விமர்சனம்: ஒண்டிமுனியும் நல்லபாடனும் - கொங்கு மண்ணின் யதார்த்த பதிவு!

காக்கா முட்டை, கூழாங்கல் என மண்ணின் யதார்த்தத்தை சொல்லும் படங்கள் தமிழ் சினிமாவில் சில சமயங்களில் வெளிவந்து நம்மை திரும்பி பார்க்க வைக்கிறது. இந்த வரிசையில் இந்த வாரம் ஒண்டிமுனியும் நல்லபாடனும் என்ற படம் வெளிவந்துள்ளது. இந்த படத்தை சுகவனம் இயக்கி உள்ளார். கே.கருப்பசாமி இப்படத்தை தயாரித்துள்ளார்.

கோபிசெட்டிபாளையம் பகுதியில் ஒரு ஒரு சிறிய கிராமம். அங்கே நல்ல பாடன் விவசாய கூலியாக வாழ்ந்து வருகிறார். சிறுவனாக இருக்கும் அவரது மகன் கிணற்றில் தவறி விழுகிறான். பலர் சேர்ந்து கிணற்றில் இறங்கி சிறுவனை தூக்குகிறார்கள். சிறுவன் கண் விழிக்கவில்லை. நல்ல பாடன் அங்கே உள்ள சிறு கிடாயை கையில் தூக்கி "ஒண்டிமுனி தெய்வமே, என் மகனை காப்பாற்று, இந்த கிடாயை உனக்கு காணிக்கை யாக்குகிறேன்" என வேண்டுகிறார். உடனே மகன் கண் முழிக்கிறான். நல்ல பாடன் தனது வேண்டுதலை நிறைவேற்றுதலில் ஒரு சிக்கல் இருக்கிறது.

அந்த ஊரில் இருக்கும் இரண்டு பன்னாடிகள் (கொங்கு பகுதியில் பண்ணையார்களை இப்படித்தான் அழைப்பார்கள்) தங்களின் ஈகோ பிரச்னையால் ஒண்டிமுனி கோவிலை திறக்க மறுக்கிறார்கள். இந்த கிடாவை காப்பாற்ற பெரும் பாடுபடுகிறார் நல்ல பாடன். சில வருடங்கள் கழித்து இரண்டு பண்ணாடிகளையும் பேசி சமாதானப்படுத்தி ஒண்டிமுனி கோவிலை திறந்து கிடா வெட்டுக்கு தயார் செய்கிறார். அந்த நாளில் ஒரு மிகப்பெரிய பிரச்சனை வெடிக்கிறது. அது என்ன பிரச்சனை? கிடா வெட்டு நடந்ததா? என்று சொல்கிறது ஒண்டிமுனியும் நல்லபாடனும்.

எந்த வித சினிமாத்தனமான பூச்சுக்களும், மிகை படுத்தலும் இல்லாமல் மிக யதார்த்தமாக ஒரு படத்தை தந்ததற்க்காக படத்தின் டைரக்டர் சுக வனத்திற்கு ஒரு சபாஷ் போடலாம். கோவை, ஈரோடு என்றாலே எப்போதும் பசுமையான வயல் வெளிகள், சிறுவாணி மட்டுமல்ல இந்த பகுதியில் வானம் பார்த்த வறண்ட பகுதிகளும் இருக்கின்றன என காட்டியுள்ளார் டைரக்டர்.

கிடா வெட்டு என்ற ஒற்றை அம்சத்தில் ஜாதி பாகுபாடு, பண்ணை அடிமை முறை, கிராமத்து பொருளாதாரம், காதல் என பல விஷ்யங்கள் சொல்லப்பட்டிருக்கிறது. ஜாதிய ஏற்ற தாழ்வு என்பது நில உடமை சமுதாயத்தின் ஒரு அங்கம் என்பதையும், நிலத்திற்கும் ஜாதிக்கும் இடையேயான உறவையும் இந்த படம் சொல்கிறது.

யதாரத்ததோடு சேர்த்து கிடா வெட்டு நடக்குமா? என்ற பரபரப்பு த்ரில்லர் அனுபவமும் நமக்கு கிடைக்கிறது. Parotta Murugesan - Ondimuniyum Nallapaadanum Movie

நல்ல பாடனாக நடித்த நடித்த 'பரோட்டா' முருகேசன் நடிப்பில் உழைத்து தேய்ந்த ஒரு மனிதன் வாழ்க்கையை கண் முன் கொண்டு வந்து விடுகிறார். சிறு சிறு வேடங்களில் நடித்து வந்த முருகேசனுக்குள் இருக்கும் ஒரு சிறந்த நடிகனை இந்த படம் அடையாளம் காட்டியுள்ளது. நிறைய விருதுகள் இவருக்கு காத்திருக்கிறது. பெரிய பன்னாடியாக வரும் கார்த்திகேசன், சின்ன பன்னாடியாக வரும் முருகன், இவரது மனைவியாக வருபவர் இந்த மூவரின் நடிப்பும், கொங்கு தமிழும் கோபிசெட்டிபாளையத்தில் வாழ்வது போல் ஒரு உணர்வை தருகிறது.

பண்ணையார்கள் அன்பாக பேசி வேலை வாங்குவது, கிடா விருந்து சாப்பிடும் ஆசையில் உறவுகள் ஒன்று கூடுவது, நிலத்தை இழந்தது பற்றிய உரையாடல்கள் என பல காட்சிகள் படத்தில் மிக ரசிக்கும் படியாக உள்ளது. நடராஜன் சங்கரின் இசை, சதிஷ் குரோசோவ் படத்தொகுப்பு, விமலின் ஒளிப்பதிவு இந்த மூன்றும் படத்தை உயர்த்தி காட்டுவதில் முக்கிய பங்காற்றி உள்ளன.

அதிகார போட்டியால் எளிய மக்களின் வாழ்க்கையில் சந்திக்கும் பிரச்சனைகள், சுரண்டல், வழிபாடு என பல விஷயங்களை சொன்ன இந்த ஒண்டிமுனியும் நல்லபாடனும் படத்திற்கு விருதுகள் காத்திருக்கின்றன. நாமும் இந்த படத்திற்கு ஆதரவு தருவோம்.