ஒரே ஒரு டேக்... உலக சாதனை! தமிழ் சினிமா படைத்த வினோத சாதனைகள்!

தமிழ் சினிமா தொழில்நுட்ப முன்னேற்றங்களோடு பல்வேறு சாதனைகளை நிகழ்த்தி வருகிறது. அந்த வகையில், உலக சினிமாவில் அரிதாகக் காணப்படும் பல புதுமையான முயற்சிகளை தமிழ் திரைப்படங்கள் வெற்றிகரமாக செய்து காட்டியுள்ளன. குறிப்பாக, 'சிங்கிள் ஷாட்' அல்லது 'ஒரே டேக்' முறையில் படம் எடுப்பது மிகப் பெரிய சவாலான செயல். இதில் ஒரு காட்சியோ அல்லது முழுப் படமோ ‘கட்’ இல்லாமல் ஒரே தொடர்ச்சியான ஷாட்டில் படமாக்கப்படும். ஒவ்வொரு நடிகரும், ஒளிப்பதிவாளரும், தொழில்நுட்பக் குழுவினரும் பிழையில்லாமல் ஒரே நேரத்தில் செயல்பட வேண்டும். அவ்வாறு, பல விதங்களில் சாதனைப் படைத்த திரைப்படங்களைப் பற்றி இந்தப் பதிவில் காணலாம்.

2014 ஆம் ஆண்டு வெளியான அகடம் திரைப்படம், தமிழ் சினிமாவின் வரலாற்றில் ஒரு முக்கிய இடத்தைப் பிடித்துள்ளது. இயக்குநர் இசாக் இயக்கிய இந்தப் படம், உலகின் மிக நீளமான 'அன்கட்' (Uncut) திரைப்படமாக கின்னஸ் உலக சாதனைப் படைத்தது. இந்தப் படம் சுமார் 2 மணி நேரம், 3 நிமிடங்கள் மற்றும் 30 நொடிகள் நீளத்தில், ஒரு வினாடி கூட ‘கட்’ செய்யாமல் ஒரே ஷாட்டில் படமாக்கப்பட்டது. இதற்கு முன்பு Russian Ark (96 நிமிடங்கள்) வைத்திருந்த சாதனையை இது முறியடித்தது என்பது குறிப்பிடத்தக்கது. ஒரு ஹாரர் த்ரில்லர் கதையை இத்தகைய முறையில் உருவாக்குவது மிகுந்த சவால் கொண்டது. ஒவ்வொரு காட்சியும் சரியாக அமைய, படக்குழு பல மாதங்கள் தீவிரமாக ஒத்திகை செய்தது. சிறிய தவறு நடந்தால் முழுப் படத்தையும் ஆரம்பத்திலிருந்து மீண்டும் எடுக்க வேண்டியிருந்தது.

இயக்குநரும் நடிகருமான ஆர். பார்த்திபன் இயக்கிய 'இரவின் நிழல்' (2022) திரைப்படம் உலக சினிமாவில் புதிய பரிமாணத்தை உருவாக்கியது. இந்தப் படம் உலகின் முதல் 'நான்-லீனியர்' (Non-linear) சிங்கிள் ஷாட் திரைப்படமாகக் கருதப்படுகிறது. பொதுவாக சிங்கிள் ஷாட் படங்கள் நேர்கோட்டுக் கதையமைப்பில் (Linear narrative) நகரும். ஆனால், இந்தப் படம் கதாநாயகனின் வாழ்க்கையின் பல கால கட்டங்களை முன்பும் பின்னுமாக ஒரே ஷாட்டில் சித்தரிக்கிறது. இது தொழில்நுட்ப ரீதியாகவும் கதை சொல்லும் முறையிலும் மிகப் பெரிய சவாலான ஒன்று. சுமார் 90 நாட்கள் ஒத்திகை, 75 ஏக்கர் பரப்பளவில் அமைக்கப்பட்ட செட்டுகள், நூற்றுக்கணக்கான நடிகர்கள் ஆகியவற்றின் ஒருங்கிணைப்பால் இந்த முயற்சி வெற்றிகரமாக முடிந்தது.

1999 ஆம் ஆண்டு வெளியான 'சுயம்வரம்' திரைப்படம் வேகத்தில் சாதனை படைத்த ஒன்று. இந்தப் படம் சுமார் 23 மணி நேரம் 58 நிமிடங்களில் முழுமையாக படமாக்கப்பட்டு, பின்னணி பணிகளும் முடிக்கப்பட்டதாகக் கூறப்படுகிறது. 14 இயக்குநர்கள், 19 ஒளிப்பதிவாளர்கள் மற்றும் பல முன்னணி நடிகர்கள் இணைந்து இந்தப் படத்தை உருவாக்கினர். சத்யராஜ், பிரபு, அப்பாஸ் உள்ளிட்ட பலர் நடித்த இந்தப் படம், 'மிக வேகமாக தயாரிக்கப்பட்ட முழுநீள திரைப்படம்' என்ற சாதனையைப் பெற்றதாக அறியப்படுகிறது. இது தமிழ் சினிமாவின் ஒற்றுமை மற்றும் திட்டமிடல் திறனுக்கான ஒரு சிறந்த உதாரணமாகும்.

இன்றைய நவீன காலத்தில், முழுப் படத்தை சிங்கிள் ஷாட்டில் எடுப்பதற்குப் பதிலாக, குறிப்பிட்ட காட்சிகளை மிக நீளமான ஒரே ஷாட்டில் படமாக்கும் முயற்சிகள் அதிகரித்துள்ளன. இயக்குநர் வெற்றிமாறன் இயக்கிய விடுதலை பாகம் 1 திரைப்படத்தின் ஆரம்பத்தில் வரும் ரயில் விபத்து காட்சி நீளமான, தொடர்ச்சியான ஷாட்டாக வடிவமைக்கப்பட்டுள்ளது. தமிழ் சினிமா, கதை சொல்லும் திறமையிலும், தொழில்நுட்ப சாதனைகளிலும் உலக அளவில் தன்னுடைய தனித்துவத்தை நிரூபித்து வருகிறது. எதிர்காலத்திலும் மேலும் புதுமையான முயற்சிகள் தமிழ் சினிமாவிலிருந்து உருவாகும் என்பதில் எந்த சந்தேகமும் இல்லை.