நீங்கள் பயன்படுத்தும் கிரீம்கள் உங்களின் முகத்தை நாசமாக்குகிறதா? சரும நிபுணர்கள் சொல்லும் ஷாக்கிங் தகவல் இதோ!

பொதுவாகவே ஆண்களின் சருமம் கடினமானது, அதில் எந்த கிரீமை தடவினாலும் ஒத்துக் கொள்ளும் என்ற ஒரு தவறான எண்ணம் பலரிடமும் உள்ளது. இதனால் கடைகளில் கிடைக்கும் ஏதோ ஒரு ப்ராடக்ட்டை வாங்கி முகத்தில் பூசி, கடைசியில் அது முகத்தையே நாசமாக்கி விடுகிறது. 

உண்மையில் ஆண்களின் சருமத்திற்கும் தனித்துவமான பராமரிப்பு தேவைப்படுகிறது. அவர்களின் வயது, உணவுப் பழக்கம் மற்றும் ஹார்மோன் மாற்றங்கள் ஆகியவை முகத்தின் ஆரோக்கியத்தை எப்படி தீர்மானிக்கின்றன என்பதை பற்றி சரும நிபுணர்கள் கூறுவதைப் பார்க்கலாம் வாங்க.

கரடுமுரடான சருமம் என்ற கட்டுக்கதை!

ஆண்களின் முகம் எப்போதுமே ரஃப் அண்ட் டஃப் ஆக இருக்கும் என்று நினைப்பது கொஞ்சம் முட்டாள்தனம் தான். அவர்களுக்கும் மிருதுவான, சென்சிட்டிவ்வான சருமம் இருக்க அதிக வாய்ப்புள்ளது. அடோபிக் டெர்மடிடிஸ் மற்றும் ரோசாசியா போன்ற பிரச்சனைகள் ஆண்களுக்கு வரும்போது முகம் சிவந்துபோய் அதிகப்படியான பருக்கள் வெடிக்க ஆரம்பிக்கும். 

ஆண்களின் உடலில் உள்ள டெஸ்டோஸ்டிரோன் எனப்படும் ஹார்மோன் காரணமாக, பெண்களை விட இவர்களின் சருமம் சற்று தடிமனாகவும் அதிக எண்ணெய் சுரக்கும் தன்மையுடனும் இருக்கிறது. அதனால் எண்ணெய் வடிவதை கட்டுப்படுத்த அதற்கேற்ற பிரத்யேகமான வழிகளை மட்டுமே பின்பற்ற வேண்டும்.

வாழ்க்கை முறை & வயது!

ஒருவருடைய முகத்தை பார்த்தவுடனே அவருக்கு எந்த மாதிரியான சிகிச்சை அளிக்க வேண்டும் என மருத்துவர்களால் உடனே சொல்லிவிட முடியாது. ஒரு பதின்பருவ இளைஞனின் முக அமைப்பும், நடுத்தர வயதுடைய ஒருவரின் முக அமைப்பும் முற்றிலும் வித்தியாசமாகவே இருக்கும். நாம் தினமும் எவ்வளவு தண்ணீர் குடிக்கிறோம், என்ன மாதிரியான உணவுகளை சாப்பிடுகிறோம், தவறாமல் உடற்பயிற்சி செய்கிறோமா போன்ற லைஃப்ஸ்டைல் விஷயங்கள் தான் முகத்தின் பொலிவை நேரடியாக முடிவு செய்கின்றன. அதனால் தான் நீங்கள் மருத்துவரிடம் செல்லும் போது உங்களின் தினசரி ரொட்டீன் பற்றி அவர்கள் இவ்வளவு முழுமையாக விசாரிக்கிறார்கள்.

ஒவ்வொருவருக்கும் ஒவ்வொரு தனித்துவம்!

எல்லா ஆண்களுக்கும் ஒரே மாதிரியான கிரீம்கள், ஃபேஸ் வாஷ்கள் செட் ஆகாது என்பதை முதலில் நாம் புரிந்துகொள்ள வேண்டும். உங்களது நண்பனுக்கு ஒரு பொருள் வேலை செய்கிறது என்பதற்காக அதை நீங்களும் வாங்கி முகத்தில் அப்பிக் கொள்ளக் கூடாது. உங்களின் சருமம் வறண்டதா, எண்ணெய் வழியும் தன்மையுடையதா, சென்சிட்டிவ் ஆனதா என்பதை முதலில் சரியாக கண்டறிய வேண்டும். அதன் பிறகு அந்த குறிப்பிட்ட பிரச்சனைக்கு ஏற்ப தயாரிக்கப்பட்ட சரியான பொருட்களை மட்டுமே தேர்ந்தெடுத்து பயன்படுத்துவது அவசியம்.

ஆண்களின் சருமம் எப்போதுமே எண்ணெயாகத் தான் இருக்கும் அதை மாற்றவே முடியாது என நினைப்பது தவறு. சரியான உணவுப் பழக்கம் மற்றும் ஸ்கின் கேர் ரொட்டீனை பின்பற்றினால் முகத்தை எப்போதுமே பளபளப்பாக மாற்றிவிடலாம். கடைகளில் முகத்திற்கான பொருட்களை வாங்கும் போது அதன் பின்புறம் என்னென்ன கெமிக்கல்கள் எவ்வளவு சதவீதம் சேர்க்கப்பட்டுள்ளன என்பதை கட்டாயம் படித்துப் பார்க்க பழகிக் கொள்ளுங்கள். 

தவறான பொருட்களை பயன்படுத்தினால் முகத்தில் கரும்புள்ளிகள் மற்றும் தேவையற்ற நிறமாற்றங்கள் ஏற்பட்டு முகம் டேமேஜ் ஆகிவிடும். உங்களின் முகத்திற்கு எது தேவையோ அதை மட்டும் கொடுத்து உங்களை எப்போதும் அழகாகப் பராமரியுங்கள்.