பைக் ஓட்டுநர்களே உஷார்! கோடை பயணத்திற்கான தற்காப்பு நடவடிக்கைகள்!

இயற்கையின் சுழற்சியில் கோடைக்காலம் என்பது தவிர்க்க முடியாத ஒன்று. ஆனால், தற்போதைய காலமாற்றத்தினால் வெயிலின் தாக்கம் முன்னெப்போதையும் விட அதிகமாக உள்ளது. குறிப்பாக, வாழ்வாதாரத்திற்காகவும், அலுவலகப் பணிகளுக்காகவும் தினமும் இருசக்கர வாகனங்களில் பயணிப்பவர்கள் இந்த வெப்பத்தினால் பெரும் சவால்களைச் சந்திக்கின்றனர். உடல் சோர்வு, நீர்ச்சத்து குறைபாடு மற்றும் வாகனப்பாதிப்புகள் எனப் பல சிக்கல்கள் இதில் அடங்கும். இத்தகைய சவால்களை முறியடித்து கோடைக்காலப் பயணத்தை எவ்வாறு பாதுகாப்பானதாக மாற்றலாம் என்பதை பற்றி பார்க்கலாம்.

ஓட்டுநர்களுக்கான தற்காப்பு நடவடிக்கைகள்

உடல் நீரேற்றம் (Hydration): தாகம் எடுக்கும் வரை காத்திருக்காமல், அவ்வப்போது தண்ணீர் குடிக்கவேண்டும். இளநீர், பழச்சாறுகள் அல்லது எலுமிச்சை சாறு போன்றவற்றை அருந்துவது உடல் சூட்டைத் தணிக்கும்.

சரியான ஆடைகள்: கருப்பு நிற ஆடைகளைத் தவிர்த்து, வெளிர் நிற பருத்தி (Cotton) ஆடைகளை அணியுங்கள். இவை காற்றோட்டமாகவும், வியர்வையை உறிஞ்சக் கூடியதாகவும் இருக்கும். கை மற்றும் கால்கள் வெயிலில் நேரடியாகப்படாமல் இருக்க ‘Full Sleeves’ சட்டைகளை அணியலாம்.

பாதுகாப்பு உபகரணங்கள்

ஹெல்மெட்: தலையில் வியர்வை தேங்காமல் இருக்க காற்றோட்ட வசதி கொண்ட (Ventilated) ஹெல்மெட்களைப் பயன்படுத்துவது நல்லது.

கூலிங் கிளாஸ்: கண்களை சூரியனின் UV கதிர்களில் இருந்து பாதுகாக்கத் தரமான கூலிங் கிளாஸ் அணியலாம்.

கிளவுஸ்: கைகள் கருப்பாவதைத் தடுக்கவும், பிடிமானம் (Grip) சரியாக இருக்கவும் காற்றோட்டமான கையுறைகளை அணியலாம்.

பயண நேரம்: முடிந்தவரை மதியம் 12 மணி முதல் 3 மணி வரை பைக் ஓட்டுவதைத் தவிர்க்கவும். நீண்ட தூரப்பயணம் என்றால், அடிக்கடி நிழலில் ஓய்வெடுத்துச் செல்லுங்கள்.

வாகனப் பராமரிப்பு குறிப்புகள்

இன்ஜின் ஆயில் (Engine Oil): கோடையில் இன்ஜின் அதிக வெப்பமடையும் என்பதால், இன்ஜின் ஆயில் சரியான அளவில் உள்ளதா எனச் சரிபார்க்கவும். தேவைப்பட்டால் புதிய ஆயில் மாற்றுவது இன்ஜினின் ஆயுளைக் காக்கும்.

டயர் பராமரிப்பு: வெப்பம் காரணமாக டயரில் உள்ள காற்று விரிவடையும். எனவே, நிறுவனப் பரிந்துரையின்படி சரியான காற்று அழுத்தத்தைப் (Tyre Pressure) பராமரிக்கவும். டயர்களில் விரிசல்கள் இருக்கிறதா என்பதையும் கவனிக்கவும்.

பேட்டரி: வெயிலினால் பேட்டரியில் உள்ள திரவம் (Distilled Water) சீக்கிரம் ஆவியாக வாய்ப்புள்ளது. அதனால் பேட்டரி திரவத்தின் அளவை அடிக்கடி சரிபார்க்கவும்.

பெட்ரோல் டேங்க்: பெட்ரோல் ஆவியாவதைத் தடுக்கவும், வர்ணம் மங்காமல் இருக்கவும் பைக்கை எப்போதும் நிழலில் நிறுத்துங்கள். வெயிலில் நிறுத்த வேண்டிய சூழல் ஏற்பட்டால், டேங்க் கவர் பயன்படுத்துவது நல்லது.

ஏர் ஃபில்டர்: கோடையில் தூசு அதிகமாக இருக்கும் என்பதால், ஏர் ஃபில்டரை அவ்வப்போது சுத்தம் செய்வது மைலேஜை அதிகரிக்க உதவும்.

முக்கியமாக நீண்ட தூரம் ஓட்டிய பிறகு உடனடியாக பைக்கை ‘வாட்டர் வாஷ்’ செய்யாதீர்கள். இன்ஜின் சூடாக இருக்கும்போது குளிர்ந்த நீர் பட்டால் உலோகப் பாகங்களில் பாதிப்பு ஏற்படலாம்.

“வருமுன் காப்பதே சிறந்தது” என்ற பழமொழி கோடைக்காலப் பயணத்திற்கு மிகப் பொருத்தமானது. முறையான திட்டமிடலும், சிறிய முன்னெச்சரிக்கை நடவடிக்கைகளும் நம்மை வெப்பத்தின் பிடியிலிருந்து பாதுகாக்கும். தகுந்த பாதுகாப்பு உபகரணங்களுடன், வாகனத்தை முறையாகப் பராமரித்து ஓட்டினால், சுட்டெரிக்கும் கோடையிலும் நமது பயணம் தடையின்றி இனிமையாக அமையும். வெயிலின் தாக்கத்தை உணர்ந்து விழிப்புணர்வுடன் செயல்படுவதே விவேகமான ஓட்டுநருக்கு அழகு.