ஹோட்டல் ரசம் கூட தோத்துடும்… வீட்ல புதினா இருந்தா இப்படி ஒரு முறை ட்ரை பண்ணுங்க!

தக்காளி, மிளகு, பூண்டு என்று பல வகையான ரசங்களை நாம் தொடர்ந்து செய்து சாப்பிட்டிருப்போம். ஆனால், எப்போதாவது கொஞ்சம் வித்தியாசமாக, அதே சமயம் உடலுக்கு அதிக புத்துணர்ச்சி தரக்கூடிய ஒரு ரெசிபியை முயற்சி செய்ய நினைத்தால், உங்களின் முதல் தேர்வு புதினா ரசம் ஆகத்தான் இருக்க வேண்டும். புதினாவில் உள்ள இயற்கையான மருத்துவ குணங்கள் செரிமானப் பிரச்சனைகளைச் சரிசெய்வதோடு, நெஞ்செரிச்சல், சளி மற்றும் வாயுத் தொல்லையையும் நீக்கப் பெருமளவு உதவுகிறது. 

குறிப்பாக, பசியின்மை பிரச்சனை உள்ள குழந்தைகளுக்கு இதைக் கொடுத்தால், பசியைத் தூண்டி நன்றாகச் சாப்பிட வைக்கும். எந்தவிதமான செயற்கை மசாலாக்களும் இல்லாமல், வீட்டிலேயே மிக எளிமையான பொருட்களை வைத்து, கமகமக்கும் வாசனையுடன் இதை எப்படி செய்வது என்று பார்க்கலாம் வாங்க.

தேவையான பொருட்கள்:

• புதினா இலைகள் - 1 கைப்பிடி அளவு

• புளி - ஒரு சிறிய நெல்லிக்காய் அளவு

• தக்காளி - 1 

• பூண்டு - 5 பற்கள்

• சீரகம் - 1 டீஸ்பூன்

• மிளகு - 1/2 டீஸ்பூன்

• காய்ந்த மிளகாய் - 2

• மஞ்சள் தூள் - 1/4 டீஸ்பூன்

• பெருங்காயத் தூள் - 1/4 டீஸ்பூன்

• கடுகு, உளுத்தம் பருப்பு - தலா 1/2 டீஸ்பூன்

• நெய் அல்லது நல்லெண்ணெய் - 1 டேபிள் ஸ்பூன்

• கல் உப்பு - தேவையான அளவு

• கொத்தமல்லி இலைகள் - சிறிதளவு

செய்முறை! 

இந்த ரெசிபியின் தனித்துவமான சுவையே நாம் அரைத்துச் சேர்க்கும் விழுதில் தான் உள்ளது. முதலில் ஒரு மிக்ஸி ஜாரில் சுத்தம் செய்த புதினா இலைகளைச் சேர்த்துக் கொள்ளுங்கள். அதனுடன் சீரகம், மிளகு, தோல் உரித்த பூண்டு பற்கள் மற்றும் ஒரு காய்ந்த மிளகாய் ஆகியவற்றைச் சேர்க்க வேண்டும். தண்ணீர் எதுவும் ஊற்றாமல், இதை லேசாக கொரகொரப்பாக அரைத்து எடுத்துக் கொள்ளுங்கள். 

புதினாவை மைய அரைத்துப் பேஸ்ட் போல ஆக்கிவிட்டால், அதன் அசல் வாசனை மாறிவிடும். எனவே கொரகொரப்பாக அரைப்பதுதான் இந்த புதினா ரசம் நீண்ட நேரம் மணக்க முக்கிய காரணம். புதினாவை வதக்கத் தேவையில்லை, பச்சையாக அரைக்கும்போதுதான் அதிலிருக்கும் முழுமையான மருத்துவச் சத்துக்கள் ரசத்தில் இறங்கும்.

இப்போது ஒரு பாத்திரத்தில் நெல்லிக்காய் அளவு புளியைக் கரைத்து வடிகட்டி ஊற்றி, அதில் ஒரு பழுத்த தக்காளியைக் கைகளால் நன்றாகப் பிசைந்து கரைத்து விடுங்கள். இத்துடன் மஞ்சள் தூள், தேவையான அளவு கல் உப்பு மற்றும் நாம் அரைத்து வைத்துள்ள புதினா விழுதைச் சேர்த்து, சுமார் 2 கப் தண்ணீர் ஊற்றிக் கலக்கிக் கொள்ளுங்கள். 

அடுப்பில் ஒரு பாத்திரத்தை வைத்து, அதில் ஒரு ஸ்பூன் நெய் அல்லது நல்லெண்ணெய் ஊற்றி சூடாக்கவும். நெய் சூடானதும் கடுகு, உளுத்தம் பருப்பு, ஒரு காய்ந்த மிளகாய் மற்றும் சீரணத்தை அதிகப்படுத்தும் பெருங்காயத் தூள் சேர்த்துத் தாளித்து, அதில் நாம் கலந்து வைத்துள்ள ரசக் கலவையை ஊற்றுங்கள்.

தாளித்த கலவையை மிதமான தீயில் மட்டுமே கொதிக்க வைக்க வேண்டும். ரசம் எப்போதுமே தளதளவென அதிக நேரம் கொதிக்கக் கூடாது; ஓரங்களில் நுரை கட்டிக்கொண்டு லேசாகக் கொதிக்கத் தொடங்கும்போதே உடனடியாக அடுப்பை அணைத்துவிட வேண்டும். இறுதியாகச் சிறிது பொடியாக நறுக்கிய கொத்தமல்லி இலைகளைத் தூவினால், சமையலறையே மணக்கும் புத்துணர்ச்சியான புதினா ரசம் தயார். 

இன்றேஇந்த ஆரோக்கியமான ரெசிபியை உங்கள் வீட்டில் செய்து குடும்பத்தினரின் பாராட்டுகளைப் பெறுங்கள்.