ஆரோக்கியம் தரும் பிரண்டை: தோசை, துவையல், காரக்குழம்பு, வற்றல் ரெசிபிகள்!

பிரண்டை தோசை

தேவை:

பச்சரிசி - 2 கப்,

புழுங்கலரிசி - 2 கப், உளுத்தம்பருப்பு - முக்கால் கப்,

பிரண்டை (பிஞ்சாக இருக்கவேண்டும்) - அரை கப்,

வெந்தயம் - ஒரு டீஸ்பூன், உப்பு - தேவையான அளவு, எண்ணெய் - தேவையான அளவு.

செய்முறை:

பச்சரிசி, புழுங்கலரிசி, உளுந்து, வெந்தயம் எல்லாவற்றையும் மூன்று மணிநேரம் ஊறவைக்கவும். பிறகு, அவற்றை ஒன்றாக கிரைண்டரில் போட்டு அரைக்கவும். அரிசி பாதி அரைபட்டதும், பிரண்டையை நறுக்கி அதில் போட்டு மீண்டும் அரைக்கவும். மாவு பொங்கப் பொங்க அரைபட்டதும் வழித்து, உப்புப் போட்டுக் கரைத்து, ஒரு இரவு முழுக்க புளிக்க வைக்கவும். பிரண்டைக்கு லேசான அரிக்கும் தன்மை இருப்பதால், மாவு புளித்தால்தான் தோசை நன்றாக இருக்கும். இந்த தோசை வாயுத்தொல்லைக்கு மிகவும் நல்லது.

பிரண்டை துவையல்

தேவை:

இளம் தளிரான கொழுந்துப் பிரண்டைத் துண்டுகள் - ஒரு கைப்பிடி அளவு,

இஞ்சி - ஒரு சிறிய துண்டு,

புளி - ஒரு நெல்லிக்காய் அளவு,

உளுத்தம்பருப்பு - 4 டீஸ்பூன், காய்ந்த மிளகாய் - 2, கறிவேப்பிலை - ஒரு கைப்பிடி அளவு, நல்லெண்ணெய் - 2 டீஸ்பூன், உப்பு - தேவையான அளவு.

செய்முறை:

பிரண்டையைப் பொடியாக நறுக்கவும். கறிவேப்பிலை, இஞ்சி, பிரண்டையை நல்லெண்ணெய் விட்டு வதக்கவும். உளுத்தம்பருப்பு, காய்ந்த மிளகாயை தனியாக நல்லெண்ணெய் விட்டு வறுக்கவும். வறுத்த மிளகாய், உளுத்தம்பருப்பை உப்பு சேர்த்து மிக்ஸியில் அரைக்கவும். சிறிது அரைபட்டவுடன் புளி, வதக்கிய கறிவேப்பிலை, இஞ்சி, பிரண்டையை சேர்த்து கெட்டியாக அரைத்து எடுக்கவும். சுவையான, சத்தான பிரண்டை துவையல் ரெடி.

பிரண்டைக் காரக்குழம்பு

தேவை:

இளம் பிரண்டைத்துண்டுகள் - ஒரு கப் (ஓரத்தில் உள்ள நாரை நீக்கவும்),

தோலுரித்த சின்ன வெங்காயம், பூண்டுப் பல் - தலா 10,

தக்காளி - ஒன்று (பொடியாக நறுக்கவும்),

கறிவேப்பிலை - சிறிதளவு,

பெருங்காயத்தூள் - கால் டீஸ்பூன்,

கடுகு, உளுத்தம்பருப்பு, சீரகம், வெந்தயம் - தலா கால் டீஸ்பூன்,

காய்ந்த மிளகாய் - 2,

சாம்பார் பொடி - 3 டீஸ்பூன்,

மஞ்சள்தூள் - கால் டீஸ்பூன்,

புளி - நெல்லிக்காய் அளவு,

எண்ணெய் - 4 டீஸ்பூன்,

உப்பு - தேவையான அளவு.

செய்முறை:

புளியைத் தண்ணீரில் ஊறவைத்துக் கரைத்து வடிகட்டவும். வாணலியில் எண்ணெய்விட்டுச் சூடாக்கி கடுகு, உளுத்தம்பருப்பு, சீரகம், வெந்தயம், பெருங்காயத்தூள், காய்ந்த மிளகாய் தாளிக்கவும். அதனுடன் வெங்காயம், கறிவேப்பிலை, பூண்டு, பிரண்டைத் துண்டுகள் சேர்த்து நன்றாக வதக்கவும். பிறகு, தக்காளி சேர்த்து வதக்கவும்.

அதனுடன் சாம்பார் பொடி, மஞ்சள்தூள், உப்பு, புளிக்கரைசல் சேர்த்துக் கொதிக்கவிடவும். பிரண்டை நன்றாக வெந்தவுடன் அடுப்பிலிருந்து இறக்கவும். சத்தான பிரண்டை காரக்குழம்பு தயார்.

பிரண்டை வற்றல்

தேவை:

பச்சரிசி - அரை கிலோ

பிரண்டை - கால் கிலோ (பொடியாக நறுக்கியது)

காய்ந்த மிளகாய் - 3

பச்சை மிளகாய் - 3

மஞ்சள் தூள் - 1 டீஸ்பூன்

பெருங்காயத் தூள் - 1 டீஸ்பூன்

உப்பு - தேவைக்கேற்ப

எண்ணெய் - தேவைக்கேற்ப

செய்முறை:

அரிசியை கழுவி, தேவையான தண்ணீர் சேர்த்து, குழைய வேக வைத்துக்கொள்ள வேண்டும். பிரண்டை மற்றும் மிளகாயை சிறிது எண்ணெய் சேர்த்து நன்கு வதக்கி கொள்ளவும்.

வதக்கியவற்றை நன்கு ஆறவைத்து, மிக்சியில் அரைத்துக்கொள்ளவும். குழைய வேகவைத்துள்ள சாதத்துடன், அரைத்த பிரண்டை கலவையை சேர்த்து கலந்துகொள்ள வேண்டும். கலவை கெட்டியாக இருக்க வேண்டும். இதனுடன் தேவையான உப்பு, மஞ்சள் தூள், பெருங்காயத் தூள் சேர்த்து கொள்ளவும்.

இதனை நன்றாக கலந்து, சிறிய நெல்லிக்காய் அளவுக்கு, சிறிது சிறிதாக ஒரு சுத்தமான துணி அல்லது பிளாஸ்டிக் பேப்பரில் வைத்து, 4 அல்லது 5 நாட்கள் நன்றாக காயவைக்க வேண்டும். பின்னர், ஒரு வாணலியில் எண்ணெயை ஊற்றி, நன்கு காய்ந்ததும், காயவைத்துள்ள வற்றலைப் போட்டு பொரித்தெடுத்தால் பிரண்டை வற்றல் ரெடி.