குல்தாரா: ஒரே இரவில் மறைந்த இந்தியாவின் 'பேய்க் கிராமம்' - ஒளிந்திருக்கும் திடுக்கிடும் உண்மைகள்!

ராஜஸ்தானின் பாலைவன மண்ணில் இன்று வெறிச்சோடிக் கிடக்கும் ஒரு கிராமம் குல்தாரா. இந்த கிராமத்தில் ஒரே இரவில் மக்கள் அனைவரும் காணாமல் போனார்கள் என்றால் நம்ப முடிகிறதா? இது இந்தியாவின் மிகப் புகழ்பெற்ற மர்ம இடங்களில் ஒன்றாக மாறியுள்ளது. உண்மையில் இங்கே என்ன நடந்தது? வாருங்கள் தெரிந்துகொள்ளலாம்.

குல்தாரா கிராமம் சுமார் 13ஆம் நூற்றாண்டில் பாலிவால் பிராமணர்களால் நிறுவப்பட்டதாகக் கூறப்படுகிறது. இவர்கள் நீர்ப்பாசனத்தில் வல்லவர்கள். பாலைவன மண்ணிலேயே கிணறுகள், சிறிய கால்வாய்கள் அமைத்து விவசாயம் செய்தனர். ஜெய்சல்மேர் அருகே இருந்த இந்த கிராமம் வணிக ரீதியாகவும் வளர்ச்சி பெற்றது. மொத்தம் இந்த கிராமத்தில் 80க்கும் மேற்பட்ட சிறு குடியிருப்புகள் இருந்ததாக ஆய்வாளர்கள் குறிப்பிடுகின்றனர்.

குல்தாரா 19ஆம் நூற்றாண்டின் ஆரம்பத்தில் திடீரென காலியாகிவிட்டது என்பது பொதுவாக பரவி வரும் கதை. இதற்கான காரணமாக ஒரு உள்ளூர் அரசரின் அமைச்சரான சலீம் சிங் அதிக வரி விதித்ததும், கிராமத் தலைவரின் மகளை திருமணம் செய்ய வற்புறுத்தியதுமாகக் கூறப்படுகிறது.

ஆனால் வரலாற்று ஆதாரங்கள் இதை முழுமையாக உறுதிப்படுத்தவில்லை. சில வரலாற்றாளர்கள், அந்த காலகட்டத்தில் ராஜஸ்தானில் கடுமையான வறட்சி, நீர்வள பற்றாக்குறை, வரிவிதிப்பு அதிகரிப்பு போன்ற காரணங்களால் பல கிராமங்கள் இயல்பாகவே காலியாகியிருக்கலாம் என்கின்றனர்.

உள்ளூர் மக்கள் ஒரு சுவாரஸ்யமான கதையையும் கூறுகின்றனர். கிராமத்தை விட்டு வெளியேறும் முன், பாலிவால் மக்கள் இங்கு யாரும் மீண்டும் குடியேறக்கூடாது என்று சாபமிட்டார்களாம். அதனால் இன்று வரை அந்த இடத்தில் யாரும் நிரந்தரமாக வசிக்க முடியவில்லை என நம்பப்படுகிறது.

மேலும், குல்தாரா பேய்க் கிராமம் என சுற்றுலாப் பயணிகளிடையே பிரபலமானது. இரவில் அங்கு விசித்திர ஒலிகள் கேட்கின்றன; அசாதாரண அனுபவங்கள் நிகழ்கின்றன என சிலர் கூறுகின்றனர். ஆனால் இதற்கு அறிவியல் ஆதாரம் இல்லை. வெறிச்சோடிய கட்டிடங்கள், பாலைவன காற்றின் சத்தம், இரவின் அமைதி இவை எல்லாம் மனித மனதில் அச்சத்தை உருவாக்குவது இயல்பு.

இது நம்பிக்கைக் கதையாக இருந்தாலும், உண்மையில் குல்தாரா ஒரு பாதுகாக்கப்பட்ட பாரம்பரியத் தளம். Archaeological Survey of India இந்த இடத்தை பராமரித்து வருகிறது. பழமையான வீடுகளின் சுவர்கள், கோயில் சிதிலங்கள், கிணறுகள் ஆகியவை இன்னும் காணப்படுகின்றன.

தொல்லியல் ஆய்வுகள் கூறுவது என்னவெனில், குல்தாராவில் வீடுகள் திட்டமிட்டு கட்டப்பட்டுள்ளன. வீதிகள் ஒரே திசையில் அமைக்கப்பட்டுள்ளன. மழைநீர் சேகரிப்பு முறைகளும் இருந்துள்ளன. இது ஒரு நன்கு திட்டமிடப்பட்ட குடியிருப்பு எனத் தெளிவாக காட்டுகிறது.

இப்போது இது ராஜஸ்தானின் முக்கிய சுற்றுலா இடமாக மாறியுள்ளது. ஜெய்சல்மேர் செல்லும் பலரும் இந்த இடத்தையும் பார்வையிடுகின்றனர். மாலை நேரத்தில் சூரிய அஸ்தமன ஒளியில் அந்த சிதிலங்கள் ஒரு வித்தியாசமான அழகை தருகின்றன.

குல்தாரா உண்மையில் ஒரே இரவில் மறைந்ததா? அல்லது அது ஒரு நீண்டகால சமூக-பொருளாதார மாற்றத்தின் விளைவா? எனத் தெளிவான பதில் இன்னும் இல்லை.

தற்போது இந்த குல்தாரா கிராமம் வெறும் சிதிலங்களாக இருந்தாலும், அதன் கதைகள் இன்னும் உயிருடன் வாழ்கின்றன. மர்மம் தீராததால் தான் அது இன்னும் அதிக ஈர்ப்பை ஏற்படுத்துகிறது!