3 Idiots Part 2 வருகிறதா? கரீனா கபூர் காட்டம்!

ராஜ்குமார் ஹிரானி இயக்கத்தில் 2009இல் திரைக்கு வந்த ‘த்ரீ இடியட்ஸ்’ படத்தில் அமீர்கான், மாதவன், ஷர்மான் ஜோஷி, கரினா கபூர் நடித்திருந்தனர். மிகப் பெரிய வெற்றி பெற்று, வசூலில் சாதனை படைத்திருந்தது. இதே படம் தமிழில் ‘நண்பன்’ என்கிற பெயரில் ரீமேக் செய்யப்பட்டது.

இப்படத்தின் 2 ஆம் பாகம் இந்தியில் உருவாக்கப் படுவதாக தகவல் வெளியாகியிருக்கிறது. அமீர்கான், மாதவன், ஷர்மான் ஜோஷி இதற்காக ரகசியத் திட்டம் தீட்டியுள்ளதாகவும், அதில் தன்னைச் சேர்க்கவில்லை என்றும் கரீனா கபூர் இன்ஸ்டாகிராமில் வீடியோ வெளியிட்டு குற்றம் சாட்டியுள்ளார். என்னிடமிருந்து இதை மறைக்கிறார்கள். 2ஆம் பாகம் த்ரீ இடியட்ஸ்  நான் இல்லாமல் நடக்காது. தீவிரமாக விசாரிக்க வேண்டும் என்று சொல்லி அதில் நடித்த பொம்மன் இரானியை Tag செய்துள்ளார். அவரும் இதற்கு பதிலளிக்கும் விதமாக ஒரு வீடியோவை வெளியிட்டுள்ளார். கரீனா கபூரின் வீடியோவில், அமீர்கான், மாதவன், ஷர்மான் ஜோஷி மூவரும் சிகப்பு கலர் டீ ஷர்ட் அணிந்து அமர்ந்திருக்க பின்னால் ‘இடியட்ஸ்’ என்ற வார்த்தை இடம் பெற்றுள்ளது.

காமெடிக்காக கரீனா கபூர் இந்த வீடியோவை பதிவு செய்திருந்தாலும், 3 இடியட்ஸ் – 2 விரைவில் உருவாகும் என்று நெட்டிசன்கள் கமெண்ட் வெளியிட்டுள்ளனர்.

KD – The Devil (Kingdom) கன்னடப் படத்தில் ஷில்பாஷெட்டி

இயக்குநர் ப்ரேம் இயக்கத்தில் துருவா சர்ஜா நடித்துள்ள கன்னடத் திரைப்படம் KD – The Devil ஆகும். காளி என்ற கதாபாத்திரத்தில் துருவா நடிக்கும் படத்தை கே.வி.என்.புரொடக்ஷன் தயாரித்துள்ளது. KD – The Devil 1970களில் பெங்களூரில் நடந்த உண்மைச் சம்பவங்களை அடிப்படையாகக் கொண்டு உருவாகியுள்ளது. இதில் பிரபலமான முன்னணி நட்சத்திரங்கள் இணைந்து நடித்துள்ளது. ரசிகர்களிடையே பெரும் ஆர்வத்தை ஏற்படுத்தியுள்ளது.

கர்நாடக மாநிலத்தைச் சேர்ந்த பாலிவுட் நடிகை ஷில்பா ஷெட்டி குந்த்ரா, சுமார் 18ஆண்டுகளுக்குப் பிறகு இந்தக் கன்னடப் படத்தில் சத்யவதி எனும் கதாபாத்திரத்தில் நடிக்கவிருக்கிறார். இது குறித்து “ராஜ்யங்களுக்கிடையே நடக்கும் ஒரு மாபெரும் போரைப் பற்றிய கதை இது. ஒவ்வொரு ராஜ்யத்துக்கும் ஒரு சத்தியவதி தேவை. இந்த KD – The Devilயில் நானும் ஒரு அதிசக்தி வாய்ந்த கதாபாத்திரத்தில் நடிப்பது பெரும் மகிழ்ச்சியாக உள்ளது” என ஷில்பா கூறியுள்ளார்.

சூரரைப் போற்று! (இந்தி ரீமேக்)

கதா கொங்கரா இயக்கத்தில் சூர்யா நடிப்பில் கடந்த 2020 ஆண்டு வெளியாகி ரசிகர்களிடையே மாபெரும் வரவேற்பைப் பெற்ற படம் ‘சூரரைப் போற்று.’ கொரோனா முடக்கம் காரணமாக இந்தப் படம் திரையரங்கில் வெளியாகாமல் நேரடியாக OTTயில் வெளியானது.

இப்படத்தின் வெற்றியைத் தொடர்ந்த இயக்குநர் கதா கொங்கரா இப்படத்தை இந்தியில் ரீமேக் செய்து வருகிறார். முதன்மை கதாபாத்திரத்தில் அக் ஷய் குமார் நடிக்கிறார். ராதிகா மதன், பரேஷ் ராவல் உள்ளிட்ட பலர் நடிக்கின்றனர்.

சூர்யா – ஜோதிகாவின் 2 டி என்டர்டெயின்மெண்ட் நிறுவனம் தயாரிக்கும் இப்படத்துக்கு ஜி.வி. பிரகாஷ் இசையமைக்கிறார். படத்தில் நடிகர் சூர்யா சிறப்புத் தோற்றத்தில் நடிக்கிறார்.

இந்தியில் தலைப்பிடப்படாத இப்படம் செப்டெம்பர் 1ஆம் தேதி திரையரங்குகளில் வெளியாகுமென அறிவிக்கப் பட்டுள்ளது.

டாப்ஸியின் படங்களைப் புறக்கணிக்க முயற்சி!

நடிகை டாப்ஸி, இந்திப் படங்களில் இப்போது அதிக கவனம் செலுத்திவருகிறார். சமீபத்தில் நடைபெற்ற ஃபேஷன் நிகழ்ச்சி ஒன்றில் டாப்ஸி கவர்ச்சியான ஆடை அணிந்து, கழுத்தில் மகாலெட்சுமி உருவத்துடன் கூடிய நெக்லஸ் அணிந்திருந்தார்.

இந்துக் கடவுள் உருவம் பொறித்த நெக்லஸை கவர்ச்சி ஆடையுடன் எப்படி அணியலாம்? என சமூக வலைத் தளங்களில் பலர் கடுமையாக விமரிசித்துள்ளனர். டாப்ஸியின் படங்களைப் புறக்கணிக்க வேண்டுமென கோரிக்கை எழுந்துள்ள காரணத்தால், டாப்ஸிக்கு சிக்கல் ஏற்பட்டுள்ளது. ஆனால், அதேசமயம், இந்த விஷயத்துக் காக மன்னிப்பெல்லாம் கேட்க முடியாதெனக் கூறியுள்ளார் டாப்ஸி!

(‘அவரவர் விருப்பத்தைத் தடை செய்ய இயலாது!’)