SPF 30 vs SPF 50: உங்கள் சருமத்திற்கு எது சிறந்தது?

கோடைக்காலம் வந்தாலே நம் நினைவுக்கு வருவது சூரியனின் சுட்டெரிக்கும் வெயிலும், அதனால் நம் சருமத்திற்கு ஏற்படும் பாதிப்புகளும் தான். இந்த பாதிப்புகளில் இருந்து நம்மை காத்துக்கொள்ள சன்ஸ்கிரீன் ஒரு அத்தியாவசிய பொருளாக மாறிவிட்டது. கடைகளில் விதவிதமான சன்ஸ்கிரீன்களள் இருந்தாலும், SPF 30, SPF 50 போன்ற குறியீடுகள் கொண்ட ப்ராடக்டுகளை பெரும்பாலும் பார்த்திருப்பீர்கள். இவற்றில் எது நம் சருமத்திற்கு சிறந்தது தெரியுமா. இந்தப் பதிவில், SPF 30 மற்றும் SPF 50 ஆகியவற்றுக்கு இடையிலான வேறுபாடுகள் மற்றும் உங்கள் சருமத்திற்கு எது பொருத்தமானது என்பதைப் பற்றி விரிவாகப் பார்க்கலாம்.

SPF என்றால் என்ன?

SPF (Sun Protection Factor) என்பது, ஒரு சன்ஸ்கிரீன் உங்களை சூரியனின் UVB கதிர்களிடமிருந்து எவ்வளவு நேரம் பாதுகாக்கும் என்பதற்கான ஒரு அளவீடு. UVB கதிர்கள் தான் சருமம் சிவந்து போவதற்கும் மற்றும் தோல் புற்றுநோய் ஏற்படுவதற்கும் முக்கிய காரணமாகும். உதாரணமாக, நீங்கள் சன்ஸ்கிரீன் பயன்படுத்தாமல் 10 நிமிடங்களில் சருமம் சிவக்க ஆரம்பித்தால், SPF 30 சன்ஸ்கிரீன் பயன்படுத்தும்போது, அதே அளவு சிவத்தல் ஏற்பட சுமார் 300 நிமிடங்கள் ஆகும்.

SPF 30 இன் பாதுகாப்பு:

SPF 30 கொண்ட சன்ஸ்கிரீன், சூரியனின் UVB கதிர்களில் சுமார் 97% வரை தடுக்கிறது. இது பெரும்பாலான மக்களுக்கு தினசரி பயன்பாட்டிற்கு போதுமான பாதுகாப்பை வழங்குகிறது. நீங்கள் வீட்டிற்குள்ளேயே அதிக நேரம் செலவழிப்பவராக இருந்தாலோ அல்லது மிதமான வெயிலில் சிறிது நேரம் மட்டுமே வெளியில் செல்பவராக இருந்தாலோ, SPF 30 உங்களுக்கு ஒரு நல்ல தேர்வாக இருக்கும். 

SPF 50 இன் பாதுகாப்பு:

SPF 50 கொண்ட சன்ஸ்கிரீன், UVB கதிர்களில் சுமார் 98% வரை தடுக்கிறது. SPF 30 உடன் ஒப்பிடும்போது இது 1% மட்டுமே அதிக பாதுகாப்பை வழங்குகிறது என்பது குறிப்பிடத்தக்கது. இருப்பினும், நீங்கள் மிகவும் மிருதுவான சருமம் உடையவராக இருந்தாலோ, அதிக நேரம் கடுமையான வெயிலில் செலவிட வேண்டியிருந்தாலோ, அல்லது எளிதில் சருமம் சிவந்து போகும் தன்மை கொண்டவராக இருந்தாலோ, SPF 50 உங்களுக்கு கூடுதல் பாதுகாப்பை அளிக்கக்கூடும். 

எது சிறந்தது?

SPF 30 மற்றும் SPF 50 ஆகிய இரண்டிற்கும் இடையே உள்ள UVB பாதுகாப்பு சதவீத வேறுபாடு மிகவும் குறைவு. SPF 30 க்கு மேல் செல்லும்போது, கிடைக்கும் கூடுதல் பாதுகாப்பு விகிதாச்சாரப்படி குறைவாகவே இருக்கும். உதாரணமாக, SPF 100 கூட 99% UVB கதிர்களைத்தான் தடுக்கும். எனவே, அதிக SPF எண் கொண்ட சன்ஸ்கிரீனைத் தேர்ந்தெடுப்பதை விட, சன்ஸ்கிரீனை சரியான அளவில், இரண்டு மணி நேரத்திற்கு ஒருமுறை மீண்டும் பூசுவது மிகவும் முக்கியம். 

SPF 30 மற்றும் SPF 50 ஆகிய இரண்டில் எது சிறந்தது என்பது உங்கள் தனிப்பட்ட தேவைகள் மற்றும் சருமத்தின் தன்மையைப் பொறுத்தது. பெரும்பாலான இந்திய சரும வகைகளுக்கு, தினசரி பயன்பாட்டிற்கு SPF 30 போதுமானது. நீங்கள் அதிக நேரம் வெயிலில் செலவிடப் போகிறீர்கள் என்றால் அல்லது உங்கள் சருமம் மிகவும் உணர்திறன் வாய்ந்ததாக இருந்தால் SPF 50 ஐக் கருத்தில் கொள்ளலாம். இருப்பினும், நினைவில் கொள்ளுங்கள், எந்த SPF எண்ணைத் தேர்ந்தெடுத்தாலும், அதை தாராளமாகப் பூசி, தவறாமல் மீண்டும் பூசுவதே சூரியனின் தீங்கு விளைவிக்கும் கதிர்களிடமிருந்து உங்கள் சருமத்தைப் பாதுகாப்பதற்கான சிறந்த வழியாகும்.