பனிப் பிரதேசம் உருகி, கடல் மட்டம் உயர்ந்தால் அதற்கு நாம் கொடுக்கப்போகும் விலை என்ன தெரியுமா?

கிரீன்லாந்து மற்றும் அண்டார்டிகாவில் இருக்கும் பனிக்கட்டிப் பிரதேசம் உறைந்த நீரின் பகுதிகளால் சூழப்பட்டது. இந்த பனிக்கட்டி பிரதேசங்கள் பூமியின் நன்னீரில் (Fresh water) மூன்றில் இரண்டு பங்கை வைத்திருக்கின்றன. மேலும், அவற்றின் இருப்புத்தன்மை நம் கிரகத்தின் காலநிலையுடன் பெரிதும் இணைக்கப்பட்டுள்ளது. அதன் முக்கியத்துவங்களைப் பற்றி இப்பதிவில் தெரிந்து கொள்வோம்.

அண்டார்டிகாவில் படர்ந்திருக்கும் பனிக்கட்டிகளானது பூமியில் மிகப்பெரிய அளவில் விரிந்து காணப்படும் பனிக்கட்டிகளாகும். இது உலகின் 60 சதவிகித நன்னீரை மொத்தமாக உள்ளடக்கியுள்ளது. அது முழுவதுமாக உருகும் பட்சத்தில், உலக சராசரி கடல் மட்டம் 58 மீட்டர் அளவு வரை உயரக்கூடும்.

புவி வெப்பமடைவது எல்லோருக்கும் தெரிந்த ஒன்று. அதை தடுக்க எல்லா நாடுகளும் என்னதான் பல வழிகளைக் கையாண்டாலும், தொழிற்சாலைகளில் இருந்து செயற்கையாக வெளிப்படும் நச்சுப் புகைகள் போன்றவற்றை கட்டுப்படுத்த முடியவில்லை. காரணம், தொழிற்சாலைகள் எல்லாம் நம் வாழ்வின் ஒர் அங்கமாக மாறிவிட்டன. ஆகையால், இதன் மொத்த தாக்கமும் பனிக்கட்டிகளால் சூழ்ந்த பிரதேசங்களை முற்றிலும் பாதிக்கிறது. விஞ்ஞானிகள் பல திட்டங்களைத் தீட்டினாலும் அங்கு நடக்கும் மாற்றங்களை தடுக்க  சிரமப்படுகின்றனர்.

இன்று கிரீன்ஹவுஸ் வாயு வெளியேற்றம் போன்ற பல ஒழுங்குமுறைகளை பின்பற்றினாலும், கடல்களில் கலக்கப்படும் தொழிற்சாலைகளின் கழிவுநீர்  மற்றும் வளிமண்டலத்தால் ஏற்கெனவே உறிஞ்சப்பட்ட வெப்பம் காரணமாக கணிசமான பனி இழப்பு தொடர்ந்து கொண்டுதான் இருக்கிறது. கிரீன்லாந்தின் பனிக்கட்டி பகுதிகளிலும் கணிசமான அளவு நன்னீர் உள்ளது. இதுவும்  முழுவதுமாக உருகினால், உலக கடல் மட்டம் கணிசமாக உயரக் கூடும்.

சமீபத்திய ஆய்வுகள், கிரீன்லாந்து மற்றும் அண்டார்டிகா பகுதிகளில் ஆபத்தான விகிதத்தில் பனிக்கட்டிகள் உருகியுள்ளதை வெளிப்படுத்துகின்றன. 1990களில் இருந்து, இந்த இரண்டு பகுதிகளிலும் 6.4 டிரில்லியன் டன் பனிக்கட்டிகள் நீரில் கரைந்துள்ளது. இது நம் உலகில் மொத்த கடல் மட்டம் உயர மூன்றில் ஒரு பங்குக்கான காரணமாக இருந்துள்ளது.

கிரீன்லாந்தில் உருகும் பனிக்கட்டிகளும் ஒரு வகையில் புவி வெப்பமடைதலை துரிதப்படுத்துகின்றன. அப்பகுதியில் காணப்படும் பரந்த அளவிலான பனிக்கட்டிகளின் விரிவாக்கம் கண்ணாடி போல் செயல்பட்டு விண்வெளியில் இருந்து வரும் சூரிய ஒளி மற்றும் கதிர்களை பூமியின் உள் அண்ட விடாமல் திருப்பி அனுப்பி விடும். இதனால்தான் நம் பூமியின் வெப்பநிலை ஓரளவு குறைவாக உள்ளது. ஆனால், இந்த பனிக்கட்டிகள் உருகும் பட்சத்தில்,  சூரிய ஒளி ஊடுருவுவதும்  தடுக்கப்படாமல் பூமியின் வெப்பநிலை கணிசமாக உயரக்கூடும்.

பனிக்கட்டிகள் உருகுவதன் உடனடி தாக்கம் கடல் மட்டம் உயர்வதுதான். கடலோர நகரங்கள், தாழ்வான தீவுகள் மற்றும் மக்கள் தொகை அதிகமுள்ள டெல்டாக்கள் வெள்ளத்தில் மூழ்கக்கூடும். இதனால் உலகம் பேரழிவை சந்திக்கக் கூடும். அதேபோல், நீரில் மூழ்கிய நிலத்தின் காரணமாக மில்லியன் கணக்கான மக்கள் இடம் பெயரக் கூடும். இதனால் பண்டைய காலத்தில் நடந்த சில நில அபகரிப்புக்கான யுத்தங்கள் தலை தூக்கலாம்.

கடல் மட்ட உயர்வுக்கு நம் உள்கட்டமைப்புகளை மாற்ற நாம் கொடுக்க வேண்டிய விலை மிகவும் அதிகமாக உள்ளது. இழந்த சொத்துக்களை மீட்டெடுப்பது என்று இந்த சூழ்நிலைக்கு நம்மை மாற்றுவது ரொம்பவே கடினம். மேலும், உருகும் பனிக்கட்டிகள் வானிலை வடிவங்களை முற்றிலும் பாதித்து விடும். இதன் காரணமாக புயல்கள், சூறாவளிகள் எதிர்பாராத நேரங்களில் பல இயற்கை பேரிடர்களை சந்திக்க நேரிடும்.

கிரீன்லாந்து மற்றும் அண்டார்டிகாவின் பனிக்கட்டிகளின் மொத்த தலைவிதி மனித குலத்தின் முக்கியமான பிரச்னைகளில் ஒன்று. என்னதான் விஞ்ஞான வளர்ச்சியால் பல சவால்களை எதிர்கொண்டாலும், ஆராய்ச்சியில் முதலீடு செய்து பல தகவல்களை முன்கூட்டியே அறிந்தாலும், நம் மனித குலத்தின் ​​​​இன்றைய செயல்கள் எதிர்கால தலைமுறைகளுக்கு பாதிப்பை ஏற்படுத்தும் நிலையில்தான் உள்ளன. இந்தப் பேரிடரை காலத்தால் தள்ளிப்போட முடியுமே ஒழிய, முற்றிலும் தவிர்க்க முடியுமா என்பது கேள்விக்குறியே!