சீதாப்பழத்தின் தனித்துவமான சுவையில் பாயசம், குல்ஃபி, லஸ்ஸி செய்வது எப்படி?

சீதாப்பழ பாயாசம்

தேவையான பொருட்கள்:

சீதாப்பழம் – 3 (பழச்சதை மட்டும் எடுத்து கருவை நீக்கவும்)

பால் – ½ லிட்டர்

சர்க்கரை – ½ கப்

ஏலக்காய் தூள் – ½ டீஸ்பூன்

முந்திரி, திராட்சை – 2 டேபிள்ஸ்பூன் (நெய்யில் வறுத்தது)

நெய் – 1 டீஸ்பூன்

செய்முறை:

பாலை கொதிக்கவைத்து, நடுத்தர தீயில் கொஞ்சம் அடர்த்தியாகும் வரை வேகவைக்கவும். பால் கொதிக்கும்போது அதில் சர்க்கரை சேர்த்து நன்றாக கரையவிடவும். பிறகு அடுப்பை அணைத்து, பாலை முழுமையாக குளிரவிடவும். குளிர்ந்த பாலை எடுத்துக் கொண்டு அதில் சீதாப்பழ சதை மற்றும் ஏலக்காய் தூள் சேர்த்து மெதுவாக கலந்துவிடவும். மேலே நெய்யில் வறுத்த முந்திரி, திராட்சை தூவி பரிமாறவும்.

சீதாப்பழம் எப்போதும் முழுவதும் பழுத்தது மட்டுமே பயன்படுத்தவும். பால் சூடாக இருக்கும்போது சேர்த்தால் பால் திரிந்து போய்விடும், அதனால் குளிர்ந்த பின்தான் சேர்க்கவேண்டும். இந்த பாயாசம் குளிரவைத்து சாப்பிட்டால் இன்னும் ருசியாக இருக்கும்.

சீதாப்பழ குல்ஃபி

இது ஒரு தனி சுவைகொண்ட, குளிர்ந்த இனிப்பு. இதை வீட்டிலேயே எளிதாக செய்யலாம். இதை செய்ய

தேவையான பொருட்கள்:

பால் – ½ லிட்டர்

கண்டென்ஸ்டு மில்க் – ½ கப்

சீதாப்பழ சதை – 1 கப்

சர்க்கரை – 3 டேபிள்ஸ்பூன்

ஏலக்காய் தூள் – ½ டீஸ்பூன்

முந்திரி, பாதாம் – 2 டேபிள்ஸ்பூன் (நறுக்கியது)

செய்முறை:

முதலில் பாலை ஒரு கனமான பாத்திரத்தில் ஊற்றி நடுத்தர தீயில் கொதிக்கவிடவும். பால் கொதிக்கும்போது அடிக்கடி கிளறி, பால் பாதியாக குறையும்வரை வேகவைக்கவும். அதில் கண்டென்ஸ்டு மில்க் மற்றும் சர்க்கரை சேர்த்து நன்றாக கலக்கவும். அடுப்பை அணைத்து பாலை முழுமையாக குளிரவிடவும். பால் குளிர்ந்த பிறகு, அதில் சீதாப்பழ சதை, ஏலக்காய் தூள், நறுக்கிய முந்திரி, பாதாம் சேர்த்து மெதுவாக கலக்கவும். இந்த கலவையை குல்ஃபி மோல்ட்களில் அல்லது சிறிய பிளாஸ்டிக் கப்-களில் ஊற்றி, மூடி 6–7 மணி நேரம் ஃப்ரீசரில் வைக்கவும். உறைந்த பிறகு மோல்டில் இருந்து எடுத்து பரிமாறவும்.

பால் குளிர்ந்த பிறகுதான் சீதாப்பழம் சேர்க்க வேண்டும்; இல்லையெனில் பால் புளித்துவிடும். குல்ஃபி இன்னும் ரிச்சாக வேண்டுமெனில் கிரீம் (½ கப்) சேர்க்கலாம். குழந்தைகளுக்கு பிடிக்க சிறிது சாக்லேட் சிரப் ஊற்றி பரிமாறலாம்.

சீதாப்பழ லஸ்ஸி

தேவையான பொருட்கள்:

சீதாப்பழம் – 2 (பழுத்தது, சதை மட்டும் எடுக்கவும்)

தயிர் – 1 கப் (குளிர்ந்தது)

பால் – ¼ கப் (விருப்பப்படி)

தேன் அல்லது சர்க்கரை – 2 டேபிள்ஸ்பூன்

ஏலக்காய் தூள் – 1 சிட்டிகை

ஐஸ் கட்டி – தேவையான அளவு

செய்முறை:

சீதாப்பழத்தின் கருவை நீக்கி சதை மட்டும் எடுக்கவும். மிக்ஸியில் தயிர், சீதாப்பழ சதை, தேன்/சர்க்கரை, பால் சேர்த்து நன்றாக அரைக்கவும். கண்ணாடி குவளையில் ஊற்றி, மேலே ஏலக்காய் தூள் தூவவும். குளிர்ந்த ஐஸ் கட்டி சேர்த்து பரிமாறவும்.

சீதாப்பழம் மிகவும் இனிப்பு இருந்தால் சர்க்கரை குறைவாகவே போதும். கூடுதல் சுவைக்கு ரோஜா எசன்ஸ் அல்லது குங்குமப்பூ சேர்த்துக்கொள்ளலாம். மேலே பாதாம், முந்திரி தூவி அலங்கரித்தால் ரிச் லுக் கிடைக்கும்.