ஆரஞ்சு பழத்தோலை இனி குப்பையில் வீசாதீங்க.. முகம் தங்கம் போல மின்ன இதை ட்ரை பண்ணுங்க!

நமது வீட்டிலேயே தூக்கி எறியும் குப்பையில் ஒரு மாபெரும் அழகு ரகசியம் ஒளிந்திருக்கிறது. நாம் சாப்பிட்டுவிட்டு தூக்கி வீசும் ஆரஞ்சு பழத்தோலில் வைட்டமின் சி மற்றும் ஆன்டி-ஆக்ஸிடன்ட்கள் அதிக அளவில் கொட்டிக்கிடக்கின்றன. வயதாவதைத் தடுத்து முகத்தை எப்போதும் இளமையாக வைத்துக்கொள்ளும் ஒரு சூப்பரான சீரமை ஆரஞ்சு தோலை வைத்து எப்படி தயாரிப்பது தெரிந்துகொள்ளலாம் வாங்க.

தேவையான பொருட்கள்!

இந்த சீரம் தயாரிக்க நமக்கு குறைவான பொருட்கள் மட்டுமே தேவைப்படும். எந்த ஒரு ரசாயனமும் கலக்காத ஆர்கானிக் முறையில் விளைந்த இரண்டு அல்லது மூன்று ஆரஞ்சு பழங்கள் தேவை. இத்துடன் இரண்டு ஸ்பூன் ரோஸ் வாட்டர், ஒரு ஸ்பூன் சுத்தமான கற்றாழை ஜெல், அரை ஸ்பூன் வெஜிடபிள் கிளிசரின் மற்றும் இரண்டு வைட்டமின் ஈ கேப்சூல்கள் ஆகியவற்றைத் தயாராக எடுத்து வைத்துக்கொள்ளுங்கள்.

தயாரிக்கும் முறை!

முதலில் ஆரஞ்சு பழங்களை நன்றாகக் கழுவி அதன் தோலை மட்டும் தனியாக உரித்து எடுக்க வேண்டும். தோலின் உட்புறம் இருக்கும் அந்த வெள்ளை நிறப் பகுதியை கத்தியால் சுரண்டி எடுத்துவிடுவது ரொம்பவே முக்கியம். பின்பு அந்த தோல்களை வெயிலில் நன்றாகக் காயவைக்க வேண்டும். அது முழுமையாக காய்ந்தவுடன் மிக்ஸியில் போட்டு நைசான பவுடராக அரைத்து சல்லடையில் சலித்து வைத்துக்கொள்ளுங்கள்.

இப்போது ஒரு சிறிய கிண்ணத்தில் ஒரு ஸ்பூன் ஆரஞ்சு பவுடரை போட்டு அதனுடன் ரோஸ் வாட்டரை ஊற்றி நன்றாகக் கலக்க வேண்டும். இதை அப்படியே மூடிப் போட்டு ஒரு ஆறு மணி நேரம் ஊறவிடுங்கள். இப்படி செய்வதால் தோலில் உள்ள வைட்டமின் சி முழுமையாக அந்தத் தண்ணீரில் இறங்கிவிடும். 

அதன் பிறகு ஒரு சுத்தமான பருத்தித் துணியை வைத்து அந்த கலவையை நன்றாகப் பிழிந்து சாற்றை மட்டும் தனியாக எடுத்துக் கொள்ளுங்கள். அந்த சாற்றில் நாம் ஏற்கனவே எடுத்து வைத்துள்ள கற்றாழை ஜெல், கிளிசரின் மற்றும் வைட்டமின் ஈ கேப்சூலில் உள்ள எண்ணெய் ஆகியவற்றைச் சேர்த்துக் கட்டிகள் இல்லாமல் நன்றாகக் கலக்கினால் உங்களின் சூப்பரான முகப்பொலிவு சீரம் தயார்.

பயன்படுத்தும் முறை!

இந்த சீரமை வெளிச்சம் படாத ஒரு அடர்ந்த நிறம் கொண்ட பாட்டிலில் ஊற்றி பிரிட்ஜில் மட்டுமே வைத்திருக்க வேண்டும். இதில் எந்த ஒரு கெமிக்கலும் இல்லாததால் இது அதிகபட்சம் ஒரு வாரம் வரை மட்டுமே கெட்டுப்போகாமல் இருக்கும். முகத்தை நன்றாகக் கழுவிய பிறகு இதில் மூன்று சொட்டுகள் எடுத்து முகத்தில் மென்மையாக மசாஜ் செய்யுங்கள். காலையில் இதை தடவினால் கண்டிப்பாக சன்ஸ்க்ரீன் பயன்படுத்தியே ஆக வேண்டும். இல்லையென்றால் வெயில் பட்டு சருமம் கருத்துப்போக வாய்ப்புள்ளது.

வீட்டிலேயே தயாரிக்கும் பொருட்கள் பாதுகாப்பானவை என்றாலும் அதன் பலன் சற்று மெதுவாகவே கிடைக்கும். இந்த சீரம் உங்களின் முகத்திற்கு ஒரு அருமையான பளபளப்பைக் கொடுக்கும் என்பதில் எந்த ஒரு சந்தேகமும் இல்லை. பிரிட்ஜில் வைத்திருக்கும் சீரமின் நிறம் கருமையாக மாறினாலோ அல்லது வாடை வந்தாலோ அதை உடனே தூக்கி எறிந்துவிடுவது தான் நல்லது.

 இதனை முகத்தில் முழுமையாக தடவுவதற்கு முன்பாக உங்களின் தாடைப் பகுதியில் லேசாகத் தடவி பேட்ச் டெஸ்ட் செய்து கொள்வது பாதுகாப்பானது. இனிமேல் பணத்தை வீணாக்காமல் இந்த இயற்கையான சீரமை பயன்படுத்தி உங்களின் அழகை முழுமையாக மெருகேற்றுங்கள்.