'ஜௌஹர் விழா' - பெண்கள் கூட்டாகத் தீக்குளித்து உயிர் துறந்த கொடுமை..!

பெண்கள் கூட்டாகத் தீக்குளித்து உயிர் துறந்த ஜௌஹர் விழாவைப் பற்றித் தெரியுமா?

தில்லி சுல்தான் போன்றவர்கள் அதிக அளவிலான படைவீரர்களுடன், இராசபுத்திர மன்னர்களின் கோட்டைகளை முற்றுகையிட்டு மிகக் கடுமையாகத் தாக்கும் போது, போரில் தோற்கும் நிலை ஏற்படும் என்று தெரிய வரும் நிலையில், இராசபுத்திர மன்னர்களின் மனைவிகள் மற்றும் இராசபுத்திர குலப் பெண்கள், தில்லி சுல்தான் படைவீரர்களின் கையில் சிக்கிச் சீரழிவதைத் தடுக்கும் நோக்கில், பெரும் தீ வளர்த்து, அதில் கூட்டாகத் தீக்குளித்து உயிர் துறந்தனர். இந்தக் கூட்டுத் தீக்குளிப்பு நிகழ்வே ஜௌஹர் (Jauhar) விழா எனப்படுகிறது. இந்தக் கூட்டுத் தீக்குளிப்பு நிகழ்வை இராசபுத்திரப் பெண்கள் அன்று பெருமைக்குரியதாகக் கருதினார்கள்.

ஜௌ எனும் சமசுகிருதச் சொல்லிற்கு, ‘ஜீவன் அல்லது வாழ்க்கை’ என்றும், ஹர் எனும் சொல்லிற்கு, ‘தன்னைத்தானே மாய்த்துக் கொள்ளல்’ என்றும் பொருளாகும். இரவு வேளையில் கோட்டையினுள் நடக்கும் ஜௌஹர் விழாவின் போது, திருமணமான இராசபுத்திர குலப் பெண்கள், திருமண உடைகள் அணிந்து கொண்டு, தங்கள் குழந்தைகளுடன் கூட்டாகத் தீக்குளிப்பர்.

ஜௌஹர் விழா நடந்த அடுத்த நாள் காலையில், கோட்டையில் இருக்கும் இராசபுத்திரப் படைவீரர்கள் குளித்து விட்டு, குங்குமப்பூ நிறத்திலான செவ்வாடைகள் உடுத்திக் கொண்டு, கூட்டாகத் தீக்குளித்து இறந்த தங்கள் குல பெண்டிர் மற்றும் குழந்தைகளின் சாம்பலை நெற்றியில் இட்டு, துளசி இலைகளை மென்று கொண்டு, கைகளில் போர்க்கருவிகளை ஏந்தி, கோட்டைக் கதவைத் திறந்து கொண்டு வெளியேறி, ‘ஜெய் பவானி’ என வீர முழக்கம் எழுப்பியபடி, எதிரிகளை வெற்றி கொள்ளும் வரை வீரமாகப் போரிடுவர்; அல்லது தங்கள் உயிர் போகும் வரை போரிடுவர்.

இந்த ஜௌஹர் விழா எனும் கூட்டுத் தீக்குளிப்பு தொடர்பான ஆவணங்கள் வரலாற்று ஆசிரியர்களால் முழுமையாக ஆவணப்படுத்தப்படவில்லை. தில்லி சுல்தான்களின் ஆட்சிக் காலங்களில், குறிப்பாக அலாவுதீன் கில்ஜி மற்றும் துக்ளக் ஆட்சிக் காலங்களில், தற்கால இராஜஸ்தான் மற்றும் குஜராத்து பகுதிகளை ஆண்டு கொண்டிருந்த இராசபுத்திர குலப் பெண்களின் கூட்டுத் தீக்குளிப்புகள் நிகழ்வுகள் பல நடைபெற்றிருக்கின்றன.

கோரி முகமது போரில் தில்லியின் கடைசி இந்து மன்னரான பிரித்திவிராஜ சௌகானைக் கொன்ற செய்தி அறிந்த பட்டத்து ராணி சம்யுக்தா, இராச புத்திரப் பெண்களுடன் கூட்டாகத் தீக்குளித்து இறந்தார். 

மேவார் நாட்டின் சித்தோர்கார் கோட்டையில் 1303, 1528, 1568 ஆம் ஆண்டுகளில் மூன்று முறை கூட்டுத் தீக்குளிப்பு நிகழ்வுகள் நடந்திருக்கின்றன.

அலாவுதீன் கில்ஜி ஆட்சிக் காலத்திலும், துக்ளக் ஆட்சிக் காலத்திலும், ஜெய்சல்மேர் கோட்டையில் இரு கூட்டுத் தீக்குளிப்புகள் நடந்திருக்கின்றன. மற்றொரு கூட்டுத் தீக்குளிப்பு நிகழ்வு சந்தேரிக் கோட்டையில் நடந்திருக்கிறது.

1. தில்லி சுல்தான் அலாவுதீன் கில்ஜி, ஜெய்சல்மேர் கோட்டையை ஏழு மாத முற்றுகைக்குப் பின்னர் கைப்பற்றும் நிலையில், கோட்டைக்குள் இருந்த 24,000 இராசபுத்திர குலப் பெண்கள் பெரும் தீ வளர்த்து கூட்டாகத் தீக்குளித்து உயிர் துறந்திருக்கின்றனர். 

2. இராண சங்கா கண்வா போரில் மாண்ட பின்னர், மேவார் மற்றும் சித்தோர்கார் நாட்டுப் படைவீரர்கள், விதவையான இராணி கர்ணாவதியின் தலைமையில் ஒன்று திரண்டனர். குஜராத் சுல்தான் பகதூர் ஷா, சித்தூர் கோட்டையை கைப்பற்றியதால், இராணி கர்ணாவதியும், இராசபுத்திரப் பெண்களும் 1528 ஆம் ஆண்டு, மார்ச் 8 ஆம் நாளில் கூட்டாகத் தீக்குளித்து இறந்தனர். இராசபுத்திர ஆண்கள், பகதூர் ஷா படைகளுடன் உயிர் துறக்கும் வரை கொடூரமாகப் போரிட்டு மாண்டனர்.

3. அக்பர் 1567 ஆம் ஆண்டு செப்டம்பர் மாதம் முதல் சித்தூர் கோட்டையை முற்றுகையிட்டுப் பல மாதங்கள் போர் செய்தார். கடைசியாக, கோட்டையைப் பீரங்கிகளால் தாக்கி, 1568 ஆம் ஆண்டு பிப்ரவரி மாதம் 22 ஆம் நாளன்று கோட்டையைத் திறந்து உள்ளே நுழைந்தனர். அங்கு இராசபுத்திரப் பெண்கள் அனைவரும் கூட்டாகத் தீக்குளித்து இறந்து போனதை கண்டார். அப்போரில் இராசபுத்திர ஆண்கள், நெற்றியில் சாம்பலைப் பூசிக் கொண்டு, ஜெய் பவானி என வீர முழக்கம் இட்டவாறு, அக்பரின் படைகளுடன் இறக்கும் வரை போரிட்டதும் தெரிந்தது.  

இக்கூட்டுத் தீக்குளிப்பு நிகழ்வுகள் அபுல் பசல் எழுதிய அக்பர் நாமா எனும் நூலில் குறிப்பிடப்பட்டுள்ளது.