கடைகளில் வாங்குவதை நிறுத்துங்கள்: வீட்டிலேயே தவாவில் உருளைக்கிழங்கு பீஸா!

தேவையான பொருட்கள்:

உருளைக்கிழங்கு அடுக்கிற்கு

சிறிய உருளைக்கிழங்கு – 700 கிராம்

எண்ணெய் – 1 டேபிள்ஸ்பூன்

மேல் கலவைக்கு:

ப்ரோக்கோலி பூக்கள் – 3 கப்

கடலைமாவு – 1 கப்

தண்ணீர் – 1¼ கப்

துருவிய பாலாடைக்கட்டி

(விருப்பப்பட்டால்) – ½ கப்

பூண்டு பொடி – 1 டீஸ்பூன்

வெங்காய பொடி – 1 டீஸ்பூன்

மிளகுத்தூள் – ½ டீஸ்பூன்

உப்பு – தேவைக்கேற்ப

செய்முறை:

உருளைக்கிழங்குகளை நன்கு கழுவி வேகவைத்து, தோலுடன் மசித்துக்கொள்ளவும். தடிமனான தோசைக்கல் அல்லது அகலமான தவாவில் சிறிதளவு எண்ணெய் தடவி, மசித்த உருளைக்கிழங்கை அடிப்பகுதியிலும் ஓரங்களிலும் சமமாகப் பரப்பி, பீஸா அடிப்பகுதி போல் அமைத்துக்கொள்ளவும்.

ப்ரோக்கோலியை கொதிக்கும் நீரில் இரண்டு நிமிடங்கள் வேகவைத்து வடிகட்டவும். கடலைமாவு, தண்ணீர், பூண்டு பொடி, வெங்காய பொடி, மிளகுத்தூள், உப்பு ஆகியவற்றைச் சேர்த்து கட்டியில்லாமல் கலக்கவும். விருப்பமிருந்தால் துருவிய பாலாடைக்கட்டியையும் சேர்க்கலாம்.

உருளைக்கிழங்கு அடுக்கின் மேல் ப்ரோக்கோலியைச் சீராகப் பரப்பி, அதன் மீது கடலைமாவுக் கலவையை ஊற்றவும். தவாவை மூடி, மிகக் குறைந்த தீயில் 25 முதல் 30 நிமிடங்கள் வரை வேகவிடவும். கலவை முழுமையாக வெந்து உறுதியானதும் அடுப்பிலிருந்து இறக்கி, சிறிது நேரம் ஆறவிடவும். பின்னர் துண்டுகளாக வெட்டி, தக்காளி சாஸ் அல்லது புதினா சட்னியுடன் பரிமாறலாம்.

சத்துக் குறிப்பு:

ப்ரோக்கோலியில் உள்ள ஆன்டி-ஆக்ஸிடென்ட்கள் உடலின் நோய் எதிர்ப்புச் சக்தியை மேம்படுத்த உதவுகின்றன. உருளைக்கிழங்கு உடலுக்கு ஆற்றலை வழங்குகிறது. கடலைமாவு தாவரப் புரதத்தின் சிறந்த ஆதாரமாக இருப்பதால், இந்த உருளைக்கிழங்கு பீஸா சுவையுடனும் சத்துடனும் கூடிய முழுமையான சிற்றுண்டியாக அமைகிறது.

உருளைக்கிழங்கு பீஸாவுக்கு ஏற்றவாறு, வீட்டிலேயே செய்யக்கூடிய சுவையான தக்காளி சாஸ் இதோ:

வீட்டுத் தயாரிப்பு தக்காளி சாஸ்

உருளைக்கிழங்கு பீஸா, சாண்ட்விச், கட்லெட் போன்ற சிற்றுண்டிகளுடன் பரிமாற ஏற்ற இந்தத் தக்காளி சாஸ், அதிக காரமில்லாமல் குழந்தைகளும் விரும்பிச் சாப்பிடும் வகையில் தயாரிக்கலாம்.

தேவையான பொருட்கள்:

நன்கு பழுத்த தக்காளி – 5

பூண்டு பற்கள் – 4

பெரிய வெங்காயம் – 1 (சிறியது)

மிளகாய்த்தூள் – ½ டீஸ்பூன்

மிளகுத்தூள் – ¼ டீஸ்பூன்

சர்க்கரை அல்லது நாட்டு சர்க்கரை – 1 டீஸ்பூன்

உப்பு – தேவைக்கேற்ப

ஆலிவ் எண்ணெய் அல்லது சமையல் எண்ணெய் – 1 டீஸ்பூன்

வினிகர் அல்லது எலுமிச்சைச் சாறு – 1 டீஸ்பூன்

செய்முறை:

தக்காளியை நான்கு துண்டுகளாக நறுக்கிக்கொள்ளவும். ஒரு வாணலியில் சிறிதளவு எண்ணெய் சேர்த்து, நறுக்கிய வெங்காயம் மற்றும் பூண்டை லேசாக வதக்கவும்.

பின்னர் தக்காளித் துண்டுகளைச் சேர்த்து, சிறிதளவு உப்பு போட்டு மூடி வைத்து மென்மையாகும் வரை வேகவிடவும். ஆறியதும் இதை அரைத்துக்கொள்ளவும்.

அரைத்த விழுதை மீண்டும் பாத்திரத்தில் ஊற்றி, மிளகாய்த்தூள், மிளகுத்தூள், சர்க்கரை சேர்த்து மிதமான தீயில் சிறிது நேரம் கொதிக்கவிடவும். சாஸ் கெட்டியானதும் வினிகர் அல்லது எலுமிச்சைச் சாறு சேர்த்து இறக்கவும்.

ஆறிய பிறகு கண்ணாடி பாட்டிலில் சேமித்து வைத்து பயன்படுத்தலாம். இந்த சாஸ் உருளைக்கிழங்கு பீஸாவின் மென்மையான சுவைக்கு நல்ல காரமும் புளிப்பும் கலந்த சுவையைத் தரும்.

சத்துக்கள் நிறைந்த காய்கறிகளையும் உருளைக்கிழங்கையும் பயன்படுத்தி, குழந்தைகள் விரும்பி உண்ணும் ஆரோக்கியமான மாற்று உணவை வீட்டிலேயே எளிதாகப் பெறலாம்.