நேதாஜி சுபாஷ் சந்திர போஸ்: இந்திய விடுதலைக்காக உயிர் நீத்த தியாகத்தின் கதை!

இந்தியாவின் சுதந்திரப் போராட்ட வரலாற்றில் அழியா தடம் பதித்த வீரத் தலைவர் நேதாஜி சுபாஷ் சந்திர போஸ்.

“எனக்கு ரத்தம் கொடுங்கள்; நான் உங்களுக்கு சுதந்திரம் பெற்றுத் தருகிறேன்” என்ற அவரது வீர முழக்கம், அன்றைய இந்திய இளைஞர்களிடம் எழுச்சியை ஏற்படுத்தியது. ஆகஸ்ட் 18 அன்று அவரது நினைவு நாள் அனுசரிக்கப்படும் நிலையில், அவரது துணிச்சலும் தேசப்பற்றும் இன்றும் நினைவுகூரப்படுகின்றன.

தேசப்பற்று நிறைந்த இளமை:

1897 ஜனவரி 23 அன்று ஒடிசாவின் கட்டக்கில் ஜானகிநாத் போஸ், பிரபாவதி தேவி தம்பதியருக்கு மகனாகப் பிறந்தார் சுபாஷ் சந்திர போஸ். சிறந்த கல்வி பெற்ற அவர், இங்கிலாந்தில் இந்திய குடிமைப் பணித் தேர்வில் வெற்றி பெற்றார். ஆனால், பிரிட்டிஷ் ஆட்சியின் கீழ் பணியாற்ற விரும்பாமல் அந்தப் பதவியைத் துறந்து, இந்திய விடுதலை இயக்கத்தில் முழுமையாக ஈடுபட்டார். சுவாமி விவேகானந்தரின் சிந்தனைகளும் அவரது இளமைக்காலத்தில் அவரை ஆழமாகப் பாதித்தன.

காங்கிரஸ் முதல் இந்திய தேசிய ராணுவம் வரை...

சுபாஷ் சந்திர போஸ் இந்திய தேசிய காங்கிரஸில் முக்கிய தலைவராக உயர்ந்தார். 1938-ல் ஹரிபுரா மாநாட்டிலும், 1939-ல் திரிபுரி மாநாட்டிலும் காங்கிரஸ் தலைவராகத் தேர்ந்தெடுக்கப்பட்டார். பின்னர் கருத்து வேறுபாடுகள் காரணமாக காங்கிரஸிலிருந்து விலகி, ஃபார்வர்டு பிளாக் அமைப்பை உருவாக்கினார்.

இரண்டாம் உலகப் போரின்போது இந்தியாவின் விடுதலைக்காக வெளிநாடுகளுக்குச் சென்ற அவர், இந்திய தேசிய ராணுவத்தை (INA) வலுப்படுத்தி வழிநடத்தினார். ஆசாத் ஹிந்த் அரசை உருவாக்கி, பிரிட்டிஷாருக்கு எதிராக ஆயுதப் போராட்டத்தை முன்னெடுத்தார். “ஜெய் ஹிந்த்” மற்றும் “டெல்லி சலோ” போன்ற முழக்கங்கள் வீரர்களிடையே புதிய நம்பிக்கையை ஏற்படுத்தின. 

பெண்களுக்கான ஜான்சி ராணி படைப்பிரிவும் அவரது தலைமையில் முக்கியத்துவம் பெற்றது. இந்திய அரசின் ‘ஆசாதி கா அம்ரித் மகோத்சவ்’ திட்டமும் நேதாஜி உருவாக்கிய தற்காலிக சுதந்திர இந்திய அரசை விடுதலைப் போராட்டத்தின் முக்கிய நிகழ்வாகக் குறிப்பிடுகிறது.

மறைவு குறித்த மர்மம்:

1945 ஆகஸ்ட் 18 அன்று தைவானில் நடந்ததாகக் கூறப்படும் விமான விபத்தில் நேதாஜி உயிரிழந்ததாக அதிகாரப்பூர்வ விசாரணைகள் கூறுகின்றன. ஆனால் அவரது மறைவு குறித்து பல ஆண்டுகளாக பல்வேறு கருத்துகளும் சந்தேகங்களும் நிலவி வருகின்றன. இதனால் நேதாஜியின் வாழ்க்கையும் மறைவும் இந்திய வரலாற்றில் இன்னும் ஆர்வத்தை ஏற்படுத்தும் அத்தியாயமாகவே உள்ளது. நேதாஜியின் செயல்பாடுகளில் பலருக்கும் அதிகம் தெரியாத சுவாரஸ்யமான அம்சங்களும் உள்ளன.

1943 ல் சிங்கப்பூர் இல் உருவாக்கப்பட்ட ஆசாத் ஹிந்த் அரசு ஒரு அரசுக்கு உரிய நிர்வாக அமைப்பை உருவாக்க முயன்றது. அதற்கென தனி நாணயம், தபால் தலைகள் உள்ளிட்ட திட்டங்களும் இருந்தன. பின்னர் ரங்கூனில் ஆசாத் ஹிந்த் வங்கி தொடங்கப்பட்டு விடுதலைப் போராட்டத்திற்காக இந்தியர்களிடம் இருந்து திரட்டப்பட்ட நிதியை நிர்வகிக்க பயன்படுத்தப்பட்டது‌‌. பெண்களும் விடுதலைப் போராட்டத்தில் நேரடியாகப் பங்கேற்க வேண்டும் என்ற எண்ணத்துடன் நேதாஜி ராணி ஜான்சி படைப்பிரிவை உருவாக்கினார்.

கேப்டன் லட்சுமி சுவாமிநாதன் தலைமையில் செயல்பட்ட இந்த பெண்கள் படைப்பிரிவு அன்றைய காலகட்டத்தில் மிகவும் துணிச்சலான முயற்சியாகக் கருதப்பட்டது. இளம் பெண்களுக்கு ராணுவப் பயிற்சி வழங்கப்பட்டு ஒழுக்கம், அணிவகுப்பு, ஆயுதப் பயிற்சி உள்ளிட்டவற்றில் அவர்கள் பயிற்சி பெற்றனர். நேதாஜியின் இந்த முயற்சி, சுதந்திரம் என்பது ஆண்களின் போராட்டம் மட்டும் அல்ல; பெண்களும் சமமாகப் பங்கேற்க வேண்டிய தேசியப் போராட்டம் என்ற அவரது பார்வையையும் வெளிப்படுத்துகின்றது.

நாட்டின் விடுதலைக்காக தனது வசதியான வாழ்க்கையையும் எதிர்காலத்தையும் துறந்த நேதாஜி, துணிச்சல், தியாகம், தேசப்பற்று ஆகியவற்றின் அடையாளமாக விளங்குகிறார். அவரது போராட்டப் பாதை, சுதந்திரம் எவ்வளவு பெரிய தியாகத்தின் விளைவு என்பதை அடுத்த தலைமுறைக்கு நினைவூட்டுகிறது.

நேதாஜியை நினைவுகூர்வது அவரது வரலாற்றை அறிந்து, நாட்டின் மீதான பொறுப்புணர்வை வளர்த்துக்கொள்வதுமாகும். நேதாஜியின் வாழ்க்கை ஒரு வரலாற்றுப் பக்கம் மட்டும் அல்ல. துணிச்சலுடன் கனவு காணவும், அந்த கனவுக்காகத் தியாகம் செய்யவும் கற்றுத் தரும் பாடம்.‌ சுதந்திரத்திற்காக அவர் காட்டிய உறுதியும், இளைஞர்களிடம் விதைத்த தேசப் பற்றும் என்றும் அழியாது.

நேதாஜி மறைந்திருக்கலாம். ஆனால் அவர் எழுப்பிய சுதந்திரக் கனவும் வீர முழக்கமும் இந்தியர்களின் இதயங்களில் என்றும் உயிருடன் இருக்கும்!

இந்த கட்டுரைய வாசிப்பதன் மூலம் நேதாஜி சுபாஷ் சந்திர போஸின் அறியப்படாத தியாகங்கள், ஆசாத் ஹிந்த் வங்கியின் வரலாறு மற்றும் பெண்களுக்கான ஜான்சி ராணி படைப்பிரிவின் முக்கியத்துவம் ஆகியவற்றை முழுமையாக அறிந்து, தேசப்பற்றையும் வரலாற்று விழிப்புணர்வையும் பெற முடியும்.