இன்னும் 100 ஜென்மங்கள் எடுத்தாலும் நடிகனாகவே இருப்பேன் - ரஜினியின் உணர்ச்சிகரமான பேச்சு..!

கோவாவில் நடைபெற்று வந்த 56வது ஆண்டு, இந்திய சர்வதேச திரைப்பட விழா (IFFI) வெள்ளிக்கிழமை (நேற்று) அன்று நிறைவு பெற்றது. இந்த நிறைவு விழாவில் கோலிவுட் சூப்பர் ஸ்டார் ரஜினிகாந்த் அவர்களுக்கு வாழ்நாள் சாதனையாளர் விருது வழங்கி கவுரவிக்கப்பட்டது. 1975 ஆம் ஆண்டு கே.பாலசந்தர் இயக்கிய  ' அபூர்வ ராகங்கள் ' திரைப்படத்தின் மூலம் ரஜினிகாந்த் திரைக்கு அறிமுகமானார். இந்திய சினிமாவில் ரஜினிகாந்தின் 50 ஆண்டு கால திரைப்பயணத்தை பெருமைப் படுத்தும் விதத்தில் அவருக்கு இந்த சாதனையாளர் விருது வழங்கப்பட்டது. 

தமிழ் சினிமாவின் முன்னணி நடிகராக பொன் விழா ஆண்டைக் கொண்டாடிய ரஜினி காந்த் , இன்று வரையிலும் தமிழ் சினிமாவில் பெரிய மார்க்கெட் உள்ள நடிகர்களில் முதலிடத்தில் உள்ளார். நீண்ட கால அவரது திரைப்பயணத்தில் எந்த ஒரு பெரிய இறக்கமும் இன்றி அதே சூப்பர் ஸ்டார் அந்தஸ்தில் நீடிக்கிறார். இது வரை 172 திரைப்படங்களில் நடித்துள்ள அவர் , ஏராளமான பிளாக்பஸ்டர் ஹிட் படங்களையும் கொடுத்துள்ளார். 

தமிழ் மட்டுமல்லாமல் தெலுங்கு , மலையாளம் , ஹிந்தி , பெங்காலி , கன்னடம் , இங்கிலீஷ் உள்ளிட்ட 7 மொழிகளில் நடித்துள்ள ஒரே தென்னிந்திய நடிகராகவும் உள்ளார். ரஜினிகாந்தின் முத்து திரைப்படம் ஜப்பானிலும் , சந்திரமுகி திரைப்படம் தென் ஆப்பிரிக்காவிலும் பிளாக் பாஸ்டர் ஹிட்டாகி சாதனை படைத்துள்ளது. மேலும் ரஜினியின் பல திரைப்படங்கள் தேசிய அளவில் வெற்றியைப் பெற்றவை.

இந்த நிலையில் நேற்று விருது பெற்ற ரஜினி காந்த் மேடையில் மிகவும் உணர்ச்சிகரமாக பேசினார். இது திரைத் துறையில் அவர் வைத்துள்ள ஆழமான அன்பையும் விசுவாசத்தையும் வெளிப்படுத்துவதாக இருந்துள்ளது. மேடையில் பேசிய ரஜினி காந்த் " நான் திரையுலகிற்கு மிகுந்த பணிவுடனும் நன்றியுடனும் இருக்கிறேன். எனது  50 ஆண்டுகால திரையுலக பணிக்காக , என்னை பாராட்டி , கௌரவித்ததற்காக மத்திய அரசுக்கு எனது மனமார்ந்த நன்றியைத் தெரிவித்துக் கொள்கிறேன்.

இப்போது நான் திரும்பிப் பார்த்தால், நான் சினிமாவில் 10 முதல் 15 ஆண்டுகள் மட்டுமே பணியாற்றியது போல தெரிகிறது. நீண்ட வருட அனுபவம் இருந்தும் எனக்கு வருடங்கள் குறைவாக தெரிகிறது , ஏனென்றால் நான் சினிமாவையும் நடிப்பையும் விரும்புகிறேன். நான் 100 ஜென்மங்கள் எடுத்தாலும் ஒவ்வொரு முறையும் , ரஜினிகாந்தைப் போல ஒரு நடிகராகப் பிறக்க விரும்புகிறேன். என் மீது மக்கள் வைத்துள்ள அன்பு மற்றும் பாசத்திற்கு நன்றி," என்று ரஜினி காந்த் கூறினார்.

இந்த விழாவில் சூப்பர் ஸ்டார் ரஜினிகாந்திற்கு , கோவா மாநில முதல்வர் பிரமோத் சாவந்த் நினைவுப் பரிசு வழங்கி கௌரவித்தார். இந்த விழாவில் ரஜினிகாந்த் தனது குடும்பத்தினருடன் கலந்து கொண்டார்.சர்வதேச திரைப்பட நிறைவு விழாவில் இந்தியாவின் பாரம்பரிய கலை நிகழ்ச்சிகள் நடைபெற்றது. இதில் எஸ்.டி. பர்மன், ஆர்.டி. பர்மன், ஜுபீன் கார்க் மற்றும் பாப்போன் போன்ற இசைக் கலைஞர்களின் பங்களிப்பு பெருமைப் படுத்தப்பட்டது. 

இந்த விழாவில், மறைந்த கலைஞர்களுக்கு ஆடியோ-விஷுவல் நினைவு அஞ்சலி செலுத்தப்பட்டது. இதில் தர்மேந்திரா, காமினி கௌஷல், சுலக்ஷனா பண்டிட், சதீஷ் ஷா, பியூஷ் பாண்டே, ஜுபீன் கார்க் மற்றும் ஷியாம் பெனகல் ஆகியோர் பற்றி காட்சிப்படுத்தப்பட்டது.