பேச்சிலர்களின் வரப்பிரசாதம் எலக்ட்ரிக் கெட்டில்... சுவையான 8 காலை உணவுகளை ஈஸியாக செய்யலாம்!

காலையில் அவசரமாக ஆபீஸுக்கோ, காலேஜுக்கோ கிளம்பும் பரபரப்பான நேரத்தில், திடீரென கேஸ் சிலிண்டர் தீர்ந்துவிட்டால் ஏற்படும் பதற்றம் கொஞ்ச நஞ்சமல்ல. அந்த டென்ஷனில் காலை உணவை தவிர்த்துவிட்டு பட்டினியாக செல்பவர்கள்தான் இங்கு அதிகம். சாப்பாட்டுக்கு என்ன செய்வது என்று குழம்பிப்போய் ஆன்லைனில் விலை உயர்ந்த உணவுகளை ஆர்டர் செய்வதை விட, உங்கள் வீட்டில் ஒரு மூலையில் தூங்கும் சிறிய எலக்ட்ரிக் கெட்டில் (Electric Kettle) பெரிய ஆபத்பாந்தவனாக மாறும். 

சுடுதண்ணீர் வைக்க மட்டுமே இது பயன்படும் என நினைப்பது மிகப்பெரிய தவறு. அடுப்பு இல்லாமல் வெறும் கெட்டிலை மட்டுமே பயன்படுத்தி, பத்தே நிமிடங்களில் செய்யக்கூடிய 8 சூப்பரான, ஆரோக்கியமான காலை உணவுகளைப் பற்றி இந்தப் பதிவில் பார்க்கலாம்.

கெட்டிலில் செய்யக்கூடிய 8 உணவுகள்!

1. மேகி: கெட்டிலில் பாதி அளவு தண்ணீர் ஊற்றி கொதித்ததும், மேகி அல்லது உங்களுக்கு பிடித்த இன்ஸ்டன்ட் நூடுல்ஸ் மற்றும் அதன் மசாலாவை சேர்த்து லேசாக மூடி வைத்தால் போதும். சில நிமிடங்களில் சுடச்சுட நூடுல்ஸ் ரெடி ஆகிவிடும்.

2. ஓட்ஸ் கஞ்சி: டயட்டில் இருப்பவர்களுக்கு இது ஒரு அருமையான சாய்ஸ். கொதிக்கும் தண்ணீரில் இன்ஸ்டன்ட் ஓட்ஸ், கொஞ்சம் சர்க்கரை அல்லது உப்பு மற்றும் உலர் பழங்களை சேர்த்தால் அட்டகாசமான ஓட்ஸ் தயார். பால் பவுடர் இருந்தால் அதையும் கலந்து கொள்ளலாம்.

3. முட்டை வேகவைப்பது: கெட்டிலில் தண்ணீர் நிரப்பி, முட்டைகளை உடையாமல் மெதுவாக உள்ளே போட்டு ஆன் செய்தால் போதும். சரியாக பத்து அல்லது பன்னிரண்டு நிமிடங்களில் பெர்ஃபெக்ட்டாக வெந்த முட்டை கிடைத்துவிடும். இது உடலுக்கு நல்ல புரோட்டீன் கொடுக்கும்.

4. சாஃப்டான அவல் உப்புமா: முதலில் கெட்டிலில் தண்ணீரை சூடாக்கி ஒரு பாத்திரத்தில் ஊற்றிக் கொள்ளுங்கள். அதில் கழுவிய அவல், கொஞ்சம் உப்பு, வறுத்த வேர்க்கடலை மற்றும் லேசாக எலுமிச்சை சாறு பிழிந்து நன்கு கலந்து மூடி வைத்தால் சுவையான அவல் ரெடி.

5. சுவையான ரவா உப்புமா: வறுத்த ரவா மற்றும் உப்புமா மிக்ஸ் பாக்கெட்டுகள் இப்போது கடைகளில் மிக சுலபமாக கிடைக்கின்றன. கொதிக்கும் நீரில் அந்த மிக்ஸை கொஞ்சம் கொஞ்சமாக கொட்டி கரண்டியால் கிண்டினால் சூடான ரவா உப்புமா தயார்.

6. மசாலா ஸ்வீட் கார்ன்: கடைகளில் கிடைக்கும் உதிர்க்கப்பட்ட ஸ்வீட் கார்ன் முத்துக்களை கெட்டிலில் போட்டு சில நிமிடங்கள் வேகவைத்து எடுக்கவும். அதனுடன் கொஞ்சம் வெண்ணெய், உப்பு மற்றும் மிளகு தூள் சேர்த்தால் அருமையான பிரேக்பாஸ்ட் கிடைக்கும்.

7. ரெடிமேட் பாஸ்தா: இன்ஸ்டன்ட் பாஸ்தா பாக்கெட்டுகளை வாங்கி வைத்துக்கொண்டால், கெட்டிலில் தண்ணீர் கொதிக்கும்போது அதை கொட்டி ஈசியாக செய்துவிடலாம். சீஸ் பிரியர்களுக்கு இந்த உணவு காலையிலேயே ரொம்பவே உற்சாகத்தை கொடுக்கும்.

8. சூடான காய்கறி சூப்: காலையில் ரொம்பவே லேசாக சாப்பிட நினைப்பவர்கள், ரெடிமேட் காய்கறி சூப் பவுடரை கெட்டிலில் இருக்கும் சுடுநீரில் கலந்து ஒரு சூப்பரான சூப்பாக மாற்றி குடிக்கலாம். இது தொண்டைக்கு ரொம்பவே இதமாக இருக்கும்.

சிலிண்டர் இல்லாத அவசர நேரங்களில் மட்டுமில்லாமல், நாம் வெளியூருக்கு டூர் செல்லும்போது கூட இது ரொம்பவே உதவியாக இருக்கும். இனிமேல் உங்கள் வீட்டில் கேஸ் தீர்ந்துவிட்டால் எந்த ஒரு டென்ஷனும் ஆகாமல், மேலே சொன்ன இந்த கெட்டில் ரெசிபிகளை ரொம்பவே ஜாலியாக ட்ரை செய்து பாருங்கள். உங்கள் நேரமும் மிச்சமாகும், பசியும் ஆறும்.