இன்றைய சினிமா சவால்: டாப் நடிகர்களே பயப்படும் ஒரு எதிரி!

ஒரு காலத்தில் சினிமா விமர்சனங்கள் செய்தித்தாள்களிலும் வார இதழ்களிலும் மட்டுமே வெளியாகும். அதற்குள் அனைவரும் போட்டிப்போட்டு கொண்டு திரையரங்குகளுக்கு சென்று படத்தைப் பார்த்துவிடுவர். ஆனால் இப்போது முதல் ஷோ ஒளிபரப்பாகும்போது லைவ் ரிவ்யூ செய்து சமூக வலைதளங்களில் பதிவிட்டுவிடுகின்றனர். இதனால் படம் ஹிட்டா? இல்லை ஃப்ளாப்பா? என்பதை ரிவுயூக்கள் தான் முடிவு செய்கின்றன.

இதுமட்டுமின்றி, பல நடிகர்கள் ரிலீஸுக்கு முன்னரே படத்தைப் பார்த்துவிட்டு படம் நன்றாக இருக்கிறது உடனே பார்த்துவிடுங்கள் என்றெல்லாம் கூறிவிடுகிறார்கள். மேலும் ப்ரோமோஷன் வேலைகளும் சிறப்பாக நடக்கின்றன. இதனால் ஒரு படத்தின் ரிலீஸுக்கு முன்னரும் பின்னரும் நடக்கும் இந்த விஷயங்கள், படத்திற்கு எவ்வளவு தாக்கத்தை ஏற்படுத்துகின்றன என்று பார்ப்போமா?

வெளியீட்டுக்கு முன்: (The Pre-Release Hype)

சமூக ஊடகங்கள் ஒரு படத்தின் மீது ஒரு ஆணித்தரமான எதிர்பார்ப்பை விதைக்கும் பணியை வெளியீட்டுக்கு முன்பே தொடங்கிவிடுகின்றன.

படத்தின் போஸ்டர், டீசர், டிரைலர் வெளியாகும்போதே, ரசிகர்களின் கணிப்பு கருத்துகள் உடனடியாகப் பரவி விடுகின்றன. ஒரு சில விநாடிகளில் மில்லியன் கணக்கான பார்வைகளையும், ஆயிரக்கணக்கான பகிர்தல்களையும் பெற்று, படம் ட்ரெண்டாகிவிடுகிறது. இந்த ஆரம்ப விமர்சனங்கள், படத்தின் மீதான பொதுவான மனநிலையை உருவாக்குகிறது.

சில சமயங்களில், படம் குறித்து எந்தத் தகவலும் இல்லாமலேயே, போலி ஐடிகளும், ரசிகர் மன்றங்களும் மிகைப்படுத்தப்பட்ட நேர்மறை விமர்சனங்களைப் பரப்புகின்றன. இது தயாரிப்பு நிறுவனங்களுக்குப் பயன் அளித்தாலும், சில சமயங்களில் அதிகப்படியான எதிர்பார்ப்பை ஏற்படுத்தி, படம் வெளியான பிறகு ஏமாற்றத்தை உண்டாக்கலாம்.

நடிகர், நடிகைகள், இயக்குநர்கள் எனப் பலரும் தாங்கள் நடிக்கும் அல்லது இயக்கும் படம் குறித்து வெளியிடும் ஒரே ஒரு பதிவு, ரசிகர்களால் விவாதிக்கப்பட்டு, பல வாரங்களுக்குத் தலைப்புச் செய்தியாகிறது.

உடனடி விமர்சனம்

திரையரங்கில் முதல் காட்சி முடிந்த உடனேயே சமூக ஊடகங்கள் ஒரு படத்திற்கான உடனடி விமர்சனத்தை வழங்கிவிடுகின்றன. இதை 'உடனடி எதிர்வினை' என்று கூட குறிப்பிடலாம்.

FDFS (First Day First Show) விமர்சனங்கள்: படம் பார்த்த முதல் நபர்கள் தங்கள் செல்போன்களில் இருந்து வெளியிடும் ரியாக்‌ஷன் வீடியோக்கள், ட்விட்டர் அல்லது ஃபேஸ்புக் பதிவுகள், படத்தின் விமர்சனப் போக்கைத் தீர்மானிக்கின்றன. இதில் எந்தத் தணிக்கையும் இல்லாததால், மக்களின் , உண்மையான மனநிலையை வெளிப்படுத்துகிறது.

ஒரு காலத்தில் மக்கள் பத்து பேரிடம் சொல்வார்கள். இப்போது ஒரு ரசிகர் தனது ட்விட்டர் மூலம் ஆயிரக்கணக்கான நபர்களுக்கு உடனடியாகத் தன் கருத்தைச் சொல்லிவிடுகிறார். ஒரு படத்தை 'பார்க்க வேண்டிய படம்' அல்லது 'தவிர்க்க வேண்டிய படம்' என்று சில மணி நேரங்களிலேயே முடிவெடுக்கப்படுகிறது .

சில சமயங்களில், ரசிகர் மன்றங்கள் அல்லது போட்டி ரசிகர்கள் ஒரு படத்தைப் பழிவாங்கும் நோக்குடன் எதிர்மறை விமர்சனங்களைப் பரப்புகின்றனர். இது படத்தின் ஆரம்பக்கட்ட வசூலை நேரடியாகப் பாதிக்கலாம். அத்துடன் ஒரு நல்ல படத்தினை ஓடவிடாமல் தடுக்கிறது.

வெளியீட்டுக்குப் பின்:

படம் வெளியாகி ஒரு வாரம் அல்லது அதற்குப் பிறகு சமூக ஊடக விமர்சனங்கள் படத்தின் லாபத்தைப் பாதிக்கின்றன.

முதல் நாள் விமர்சனங்கள் அவசரமாக இருக்கும். ஆனால், இரண்டாவது, மூன்றாவது நாட்களில் வரும் ஆழமான விமர்சனங்கள் படத்தின் கதை, திரைக்கதை மற்றும் தொழில் நுட்பத் தரம் குறித்து நியாயமான மதிப்பீட்டை வழங்குகின்றன. இந்த ஆழமான விமர்சனங்கள் தான் குடும்பப் பார்வையாளர்கள் போன்றவர்களைத் திரையரங்குகளுக்கு வரத் தூண்டுகின்றன.

ஒரு படத்தின் தோல்வி அல்லது அதில் உள்ள குறைபாடுகள் குறித்த மீம்ஸ்கள் மற்றும் ட்ரால்ஸ்கள், அதன் வீழ்ச்சியை மேலும் உறுதிசெய்கின்றன. மீம்ஸ்கள் மூலம் நகைச்சுவையாகக் கடத்தப்படும் எதிர்மறைச் செய்திகள், படத்தின் முக்கியத்துவத்தையே பாதிக்கிறது.

ஓடிடி (OTT) முடிவு: திரையரங்குகளில் ஒரு படம் பெற்ற விமர்சனங்கள், அது ஓடிடி தளங்களுக்கு விற்கப்படும் விலையையும், டிஜிட்டல் வெளியீட்டுத் தேதியையும் மறைமுகமாகத் தீர்மானிக்கின்றன. நல்ல விமர்சனங்களைப் பெற்ற படங்கள் ஓடிடியில் நீண்ட காலம் கழித்து அதிக விலைக்கு விற்கப்படுகின்றன.

இன்றைய சினிமா உலகில், சமூக ஊடக விமர்சனங்கள் ஒரு தவிர்க்க முடியாத, ஆனால் மிகவும் சக்திவாய்ந்த ஒரு விஷயமாக மாறிவிட்டது. அவை ஒரு படத்தின் ஆரம்ப வசூலை உயர்த்தவும் அதல பாதாளத்திற்குக் கொண்டு செல்லவும் தூண்டுகிறது. தயாரிப்பாளர்களும் இயக்குநர்களும் இந்த டிஜிட்டல் சத்தங்களுக்கு மத்தியில், தங்கள் படத்தின் உண்மையான மதிப்பை நிலைநிறுத்த வேண்டிய மிகப் பெரிய சவாலை எதிர்கொள்கின்றனர்.