ஒரே நெல்லிக்காய், நான்குவித சுவைகள்! நோய்களை விரட்டி அடிக்கும் இந்த ரெசிபிகளை மிஸ் பண்ணாதீங்க!

நெல்லிக்காய் முரபா, கஞ்சி, துவையல், ரசம், என பலவகை ருசிகள் மூலம் இதன் மருத்துவக்குணங்களை சுவையாக உணவாக்க முடிகிறது. இவை ஜீரணத்தையும், ரத்தத்தையும், தோலின் ஆரோக்கியத்தையும் மேம்படுத்துகின்றன. இவற்றை எவ்வாறு செய்யலாம் என்பதை இந்த பதிவில் பார்க்கலாம்

நெல்லிக்காய் முரபா (Amla Murabba)

தேவையானவை:

நெல்லிக்காய் – 250 கிராம்

சர்க்கரை – 300 கிராம்

ஏலக்காய் – 2

இஞ்சி சாறு – 1 ஸ்பூன்

நீர் – 2 கப்

லெமன் ஜூஸ் – 1 ஸ்பூன்

செய்முறை:

நெல்லிக்காயை கழுவி, துளையிடாமல் நீரில் 3-4 நிமிடம் வேகவைக்கவும். வெந்து வந்ததும், நீரை வடிக்கட்டி கையால் சிறிது அழுத்தி உள்ளே சாறு எடுக்கவும். பிறகு மற்றொரு பாத்திரத்தில் 2 கப் தண்ணீர் + சர்க்கரை சேர்த்து பாகு செய்யவும். பாகு சீராக வந்ததும், அதில் நெல்லிக்காயை போடவும். இஞ்சி சாறு, ஏலக்காய் தூள் சேர்க்கவும். சக்கரை நன்றாக நெல்லிக்காயில் ஊறியதும், தீயை அடக்கி குளிர வைக்கவும். இனிப்பு நெல்லிக்காய் முரபா தயார். கண்ணாடி ஜாடியில் வைத்தால் அதிக நாள் நிலைக்கும்.

காலை வெறும் வயிற்றில் 1 நெல்லிக்காய் முரபா சாப்பிட்டால் ஜீரணம் மேம்படும், ரத்தம் சுத்திகரிக்கும்.

நெல்லிக்காய் கஞ்சி (Amla Kanji)

தேவையானவை:

நெல்லிக்காய் – 4

சாதம் – 3 மேசை கரண்டி

பூண்டு – 2 பல்

மிளகு – 1 மேசை கரண்டி

சின்ன வெங்காயம் – 3

சீரகம் – ½ மேசை கரண்டி

உப்பு – தேவைக்கு

எண்ணெய் – 1 மேசை கரண்டி

கறிவேப்பிலை – சிறிது

செய்முறை:

நெல்லிக்காயை நன்கு வேகவைத்து, விதையை அகற்றி அரைத்துக் கொள்ளவும். சாதத்தையும் வெங்காயம், பூண்டு, மிளகு, சீரகம் சேர்த்து நன்றாக குழையும் வரை வேகவைக்கவும். பின்பு, நெல்லிக்காய் விழுதையும் சேர்த்து கலந்து, தேவையான உப்பும் போட்டு சில நிமிடம் கொதிக்க விடவும். கடைசியாக சிறிது எண்ணெயில் கறிவேப்பிலை தாளித்து சேர்க்கவும். சூடாக பரிமாறலாம்.

இது ஒரு மருத்துவ கஞ்சி போல செயல்படும். கோடைக்காலத்தில் சிறந்த உடல் சத்து மற்றும் ஜீரண சக்தி தரும்.

நெல்லிக்காய் துண்டு துவையல்

தேவையானவை:

நெல்லிக்காய் – 6

துவரம்பருப்பு – 1 மேசை கரண்டி

வெந்தயம் – ¼ மேசை கரண்டி

சுக்கு – சிறிய துண்டு

வத்தல் மிளகாய் – 2

உப்பு – தேவைக்கு

எண்ணெய் – 2 மேசை கரண்டி

செய்முறை:

கடாயில் எண்ணெய் ஊற்றி, பருப்பு, மிளகாய், சுக்கு, வெந்தயம் வறுக்கவும். அதனுடன் நெல்லிக்காயை சேர்த்து, நன்கு வதக்கவும். அனைத்தையும் உப்பு சேர்த்து மிக்ஸியில் அரைத்து துவையல் தயார் செய்யவும்.

நெல்லிக்காய் ரசம்

தேவையானவை:

நெல்லிக்காய் – 3

தக்காளி – 1

பூண்டு – 4 பல்லி

மிளகு + ஜீரகம் – 1 மேசை கரண்டி

துவரம்பருப்பு நீர் – ½ கப்

கருவேப்பிலை, கொத்தமல்லி – சிறிது

உப்பு, பெருங்காயம் – தேவைக்கு

எண்ணெய் – 1 மேசை கரண்டி

கடுகு – சிறிது

செய்முறை:

நெல்லிக்காயையும் தக்காளியையும் அரைத்து வைக்கவும். கடாயில் எண்ணெய் ஊற்றி கடுகு, கருவேப்பிலை தாளிக்கவும். அரைத்த கலவையை, துவரம்பருப்பு நீர், மிளகு-ஜீரக தூள், உப்பு சேர்த்து கொதிக்கவிடவும். நன்றாக ரசமாக வந்தவுடன் இறக்கி கொத்தமல்லி தூவி பரிமாறவும்.

நெல்லிக்காயை உணவில் அடிக்கடி சேர்த்தால், அது ஒரு இயற்கையான மருந்தாகப் பணிபுரிகிறது. இனிமையும் சத்தும் ஒன்றாக இணையும் நெல்லிக்காய் ரெசிபிகள், உங்கள் குடும்பத்தின் ஆரோக்கியத்தை உறுதிப்படுத்தும் ஒரு சிறந்த வழியாக அமையும்.