ரெஸ்டாரண்ட் ஸ்டைல் பனீர் ராரா... இந்த சீக்ரெட் தெரிஞ்சா இனி கடையில வாங்க மாட்டீங்க!

வட இந்திய உணவகங்களுக்குச் செல்லும்போது, மெனு கார்டில் பனீர் பட்டர் மசாலா, கடாய் பனீர் ஆகியவற்றைப் பார்த்திருப்போம். ஆனால், சற்று வித்தியாசமான ரிச்சான சுவையைக் கொடுக்கும் ஒரு உணவுதான் 'பனீர் ராரா' (Paneer Rara). இதில் என்ன ஸ்பெஷல் என்றால், பனீர் துண்டுகளோடு சேர்த்து, கிரேவியிலும் துருவிய பனீர் சேர்க்கப்படும். 

இது கிரேவிக்கு ஒரு அருமையான தடிமனான பதத்தைக் கொடுக்கும். சுடச்சுட நாண் அல்லது சப்பாத்திக்கு இதைத் தொட்டுச் சாப்பிட்டால், சுவை நாவில் நடனமாடும். இந்த ரெஸ்டாரண்ட் ஸ்டைல் பனீர் ராராவை வீட்டிலேயே எளிதாக எப்படிச் செய்வது என்று பார்ப்போம்.

தேவையான பொருட்கள்:

• பனீர் துண்டுகள் - 200 கிராம்

• துருவிய பனீர் - 1/2 கப் 

• பெரிய வெங்காயம் - 2 

• தக்காளி - 3 

• இஞ்சி பூண்டு விழுது - 1 டேபிள் ஸ்பூன்

• பச்சை மிளகாய் - 2 

• கெட்டித் தயிர் - 3 டேபிள் ஸ்பூன்

• காஷ்மீரி மிளகாய்த் தூள் - 1.5 டீஸ்பூன்

• மல்லித் தூள் - 1 டீஸ்பூன்

• சீரகத் தூள் - 1/2 டீஸ்பூன்

• கரம் மசாலா - 1/2 டீஸ்பூன்

• மஞ்சள் தூள் - 1/4 டீஸ்பூன்

• சீரகம் - 1 டீஸ்பூன்

• பட்டை, லவங்கம், ஏலக்காய், பிரியாணி இலை - தலா 1

• நெய் மற்றும் எண்ணெய் - தலா 2 டேபிள் ஸ்பூன்

• உப்பு - தேவையான அளவு

• கஸ்தூரி மேத்தி - 1 டீஸ்பூன்

• கொத்தமல்லி தழை - சிறிதளவு

செய்முறை! 

முதலில் ஒரு அடி கனமான கடாயை அடுப்பில் வைத்து, அதில் நெய் மற்றும் எண்ணெய் ஊற்றிச் சூடாக்கவும். இதில் பட்டை, லவங்கம், ஏலக்காய், பிரியாணி இலை மற்றும் சீரகம் சேர்த்துத் தாளிக்கவும். பின்னர், பொடியாக நறுக்கிய வெங்காயத்தைச் சேர்த்து, அது நல்ல பொன்னிறமாக மாறும் வரை பொறுமையாக வதக்க வேண்டும். 

வெங்காயம் வதங்கியதும், இஞ்சி பூண்டு விழுது மற்றும் பச்சை மிளகாயைச் சேர்த்து, பச்சை வாசனை போகும் வரை நன்றாக வதக்கிக் கொள்ளுங்கள்.

அடுத்ததாக, அரைத்து வைத்துள்ள தக்காளி விழுதைச் சேர்த்து எண்ணெய் பிரிந்து வரும் வரை மிதமான தீயில் வதக்க வேண்டும். இப்போது மஞ்சள் தூள், காஷ்மீரி மிளகாய்த் தூள், மல்லித் தூள், சீரகத் தூள் மற்றும் தேவையான அளவு உப்பு ஆகியவற்றைச் சேர்த்து ஒரு நிமிடம் வதக்குங்கள். 

மசாலாக்கள் கருகாமல் இருக்க, அடுப்பை 'சிம்'மில் வைத்துவிட்டு, நன்கு அடித்து வைத்துள்ள கெட்டித் தயிரைச் சேர்க்கவும். தயிர் சேர்த்தவுடன் கைவிடாமல் கிளற வேண்டும், அப்போதுதான் தயிர் திரியாமல் கிரேவியோடு ஒன்றிணைந்து நல்ல நிறத்தைக் கொடுக்கும்.

கிரேவி கொதித்து எண்ணெய் மிதந்து வரும்போது, இந்த ரெசிபியின் ஹீரோவான 'துருவிய பனீர்' மற்றும் அரை கப் சுடுநீர் சேர்த்துக் கிளறுங்கள். துருவிய பனீர் கிரேவியுடன் சேர்ந்து கெட்டியான கீமா பதத்திற்கு வரும். சுமார் 5 நிமிடங்கள் மிதமான தீயில் கொதிக்கவிட்ட பிறகு, நறுக்கி வைத்துள்ள பனீர் துண்டுகளைச் சேர்க்கவும். 

பனீர் துண்டுகள் மசாலாவை உறிஞ்சி மிருதுவாக மாற மேலும் ஒரு 5 நிமிடம் மூடி வைத்து வேகவிடவும். இறுதியாக கரம் மசாலா, கைகளால் கசக்கிய கஸ்தூரி மேத்தி மற்றும் பொடியாக நறுக்கிய கொத்தமல்லித் தூவி அடுப்பை அணைத்துவிடுங்கள். கமகமக்கும் ரெஸ்டாரண்ட் ஸ்டைல் 'பனீர் ராரா' தயார்.