சுவையும் சத்தும் நிறைந்த பீர்க்கங்காய் ரெசிபிகள்: பஜ்ஜி, குருமா செய்வது எப்படி?

பீர்க்கங்காய் குருமா

தேவை:

பீர்க்கங்காய் - 250 கிராம் மிளகாய் தூள், மல்லி தூள், மஞ்சள் தூள் - தலா ஒரு ஸ்பூன்

எண்ணெய் - கால் கப்

சின்ன வெங்காயம் - அரை கப்

இஞ்சி பூண்டு விழுது - ஒரு ஸ்பூன்

தேங்காய்த் துருவல் - கால் கப்

பொட்டுக்கடலை - ஒரு ஸ்பூன்

சோம்பு - கால் ஸ்பூன்

தக்காளி - 2

செய்முறை:

குக்கரை அடுப்பில் வைத்து எண்ணெய் ஊற்றவும் இதில் வெங்காயம் அரைத்து விழுதாக சேர்த்து வதக்கவும். இதோடு இஞ்சி பூண்டு விழுது சேர்க்கவும் பச்சை வாசனை போக வதக்கிகொள்ள வேண்டும்.

நறுக்கிய பீர்க்கங்காயை சேர்த்து தேவையான அளவு உப்பு மஞ்சள் தூள் மிளகாய் தூள் மல்லித்தூள் சேர்த்து இரண்டு நிமிடம் வதக்கவும்.

பொட்டுக்கடலை தேங்காய் சோம்பு இவற்றை மிக்ஸியில் அரைக்கவும் நன்றாக அரைத்த பின் தக்காளியை நறுக்கி சேர்த்து இதோடு அரைத்து எடுக்கவும் இந்த விழுதை குழம்பில் சேர்த்து தேவையான அளவு உப்பு சேர்த்து குக்கரை மூடி இரண்டு விசில் வேகவிட்டால் சூப்பரான பீர்க்கங்காய் குருமா தயார்!

பீர்க்கங்காய் தொக்கு

தேவை:

பீர்க்கங்காய் – அரை கிலோ, பெரிய வெங்காயம் – 1, பச்சை மிளகாய் – 5, புளி – ஒரு பெரிய நெல்லிக்காய் அளவு,

தேங்காய்த் துருவல் – கால் கப்,

உப்பு – 2 டீஸ்பூன், மஞ்சள்தூள் – அரை டீஸ்பூன்.

தாளிக்க:

கடுகு – 1 டீஸ்பூன், உளுத்தம்பருப்பு – 1 டீஸ்பூன், கடலைப்பருப்பு – 1 டீஸ்பூன், பெருங்காயம் – 1 டீஸ்பூன், காய்ந்த மிளகாய் – 3, எண்ணெய் – 2 டீஸ்பூன்.

செய்முறை:

பீர்க்கங்காயைக் கழுவித்துடைத்து, தோல் நீக்கி, சிறு துண்டுகளாக நறுக்குங்கள். வெங்காயத்தைத் தோலுரித்து, சிறு துண்டுகளாக நறுக்குங்கள். பச்சை மிளகாயைக் கீறிக்கொள்ளுங்கள்.

எண்ணெயைக் காயவைத்து, கடுகு, பெருங்காயம், உளுத்தம்பருப்பு, கடலைப் பருப்பு, காய்ந்த மிளகாய் போட்டுத் தாளித்து, பீர்க்கங்காய், வெங்காயம், பச்சை மிளகாய் சேர்த்து நன்கு வதக்குங்கள். பீர்க்கங்காய் வதங்கியதும், அதனுடன் தேங்காய், உப்பு, மஞ்சள் தூள், புளி சேர்த்து, மீண்டும் நன்கு வதக்குங்கள். ஆறியதும் கரகரப்பாக அரையுங்கள். அல்டிமேட் சுவையில் பீர்க்கங்காய் தொக்கு ரெடி.

பீர்க்கங்காய் ஊறுகாய்.

தேவை:

பீர்க்கங்காய் - கால் கிலோ

புளி - நெல்லிக்காய் அளவு

எண்ணெய் - தேவையான அளவு

கடுகு, வெந்தயம், பெருங்காயத்தூள் - தலா அரை டீஸ்பூன்

கறிவேப்பிலை - 1 கொத்து

உப்பு - தேவையான அளவு

செய்முறை:

தேவையான பீர்க்கங்காயை நன்கு அலசி விட்டு தோல் சீவி சின்ன துண்டுகளாக நறுக்கி வைத்துக்கொள்ளவும்.

ஒரு கடாயை அடுப்பில் வைத்து எண்ணெய் ஊற்றி‌ காய்ந்ததும் நறுக்கிய பீர்க்கங்காய் சேர்த்து நன்கு வதக்கவும்.

பின் இது ஆறியதும் இதனை ஒரு மிக்ஸி ஜாரில் சேர்த்து அதனுடன் புளி சேர்த்து நன்கு அரைத்துக் கொள்ளவும்.

ஒரு கடாயை அடுப்பில் வைத்து எண்ணெய் ஊற்றி காய்ந்ததும் கடுகு, வெந்தயம், பெருங்காயம், கருவேப்பிலை சேர்த்து தாளிக்கவும். பின் அதில் நாம் அரைத்து வைத்துள்ள விழுது, மிளகாய் தூள் மற்றும் உப்பு சேர்த்து வதக்கவும்.

பின் புளியின் பச்சை வாசனை போகும் வரை நன்கு வதக்கவும்.

இது நன்கு சுருண்டு வந்ததும் அடுப்பை அணைத்து விடவும். சுவையான மற்றும் காரசாரமான பீர்க்கங்காய் ஊறுகாய் தயார்.

இது தயிர் சாதத்திற்கு மட்டுமல்லாமல் இட்லி தோசைக்கு கூட தொட்டுக்கொள்ள அருமையாக இருக்கும்.

பீர்க்கங்காய் பஜ்ஜி

தேவை:

பீர்க்கங்காய் - 1,

கடலை மாவு, அரிசி மாவு - தலா ஒரு கப்,

மிளகாய்த்தூள் - ஒரு டீஸ்பூன்,

சோள மாவு - 2 டீஸ்பூன்,

உப்பு, எண்ணெய் - தேவையான அளவு.

செய்முறை:

ஒரு பாத்திரத்தில் கடலை மாவு, அரிசி மாவு, சோளமாவு, உப்பு, மிளகாய்த்தூள் சேர்த்து, தண்ணீர் விட்டு கெட்டியாகக் கரைத்துக்கொள்ளவும். பீர்க்கங்காயை தோல் சீவி வில்லைகளாக நறுக்கி, மாவில் தோய்த்து, காயும் எண்ணெயில் போட்டு எடுக்கவும்.

சுவையான பீர்க்கங்காய் பஜ்ஜி ரெடி. இதற்கு தொட்டுக்கொள்ள தேங்காய் சட்னி வெகு பொருத்தம்.