்கள், 15க்கும் மேற்பட்ட போட்டியாளர்கள், வித்தியாசமான டாஸ்க்குகள், சண்டைகள், கலவரங்கள், மாஸான தொகுப்பாளர் என பிரம்மாண்டமாக நடைபெறும் இந்த ஷோவில் தினம் தினம் சுவாரஸ்யத்திற்கு பஞ்சம் இருக்காது.

நிகழ்ச்சி நடக்கும் 100 நாட்களும் இந்த நிகழ்ச்சியில் கலந்து கொள்ளும் போட்டியாளர்கள் வெளி உலக தொடர்பிலிருந்து முழுவதுமாக தனிமைப்படுத்தப்பட்டு, கொடுக்கப்படும் பணிகளையும், டாஸ்க்குகளையும் சிறப்பாக நிறைவேற்றும் ஒருவரே, மக்கள் கொடுக்கும் வாக்குகளின் ஆதரவுடன், பிக்பாஸ் பட்டத்தையும் ரூ.50 லட்சம் பரிசுத் தொகையையும் வென்று வெளியில் வருவார்.

கடந்தாண்டு நடைபெற்ற பிக்பாஸ் 8-வது சீசனில் முத்துக்குமாரன் டைட்டிலை வென்றார். இரண்டாவது இடத்தை சௌந்தர்யாவும், விஷால், பவித்ரா இருவரும் மூன்றாவது இடங்களை பிடித்தனர்.

பிக்பாஸ் சீசன் 9 எப்போது தொடங்கும் என்று ரசிகர்கள் எதிர்பார்த்து காத்திருந்த நிலையில், இந்த நிகழ்ச்சி எப்போது ஆரம்பமாக உள்ளது என்பது குறித்தும் இம்முறை பிக்பாஸ் நிகழ்ச்சியில் செய்யப்பட்டுள்ள பல அதிரடியான மாற்றங்கள் குறித்தும் பேசிய ஜியோ ஹாட்ஸ்டார் தலைமை நிர்வாகி கிருஷ்ணன் குட்டி,

இம்முறை இந்த நிகழ்ச்சியை பார்க்கும் பார்வையாளர்களுக்கு சுவாரஸ்யத்திற்கு பஞ்சம் இருக்காது என்று கூறினார். மேலும் இந்த சீசனை பிரவீன் மற்றும் அர்ஜுன் ஆகியோர் இயக்க இருப்பதாக கூறினார்.

இம்முறை பிக்பாஸ் 9 சீசனில் சமூக ஊடக பிரபலங்களும் இதில் போட்டியாளர்களாக கலந்து கொள்ள உள்ளதாகவும், ஹாட்ஸ்டாரில் பிக்பாஸ் நிகழ்ச்சியைப் பார்க்கும் பார்வையாளர்கள், போட்டியாளர்கள் குறித்த தங்களது கருத்துக்களை நேரடியாக பதிவு செய்யும் வகையில் வசதியும் செய்யப்பட்டுள்ளதாக அவர் கூறினார்.

இந்த முறையும் விஜய் சேதுபதி தான் பிக் பாஸ் 9 சீசனை தொகுத்து வழங்க உள்ளதாகவும், அக்டோபர் மாதத்தின் முதல் வாரத்தில் பிக்பாஸ் 9-வது சீசன் ஆரம்பமாகும் என்றும் அவர் அதிகாரப்பூர்வமாக அறிவித்தார்.

இனிவரும் நாட்களில் இதில் கலந்து கொள்ள உள்ள போட்டியாளர்கள் குறித்த தகவல்கள் படிப்படியாக வெளியாகும் என எதிர்பார்க்கப்படுகிறது. தாங்கள் ஆவலுடன் எதிர்பார்த்த பிக்பாஸ் சீசன் 9 குறித்த அதிகாரப்பூர்வமான தகவலுடன், மாஸ்ஸான தொகுப்பாளர், புதிய போட்டியாளர்கள், அதிரடி மாற்றங்கள், வித்தியாசமான டாஸ்க்குகள் என பிக்பாஸ் 9 சீசன் புதிய பொலிவுடன் வரவுள்ளதால் ரசிகர்கள் சந்தோஷத்தில் உள்ளனர்.