உங்களுக்கு முதுகு வலி இருக்கிறதா? நீங்கள் வாங்கும் ஷூதான் காரணம்!

தற்போது அழகுக்காக தேடித்தேடி பெறப்படும் சாதனங்களுள் ஒன்றாக இருக்கிறது ஃபேஷனான காலணிகளும். பெண்களுக்கு அழகான ஹீல்ஸ் என்றால் ஆண்களுக்கு கவர்ச்சியான ஷூக்கள். அந்தக் காலத்தில் ரப்பர் செருப்புகள் மற்றும் மரக்கட்டையை அடியில் வைத்து செய்த தோல் செருப்புகள் மட்டுமே அணிவதற்கு ஏற்றதாக இருந்த நிலையில் நாகரீகம் முன்னேறி இப்போது அடிப்படை தோல் என்றாலும் விதவிதமான வடிவமைப்புகளிலும் வண்ணங்களிலும் மிக அழகான காலணிகள் நமக்கு கிடைக்கிறது.

இடத்திற்கு தகுந்தாற்போல் காலணிகளையும் அணிய வேண்டியுள்ளது. அழகுக்காக மட்டும் இன்றி நமது உடல்நலம் மற்றும் நல்வாழ்வுக்கு ஏராளமான நன்மைகளை வழங்குகிறது காலணிகள். நாம் நடந்து செல்லும்போது கற்கள் முட்களிடம் இருந்தும், பிறரின் எச்சங்களில் இருந்து பரவும் நோய்க்கிருமிகளில் இருந்தும் நம்மை பாதுகாத்து நம் உடல் நலத்துக்கு பக்க பலமாக இருக்கிறது காலணிகள் என்றால் மிகையல்ல.

ஆகவே நாம் நமது காலணிகளைத் தேர்வு செய்யும்போது வெகு கவனமாக இருக்க வேண்டியது அவசியமாகிறது. நல்ல ஜோடி காலணிகளில் முதலீடு செய்வது ஃபேஷனைத் தாண்டி சில முக்கிய நன்மைகள் உள்ளன. அவற்றை இங்கு காண்போம்.

தரமான நல்ல காலணிகள் போதுமான வளைவு ஆதரவு (Support) மற்றும் மென்மையை வழங்குவதால் கால்களில் உருவாகும் வலி மற்றும் எதிர்பாராமல் ஏற்படும் காயங்களின் அபாயத்தைக் குறைக்கின்றன.

நன்கு பொருந்தக்கூடிய காலணிகள் (bunions, hammertoes, and plantar fasciitis) பனியன்கள், சுத்தியல் கால்விரல்கள் மற்றும் பிளாண்டர் ஃபாசிடிஸ் போன்ற பிரச்னைகளைத் தடுக்க உதவுகிறது.

நல்ல இழுவை மற்றும் நிலைத்தன்மை கொண்ட காலணிகள் மேம்படுத்தப்பட்ட சமநிலையுடன் சறுக்கல்கள் மற்றும் வீழ்ச்சிகளைத் தடுக்க உதவும்.

நமது கால்களின் அளவுக்கேற்ப வாங்கி அணியும் சரியான காலணிகள் முதுகெலும்பு சீரமைப்பைப் பராமரிக்கவும், முதுகுவலி மற்றும் அசௌகரியத்தைக் குறைக்கவும் உதவும். மற்றவர்களைக் கவரும் மேம்படுத்தப்பட்ட சிறந்த கம்பீரத்தை வெளிப்படுத்தும். நீண்டகால முதுகு மற்றும் மூட்டு பிரச்னைகளின் அபாயத்தைக் குறைக்கும்.

வசதியான காலணிகள் சோர்வு மற்றும் அசௌகரியத்தைக் குறைத்து, நாள் முழுவதும் பணியில் கவனம் செலுத்தி உற்பத்தித் திறனைப் பெருக்க உங்களை அனுமதிக்கும். நல்ல காலணிகள் உங்களை மிகவும் சுதந்திரமாகவும் வசதியாகவும் நடமாட உதவும், உடல் செயல்பாடு மற்றும் ஒட்டுமொத்த நல்வாழ்வைத்தரும்.

நல்ல கணுக்கால்களுக்கு ஏற்ற ஆதரவுடன் கூடிய காலணிகள் கணுக்கால் சுளுக்கு மற்றும் பிற காயங்களைத் தடுக்க உதவும்.

போதுமான மென்மை கொண்ட காலணிகள் அதிர்ச்சியை உறிஞ்சி, உங்கள் மூட்டுகள் மற்றும் தசைகளில் ஏற்படும் தாக்கத்தைக் குறைக்கும்.

காலை முதல் நம்மை பிரியாமல் நம்முடனே தனது பயணத்தை தொடரும் சரியான காலணிகளைத் தேர்ந்தெடுப்பது வெகு அவசியம். இதோ சில டிப்ஸ்…

நாள் முழுவதும் அலைச்சலில் பாதங்கள் வீங்கிவிடும் என்பதால், மதிய நேரத்தில் காலணிகளை வாங்குவது நல்லது. காலணிகள் வசதியாகவும் ஆதரவாகவும் இருப்பதை உறுதிசெய்ய கடையைச் சுற்றி நடந்து பார்த்த பின் வாங்கவும். அன்றாடம் நீங்கள் செய்யும் பணிகளின் செயல்பாட்டு நிலை மற்றும் வாழ்க்கை முறைக்கு ஏற்ற காலணிகளைத் தேர்வு செய்யவும்.

சிறுவர்களுக்கும் பெரியவர்களுக்கும் தேர்வு செய்யும்போது மிகவும் கவனத்துடன் அவர்கள் வசதியாக உணரும் வகையில் சரியான அளவு மற்றும் வடிவத்தில் வாங்குவது நல்லது. ஃபேஷன் என்ற பெயரில் பொருத்தமற்ற காலணிகளை வாங்கி பணத்துடன் நலத்தையும் கெடுத்துக்கொள்வதை தவிர்த்து நமக்குப் பொருத்தமானதை வாங்கி மேம்பட்ட கால் ஆரோக்கியம் முதல் எளிதான உற்பத்தித்திறன் வரை பல ஆரோக்கிய நன்மைகளை அனுபவிப்போம்.