உலகை வியக்க வைக்கும் உஸ்பெகிஸ்தானின் நீல நிற மொசைக் ரகசியங்கள்!

ஆன்மீக மற்றும் வரலாற்றுப் பெருமை வாய்ந்த உஸ்பெகிஸ்தான் சுற்றுலா இடங்கள் பற்றிய முழு வழிகாட்டி:

உஸ்பெகிஸ்தான் (Uzbekistan) கட்டிடக்கலை என்பது மத்திய ஆசியாவின் பிரம்மாண்டமான இஸ்லாமிய வடிவமைப்பு, துடிப்பான நீல நிற மொசைக் ஓடுகள் மற்றும் வடிவியல் வடிவங்களின் (Girih) தனித்துவமான கலவையாகும். உலகப் புகழ்பெற்ற பண்டைய பட்டுப்பாதை வணிகப் பாதையின் மையப்புள்ளியாகத் திகழ்ந்ததாகும். புகழ்பெற்ற பட்டுப்பாதையில் (Silk Road) அமைந்துள்ள இதன் பண்டைய நகரங்கள், உலகின் மிகச்சிறந்த இடைக்கால கட்டிடக்கலை பொக்கிஷங்களைக் கொண்டுள்ளன.

உஸ்பெகிஸ்தானின் மிக முக்கியமான 3 யுனெஸ்கோ உலக பாரம்பரிய நகரங்களான சமர்கண்ட், புகாரா மற்றும் கிவா போன்ற நகரங்கள் வர்த்தகம் மற்றும் கலாச்சாரத்தின் வளமான வரலாற்றைக் கொண்டுள்ளன. இந்தப் பகுதி பட்டு உற்பத்திக்கும் பெயர் பெற்றது. வரலாற்று ஆர்வலர்களை ஈர்க்கும் நாடு இது. அத்துடன் அவற்றின் அசாத்திய கட்டிடக்கலை அதிசயங்களுக்கும் பெயர் பெற்றது.

சமர்கண்ட் (Samarkand) – ரெஜிஸ்தான் (Registan Square) சதுக்கம்:

மூன்று பிரம்மாண்டமான மதரஸாக்கள் (இஸ்லாமியப் பள்ளிகள்) அமைந்துள்ள இந்த இடம், உலகின் தலைசிறந்த கட்டிடக்கலை அதிசயங்களில் ஒன்றாகக் கருதப்படுகிறது. இதன் சிக்கலான நீலதங்க ஓடு வேலைப்பாடுகள் மற்றும் மெஹ்ராப் வளைவுகள் கண்கொள்ளாக் காட்சிகளாகும்.

சமர்கண்ட் - குர்-இ-அமீர் (Gur-i-Amir):

பேரரசர் தைமூர் (Tamerlane) மற்றும் அவரது குடும்பத்தினரின் கல்லறையாகும். நீலம் மற்றும் டர்க்கைஸ் வண்ண ஓடுகளால் அலங்கரிக்கப்பட்ட இந்த கட்டிடம், இந்தியாவின் புகழ்பெற்ற தாஜ்மஹாலுக்கான உத்வேகமாக கருதப்படுகிறது. இதன் பிரம்மாண்டமான விலா எலும்பு வடிவக் குவிமாடம் (Ribbed dome) மற்றும் உட்புற தங்க அலங்காரங்கள் மிகவும் பிரசித்தி பெற்றவை.

புகாரா(Bukhara) - பொய் கலியன் மினார் (Po-i-Kalyan Minaret):

பல நூற்றாண்டுகள் பழமையான இந்த மசூதி மற்றும் கோபுரம் நகரத்தின் அடையாளச் சின்னங்களாகும். 12ஆம் நூற்றாண்டில் கட்டப்பட்ட இந்த 47 மீட்டர் உயர கோபுரம், செங்கிஸ்கானின் படையெடுப்பின்போது கூட சேதமடையாமல் தப்பிய வரலாற்றுச் சிறப்புமிக்கது. செங்கிஸ்கான் படையெடுத்த பொழுது கூட இதன் பிரம்மாண்டத்தைக் கண்டு அதை அழிக்க மனமில்லாமல்

விட்டுவிட்டதாக வரலாறு கூறுகிறது. இந்த பிரம்மாண்டமான கோபுரம் செங்கற்களைக்கொண்டு மட்டுமே பல்வேறு அடுக்கு வடிவங்களில் கட்டப்பட்டுள்ளது.

கிவா (Khiva) - இச்சன் கலா (Itchan Kala):

யுனெஸ்கோ உலக பாரம்பரிய தளமான இந்த நகரம், முழுமையாக சுவர்களால் சூழப்பட்ட ஒரு கோட்டையாகும். பாலைவனத்தின் நடுவே அமைந்துள்ள கிவா, கால இயந்திரத்தில் பின்னோக்கிச் சென்ற உணர்வைத்தரும். இது ஒரு திறந்தவெளி அருங்காட்சியகத்தைப் போன்ற பழமையான கோட்டை நகரமாகும்.

இங்குள்ள அரண்மனைகள், மசூதிகள் மற்றும் தூண்கள் முழுவதும் செதுக்கப்பட்டுள்ள மர வேலைப்பாடுகள் இந்த நகரின் சிறப்பம்சங்களாகும். பண்டைய அரண்மனைகள், பள்ளிவாசல்கள் மற்றும் 250க்கும் மேற்பட்ட வரலாற்று வீடுகள் இங்கு இன்றும் அப்படியே பாதுகாக்கப்பட்டுள்ளன.

தாஷ்கண்ட் (Tashkent) - ஹஸ்ரதி இமாம் வளாகம் (Hazrati Imam Complex):

உஸ்பெகிஸ்தானின் தலைநகரத்தில் உள்ள இந்த வளாகத்தில் உலகின் மிகப் பழமையான திருக்குர்ஆன் (உஸ்மான் குர்ஆன்) பாதுகாக்கப்படுகிறது.

தாஷ்கண்ட் மெட்ரோ:

தலைநகரான தாஷ்கண்டில் உள்ள சுரங்க ரயில் நிலையங்கள், சோவியத் கால நவீன கலை மற்றும் பாரம்பரிய இஸ்லாமிய வடிவமைப்பு ஆகியவற்றின் கலவையாகும். ஒவ்வொரு நிலையமும் வெவ்வேறு பளிங்கு கற்கள் மற்றும் கலை வேலைபாடுகளால் வடிவமைக்கப்பட்டுள்ளது.

ஷா-இ-ஜிந்தா (Shah-i-Zinda):

இது ஒரு நேர்த்தியான கல்லறை வீதியாகும் (Necropolis). இங்குள்ள ஒவ்வொரு கட்டிடமும் பெர்சிய நீலம் மற்றும் கோபால்ட் போன்ற பல்வேறு நீல நிற நிழல்களில் நுட்பமான மொசைக் கற்களால் அலங்கரிக்கப் பட்டுள்ளது.

கட்டிடக்கலையின் சிறப்பு அம்சங்கள்:

நீல நிற ஓடுகள்:

வான் மற்றும் நீரின் நிறத்தைக் குறிக்கும் வகையில் நீல நிற ஓடுகள் அதிகளவில் பயன்படுத்தப்பட்டுள்ளன.

கிரியி (Girih) வடிவங்கள்:

துல்லியமான கணிதக் கணக்கீடுகளால் உருவாக்கப்பட்ட வடிவியல் கலைகள்.

செங்கிஸ்கான் போன்ற வரலாற்றுப் பேரரசர்களைக் கவர்ந்த கட்டிடக்கலை அதிசயங்களின் பின்னால் இருக்கும் துல்லியமான கணிதக் கணக்கீடுகளையும் (Girih), மொசைக் கலைகளையும் நீங்கள் அறிந்து கொள்வீர்கள். உங்கள் அடுத்த உலகளாவிய சுற்றுலாப் பட்டியலைத் திட்டமிடுவதற்கான சிறந்த வரலாற்று வழிகாட்டியாக இது அமையும்.