வாயில் வைத்தால் வழுக்கிக் கொண்டு போகும்… கண்ணாடி போல ஜொலிக்கும் 'ரோஸ் அல்வா'!

வழக்கமாக விசேஷ நாட்கள் என்றாலே நம் வீட்டில் ரவா கேசரி அல்லது பாயசம்தான் செய்வோம். "ஏதாவது புதுசா ஸ்வீட் செய்யுங்களேன்" என்று வீட்டில் கேட்டால், நமக்கு உடனே நினைவுக்கு வருவது மைசூர்பாகு அல்லது லட்டு தான். ஆனால், அதற்கெல்லாம் நிறைய வேலை இருக்கும். ஆனால், மிகக் குறைவான நேரத்தில், பார்ப்பதற்கு கடையில் வாங்கியது போலவே கண்ணாடி பதத்தில் ஒரு அல்வா செய்ய முடியும் என்றால் அதுதான் இந்த ரோஸ் அல்வா. 

இதை பாம்பே அல்வா அல்லது கராச்சி அல்வா என்றும் சொல்வார்கள். ரோஸ் எசென்ஸ் மற்றும் அழகான பிங்க் நிறத்தில் இருக்கும் இதை, குழந்தைகள் ஜெல்லி என்று நினைத்து விரும்பிச் சாப்பிடுவார்கள். வாருங்கள், அந்தத் தித்திக்கும் ரெசிபியைப் பார்ப்போம்.

தேவையான பொருட்கள்:

• கார்ன் ஃப்ளார் - 1 கப்

• சர்க்கரை - 2 ½ கப்

• தண்ணீர் - 2 கப் 

• நெய் - ½ கப் 

• ரோஸ் எசென்ஸ்  - 1 டீஸ்பூன்

• பிங்க் ஃபுட் கலர் - 2 சொட்டு

• முந்திரி, பாதாம், பிஸ்தா - தேவையான அளவு

• எலுமிச்சை சாறு - 1 டீஸ்பூன் 

• ஏலக்காய் தூள் - ½ டீஸ்பூன்.

செய்முறை:

முதலில் அல்வா செய்வதற்கான கலவையைத் தயார் செய்து வைத்துக்கொள்ள வேண்டும். ஒரு பெரிய பாத்திரத்தில் 1 கப் சோள மாவை எடுத்துக்கொள்ளவும். அதனுடன் 2 கப் தண்ணீர் ஊற்றி, கட்டிகள் எதுவும் இல்லாதவாறு ஒரு விஸ்க் வைத்து நன்கு கரைக்கவும். மாவு தண்ணீரோடு முழுமையாகக் கரைந்திருக்க வேண்டும். இது பால் போல இருக்கும். இதைத் தனியாக எடுத்து வைத்துவிடுங்கள்.

இப்போது அடுப்பில் ஒரு அடிகனமான வாணலி அல்லது நான்-ஸ்டிக் கடாயை வைக்கவும். அதில் 2 ½ கப் சர்க்கரையைச் சேர்த்து, அதோடு 1 கப் தண்ணீர் ஊற்றவும். சர்க்கரை கரையும் வரை கிளறினால் போதும், கம்பி பதம் எதுவும் தேவையில்லை. சர்க்கரை கரைந்து தண்ணீர் கொதிக்கத் தொடங்கியதும், அதில் எலுமிச்சை சாறு சேர்க்கவும். இது அல்வா ஆறிய பிறகும் சர்க்கரை கட்டியாகாமல்  இருக்க உதவும்.

தண்ணீர் கொதிக்கும்போது அடுப்பை மிதமான தீயில் வைத்துவிட்டு, நாம் கரைத்து வைத்துள்ள சோள மாவு கரைசலை மீண்டும் ஒருமுறை கலக்கிவிட்டு, மெதுவாகச் சர்க்கரைத் தண்ணீரில் ஊற்றவும். ஊற்றும்போது ஒரு கையால் ஊற்றிக்கொண்டே, மறு கையால் கிளற வேண்டும். இல்லையென்றால் உடனே கட்டியாகிவிடும். மாவு ஊற்றிய 5 நிமிடங்களிலேயே கலவை கெட்டியாகத் தொடங்கும். ஜெல்லி போல மாறும்போது கைவிடாமல் கிளறவேண்டும்.

கலவை கண்ணாடி போல பளபளப்பாக மாறியதும், சர்க்கரையும் மாவும் வெந்துவிட்டதாக அர்த்தம். இப்போது நாம் எடுத்து வைத்துள்ள நெய்யை கொஞ்சம் கொஞ்சமாகச் சேர்க்க வேண்டும். மொத்தமாக ஊற்றாமல், ஒரு கரண்டி ஊற்றி கிளறவும். அல்வா அந்த நெய்யை உறிஞ்சியதும், அடுத்த கரண்டி நெய்யை ஊற்றவும். இப்படிச் செய்யும் போதுதான் அல்வா மென்மையாகவும், ஒட்டாமலும் வரும்.

அல்வா நன்கு சுருண்டு பந்து போல வரும்போது, ரோஸ் எசென்ஸ் மற்றும் பிங்க் ஃபுட் கலர் சேர்க்கவும். கூடவே வறுத்த முந்திரி, பாதாம் மற்றும் ஏலக்காய் தூள் சேர்க்கவும். இப்போது பார்த்தால் அல்வா சட்டியில் ஒட்டாமல், கரண்டியில் எடுக்கும்போது வழுக்கிக் கொண்டு விழும் பதத்தில் இருக்கும். நெய் தனியாகப் பிரிந்து ஓரங்களில் வரும். இதுதான் சரியான பதம்.

உடனே அடுப்பை அணைத்துவிட்டு, நெய் தடவிய ஒரு தட்டில் அல்லது ட்ரேயில் இந்தக் கலவையை ஊற்றவும். மேலே நறுக்கிய பாதாம், பிஸ்தா தூவி ஒரு கரண்டியால் சமப்படுத்தவும். இதை ஒரு மணி நேரம் அப்படியே ஆறவிடவும். நன்கு ஆறிய பிறகு, கத்தியால் துண்டுகளாக வெட்டினால், ரோஸ் அல்வா தயார்.