வானவில் போல மின்னும் பாம்பு... மனிதர்களை என்ன செய்யும் தெரியுமா?

உலகில் வாழும் ஒவ்வொரு உயிரினமும் தனக்கென சில விசித்திரமான ரகசியங்களையும் தனித்துவமான குணாதிசயங்களையும் கொண்டுள்ளது. அப்படிப்பட்ட ஒரு அபூர்வமான, காண்பதற்கு மிகவும் அழகான ஊர்வன இனம் தான் ரெயின்போ பாம்பு (Rainbow Snake). 

அமெரிக்காவின் தென்கிழக்கு பகுதிகளில் உள்ள சதுப்புநில காடுகளில் அமைதியாக வாழும் இந்த பாம்பை மனிதர்கள் நேரில் பார்ப்பது என்பது மிகவும் அரிதானது. இவை ஒருபோதும் மனிதர்களைத் தாக்குவது கிடையாது. இந்த வண்ணமயமான பாம்பின் வாழ்க்கை முறை மற்றும் சுவாரஸ்யமான பண்புகளை பற்றி தெரிந்து கொள்ளலாம் வாங்க.

வித்தியாசமான வானவில் தோற்றம்! 

பார்ப்பதற்கு பளபளப்பான கருப்பு நிற உடலைக் கொண்ட இது, முதுகில் 3 மெல்லிய சிவப்பு நிற கோடுகளை அழகாக கொண்டுள்ளது. அதன் அடிப்பகுதி மஞ்சள் அல்லது வெளிர் இளஞ்சிவப்பு நிறத்தில் மிக பிரகாசமாக இருக்கும். சுமார் 70 முதல் 122 சென்டிமீட்டர் வரை வளரக்கூடிய இந்த பாம்பின் வால் பகுதி ஒரு கூர்மையான முள்ளைப் போல முடிவடையும். இவற்றின் உடலில் உள்ள செதில்கள் ஒளியை எதிரொளித்து ஒரு வானவில் போன்ற நீல நிற சாயலை அழகாக உருவாக்குவதால் இதற்கு இந்த பெயரிடப்பட்டது.

சதுப்புநில காடுகளே நிரந்தர தங்குமிடம்! 

நீரோட்டங்கள் குறைந்த ஆறுகள் மற்றும் சதுப்புநில பகுதிகள் தான் இவற்றின் விருப்பமான தங்குமிடமாகும். பகல் நேரங்களில் வெளியே வராமல் மணலுக்கு அடியில் அல்லது அழுகிய மரக்கட்டைகளுக்கு கீழே தங்களை மறைத்து கொள்ளும். இரவில் மட்டுமே இவை மிகவும் சுறுசுறுப்பாக இயங்கும். 

நன்கு நீந்தும் திறன் கொண்ட இந்த பாம்புகள் தண்ணீர் வறண்டு போகும் காலங்களில் மட்டும் தற்காலிகமாக காடுகளுக்குள் சென்றுவிட்டு, மீண்டும் தண்ணீர் வந்தவுடன் தங்களது பழைய இடத்திற்கே திரும்பி வந்துவிடும்.

வித்தியாசமான உணவு முறை!

இந்த வகை பாம்புகளின் உணவு முறை மற்ற பாம்புகளை விட மிகவும் வித்தியாசமானது. பெரிய பாம்புகள் பெரும்பாலும் அமெரிக்க விலாங்கு மீன்களை மட்டுமே தங்களது முக்கிய உணவாக விரும்பி வேட்டையாடி சாப்பிடுகின்றன. இதனால் இவற்றை மக்கள் Eel Moccasin என்று அன்பாக அழைக்கின்றனர். ஆனால் சிறிய பாம்புகளுக்கு விலாங்கு மீன்களை வேட்டையாடும் திறன் இல்லாததால் அவை தவளைகள், சிறிய மீன்கள் மற்றும் மண்புழுக்களை சாப்பிட்டு வளர்கின்றன.

பாதுகாப்பு முறை! 

மற்ற ஊர்வன விலங்குகளை போல முட்டையிட்டு விட்டு இவை அப்படியே சென்று விடாது. 10 முதல் 50 முட்டைகள் வரை இடும் பெண் பாம்புகள், அந்த முட்டைகளை சுருண்டு படுத்து அடைகாத்து குஞ்சுகள் பொரிக்கும் வரை அதை மிகவும் பத்திரமாக பாதுகாக்கும். ஆபத்து வரும் சமயங்களில் இவை ஒருபோதும் எதிரிகளை கடிக்க முற்படாது.

அதற்கு பதிலாக தனது தலையை சுருட்டிக்கொண்டு வாலில் உள்ள கூர்மையான பகுதியை எதிரிகளுக்கு காட்டி பயமுறுத்தும் ஒரு விசித்திரமான தற்காப்பு உத்தியை மட்டுமே இவை எப்போதுமே கையாளுகின்றன.

இந்த பாம்புகளுக்கு தற்போது பெரிய அளவிலான ஆபத்துகள் எதுவும் இல்லை என்றாலும் பல்வேறு காரணங்களால் அவற்றின் இருப்பிடங்கள் கொஞ்சம் கொஞ்சமாக சுருங்கி வருகின்றன. சதுப்புநிலங்களை நாம் கவனமாக பாதுகாப்பது மட்டுமே இந்த ரெயின்போ பாம்பு இனத்தை அழிவில் இருந்து காப்பாற்ற உதவும் ஒரே வழியாகும்.