சைட் டிஷ் வேண்டாம்… 10 நிமிடத்தில் சுவையான வெங்காய சப்பாத்தி ரெடி!

சப்பாத்தி என்றாலே எப்போதுமே ஒரே மாதிரி செய்து சாப்பிடுவது பெரியவர்களுக்கே சலிப்பை ஏற்படுத்தும் போது, குழந்தைகள் என்ன செய்வார்கள்? அவர்களுக்கு வித்தியாசமாகவும் அதே சமயம் சத்துக்கள் நிறைந்ததாகவும் ஏதாவது செய்து தர வேண்டும் என்று நினைத்தால் உங்கள் கிச்சனில் இருக்கும் சாதாரண கோதுமை மாவு மற்றும் வெங்காயம் மட்டுமே போதும். 

இதற்காக நீங்கள் தனியாக குருமா, சென்னா மசாலா போன்ற எந்த சைட் டிஷ்ஷும் செய்ய வேண்டியதில்லை. சமையல் செய்ய நேரம் இல்லாத காலை வேளைகளில், மிக விரைவாக, அப்படியே சுடச்சுட சாப்பிடக்கூடிய ஒரு அட்டகாசமான உணவுதான் இந்த வெங்காய சப்பாத்தி. காரசாரமான சுவையுடன், மென்மையாக இருக்கும் இந்த உணவை எப்படிச் செய்வது என்று பார்க்கலாம் வாங்க.

தேவையான பொருட்கள்:

• கோதுமை மாவு - 2 கப்

• பெரிய வெங்காயம் - 1

• பச்சை மிளகாய் - 2

• இஞ்சி பூண்டு விழுது - 1/2 ஸ்பூன்

• சீரகம் - 1/2 டீஸ்பூன்

• மிளகாய்த் தூள் - 1/2 டீஸ்பூன்

• கரம் மசாலா - 1/2 டீஸ்பூன்

• மஞ்சள் தூள் - 1/4 டீஸ்பூன்

• கொத்தமல்லி இலைகள் - 2 டேபிள் ஸ்பூன்

• எண்ணெய் அல்லது நெய் - தேவையான அளவு

• உப்பு - தேவையான அளவு

செய்முறை!

 இந்த ரெசிபியின் சுவையே நாம் சேர்க்கும் மசாலாக்களிலும் மாவு பிசையும் பக்குவத்திலும்தான் இருக்கிறது. முதலில் ஒரு அகலமான பாத்திரத்தில் இரண்டு கப் கோதுமை மாவை எடுத்துக் கொள்ளுங்கள். இதோடு பொடியாக நறுக்கிய வெங்காயம், பச்சை மிளகாய், இஞ்சி பூண்டு விழுது, சீரகம், மிளகாய்த் தூள், மஞ்சள் தூள், கரம் மசாலா, பொடியாக நறுக்கிய கொத்தமல்லி இலைகள் மற்றும் தேவையான அளவு உப்பு ஆகியவற்றைச் சேர்க்கவும். 

இங்கு ஒரு முக்கியமான குறிப்பு என்னவென்றால், முதலில் தண்ணீர் ஊற்றாமல் கைகளால் மாவை நன்றாக அழுத்திப் பிசைய வேண்டும். வெங்காயத்தில் ஏற்கனவே சிறிதளவு நீர்ச்சத்து இருக்கும், உப்பு சேர்த்தவுடன் அது இன்னும் கொஞ்சம் தண்ணீர் விடும் என்பதால், எடுத்தவுடனே தண்ணீர் ஊற்றினால் மாவு மிகவும் தளர்ந்துவிடும். எனவே கொஞ்சம் கொஞ்சமாகத் தண்ணீர் தெளித்து, மாவை மிருதுவாகப் பிசைய வேண்டும். மாவு கைகளில் ஒட்டாமல் வர, கடைசியாக ஒரு ஸ்பூன் எண்ணெய் தடவி மாவை சுமார் 15 முதல் 20 நிமிடங்கள் வரை மூடி ஊற வைக்கவும்.

மாவு நன்றாக ஊறியதும், அதிலிருந்து வழக்கத்தை விடச் சற்று பெரிய உருண்டைகளாகப் பிரித்துக்கொள்ளுங்கள். ஒவ்வொரு உருண்டையையும் சப்பாத்தி பலகையில் வைத்து, சிறிது வறண்ட கோதுமை மாவு தூவித் தேய்க்க வேண்டும். வெங்காயம் சேர்த்திருப்பதால், மிகவும் மெலிதாகத் திரட்டினால் மாவு ஆங்காங்கே கிழிந்துவிடும்; எனவே சற்று தடிமனாகத் திரட்டிக் கொள்ளுங்கள். இப்போது அடுப்பில் தோசைக் கல்லை வைத்து நன்றாகச் சூடாக்கவும். கல் காய்ந்ததும், மிதமான தீயில் வைத்து, திரட்டி வைத்துள்ள வெங்காய சப்பாத்தி மாவை அதில் போடவும்.

மாவு லேசாகச் சிவக்க ஆரம்பித்ததும், சுற்றிலும் அரை ஸ்பூன் எண்ணெய் அல்லது நெய் விட்டு சுடவும். நெய் சேர்த்தால் குழந்தைகளுக்கு மிகவும் பிடிக்கும். இருபுறமும் திருப்பிப் போட்டு, பொன்னிறமாகப் புள்ளிகள் தோன்றும் வரை வேகவைத்து எடுக்க வேண்டும். உள்ளே இருக்கும் வெங்காயம் மற்றும் மசாலாப் பொருட்கள் நெருப்பில் வெந்து அருமையான சுவையையும், வீடே மணக்கும் வாசனையையும் கொடுக்கும். 

இதை அப்படியே சாப்பிடலாம், அல்லது கெட்டித் தயிர் மற்றும் காரசாரமான மாங்காய் ஊறுகாயோடு தொட்டுச் சாப்பிட்டால் சுவை தேவாமிர்தமாக இருக்கும். வேலைக்குச் செல்பவர்கள் மற்றும் பள்ளிக்குச் செல்லும் குழந்தைகளுக்கு லஞ்ச் பாக்ஸில் கட்டிக் கொடுக்க, ஆறிப்போனாலும் மிருதுத்தன்மை மாறாத இந்த வெங்காய சப்பாத்தி ஒரு சூப்பர் சாய்ஸ். 

இன்றே இந்த சூப்பர் ரெசிபியை முயற்சித்து பார்த்து உங்களது கருத்துக்களை எங்களுடன் பகிர்ந்து கொள்ளுங்கள்.