மழைக்காலத்தில் உப்பு, மசாலாப் பொடிகள் நமத்துப்போகிறதா? இதை மட்டும் பண்ணுங்க!

மழைக்காலம் வந்துவிட்டாலே சமையலறையில் பல சிக்கல்கள் தலைதூக்கும். குறிப்பாக, காற்றில் ஈரப்பதம் அதிகமாக இருப்பதால் உப்பு, சர்க்கரை, மிளகாய்த்தூள், மல்லித்தூள் போன்ற அத்தியாவசியப் பொருட்கள் எளிதில் ஈரத்தை உறிஞ்சிவிடும். இதனால் உப்பு நீர்த்து கட்டியாகிவிடும்; சர்க்கரை ஒன்றோடொன்று ஒட்டிக்கொள்ளும்;

மசாலாப் பொடிகளின் மணமும் சுவையும் குறையக்கூடும். சில நேரங்களில் ஈரப்பதத்தால் பூஞ்சையும் உருவாகலாம். இதைத் தவிர்க்கச் சில எளிய வழிகளைப் (சமையலறை குறிப்புகள்) பின்பற்றினால் போதும். அவை என்னென்ன என்று பார்ப்போமா?

அதிகம் உபயோகிக்கக்கூடிய உப்பு, சர்க்கரையைப் பற்றி முதலில் பார்ப்போம்.

உப்பு நீர்த்துப்போகாமல் இருக்க

மழைக்காலத்தில் காற்றில் ஈரப்பதம் அதிகமாக இருப்பதால், உப்பு ஜாடியில் உள்ள உப்பு விரைவில் ஈரமாகி, கட்டிகளாக மாறிவிடும். இதைத் தவிர்க்க, உப்பு ஜாடியில் சில முழு மிளகுகளைப் போட்டு வைக்கலாம்.

அல்லது ஒரு ஸ்பூன் வெந்தயத்தைத்துணியில் கட்டி சேர்த்து வைக்கலாம். இவை உப்பு நீர்த்துப்போகாமல் இருக்க உதவும் என்று பாரம்பரியமாகப் பின்பற்றப் படுகிறது. மேலும், உப்பை எடுக்கும்போது ஈரமான கைகளால் தொடுவதையும், ஈரமான கரண்டியைப் பயன்படுத்துவதையும் தவிர்க்கவேண்டும். இதனால் உப்பில் ஈரம் சேர்வது குறையும். உப்பு ஜாடியைப் பயன்படுத்தியதும் அதன் மூடியை இறுக்கமாக மூடி வைப்பதும் அவசியம்.

சர்க்கரை கட்டியாகாமல் இருக்க!

சர்க்கரை ஜாடியில் 2 அல்லது 3 கிராம்புகளைப் போட்டுவைத்தால், ஈரப்பதத்தால் சர்க்கரை கட்டியாவதைத் தடுக்க உதவும் என்று பாரம்பரியமாகப் பின்பற்றப்படுகிறது. இருப்பினும், ஈரப்பதத்தைத் தடுப்பதற்கு சர்க்கரையை உலர்ந்த, காற்றுப் புகாத டப்பாவில் சேமிப்பதே சிறந்த வழி.

மசாலாப் பொடிகளை வறுத்து ஆறவைக்கவும்!

ஏற்கெனவே தயாரித்து வைத்திருக்கும் மசாலாப் பொடிகள் மழைக்காலத்தில் ஈரமாகாமல் இருக்க, அவற்றை அவ்வப்போது லேசாகச் சூடுபடுத்தலாம். இதற்காக ஒரு வாணலியில் தேவையான அளவு மசாலாப் பொடியைப் போட்டு, குறைந்த தீயில் சிறிது நேரம் சூடுபடுத்தவும்.

பின்னர் அதை ஒரு தட்டில் கொட்டி, முழுமையாக ஆறவிடவும். ஈரம் சிறிதும் இல்லாத, சுத்தமான காற்றுப் புகாத டப்பாவில் பொடியைச் சேமிக்கலாம். பொடியைச் சூடுபடுத்தும்போது கருகிவிடாமல் கவனமாகப் பார்த்துக்கொள்ள வேண்டும். மசாலாப் பொடியில் ஏற்கெனவே பூஞ்சை அல்லது கெட்டுப்போனதற்கான அறிகுறிகள் இருந்தால், அதை மீண்டும் சூடுபடுத்திப் பயன்படுத்தக் கூடாது.

ஈரப்பதத்தைத் தவிர்க்க எளிய வழிகள்!

1. காற்றுப் புகாத டப்பாக்களைப் பயன்படுத்துங்கள்!

உப்பு, சர்க்கரை, மசாலாப் பொடிகளை அவை வாங்கிய பாக்கெட்டுகளிலேயே நீண்ட நாட்கள் வைத்திருப்பதைத் தவிர்க்கலாம். அதற்குப் பதிலாக, நன்றாக உலர்ந்த கண்ணாடி அல்லது உணவுப் பயன்பாட்டுக்கு ஏற்ற காற்றுப் புகாத டப்பாக்களில் கொட்டி வைக்கவும். டப்பாவின் மூடியை ஒவ்வொரு முறையும் பயன்படுத்திய பிறகு இறுக்கமாக மூடிவிட வேண்டும். இதனால் காற்றில் உள்ள ஈரப்பதம் உள்ளே செல்வது குறையும்.

2. ஈரமான கரண்டிகளைப் பயன்படுத்தாதீர்கள்!

சமையலின்போது அவசரமாக ஈரமான கரண்டியால் உப்பையோ சர்க்கரையையோ எடுப்பது பலரது பழக்கம். இதனால் டப்பாவுக்குள் ஈரம் புகுந்து பொருட்கள் கட்டியாகிவிடும்.

எனவே, எப்போதும் உலர்ந்த கரண்டியை மட்டுமே பயன்படுத்த வேண்டும். சமைக்கும்போது கைகளில் ஈரம் இருந்தாலும், அதைத் துடைத்துவிட்டுப் பொருட்களை எடுப்பது நல்லது.

3. அடுப்புக்கு அருகில் வைக்கவேண்டாம்!

சமையல் செய்யும்போது அடுப்பிலிருந்து வெளிப்படும் நீராவி, மசாலாப் பொடிகளிலும் மற்ற பொருட்களிலும் ஈரப்பதத்தை ஏற்படுத்தலாம். எனவே, உப்பு, சர்க்கரை, மசாலாப் பொடிகளை அடுப்புக்கு அருகிலோ, நீராவி அதிகமாகப் படும் இடங்களிலோ வைக்காதீர்கள். சமையலறையில் உலர்ந்த, குளிர்ச்சியான இடத்தைத் தேர்ந்தெடுத்து வைப்பது நல்லது.

4. சிறிய அளவுகளில் சேமியுங்கள்!

மொத்தமாக வாங்கிய உப்பு, சர்க்கரை, மசாலாப் பொடிகள் அனைத்தையும் ஒரே டப்பாவில் வைத்துப் பயன்படுத்துவதற்குப் பதிலாக, அன்றாடப் பயன்பாட்டுக்குத் தேவையான அளவை மட்டும் சிறிய டப்பாவில் வைத்துக்கொள்ளலாம். மீதமுள்ளவற்றை நன்றாக மூடிய பெரிய டப்பாவில் பத்திரப்படுத்துங்கள். இதனால் பெரிய டப்பாவை அடிக்கடி திறந்து மூட வேண்டிய அவசியம் இருக்காது. ஈரப்பதம் படுவதும் குறையும்.

5. டப்பாக்களை நிரப்புவதற்கு முன் உலர்த்துங்கள்!

பாத்திரங்களைக் கழுவியதும் அவற்றில் சிறிதளவு ஈரம் இருந்தாலும், அதில் உப்பு அல்லது சர்க்கரையைக் கொட்டிவிடாதீர்கள். டப்பாக்களை முழுமையாக உலர்த்திய பிறகே பொருட்களை நிரப்பவேண்டும். அதேபோல், பழைய மசாலாப் பொடியின் மீது புதிதாக வாங்கிய பொடியைக் கொட்டுவதற்குப் பதிலாக, டப்பையைச் சுத்தம் செய்து உலர்த்திய பின்னர் நிரப்புவது சிறந்தது.

6. மசாலாப் பொடிகளின் மணத்தைப் பாதுகாப்போம்!

மிளகாய்த்தூள், மஞ்சள்தூள், மல்லித்தூள், சீரகத்தூள் போன்றவற்றை நேரடி வெயில் படும் இடத்திலோ, ஈரப்பதம் நிறைந்த இடத்திலோ வைக்கவேண்டாம். இவற்றைச் சிறிய அளவுகளில் வாங்கிப் பயன்படுத்துவது மணத்தையும் சுவையையும் பாதுகாக்க உதவும். டப்பாவுக்குள் ஈரம் புகுந்ததற்கான அறிகுறிகள் தெரிந்தாலோ, பூஞ்சை அல்லது அசாதாரண மணம் ஏற்பட்டாலோ, அந்தப் பொருளைப் பயன்படுத்துவதைத் தவிர்க்கவேண்டும்.

சமையலறைப் பொருட்களைப் பாதுகாப்போம்!

மழைக்காலத்தில் சமையலறையை உலர்வாகவும் சுத்தமாகவும் வைத்திருப்பது மிகவும் அவசியம். உப்பு, சர்க்கரை, மசாலாப் பொடிகளைச் சரியான முறையில் சேமித்தால் அவை விரைவில் கெட்டுப்போவதைத் தவிர்க்கலாம். இந்த ஆறு எளிய வழிகளையும் பின்பற்றினால், மழைக்காலத்திலும் சமையலறைப் பொருட்களைப் பாதுகாப்பாக வைத்துப் பயன்படுத்தலாம்!