கோல்ட் காபி குடிக்கும் பழக்கம் இருக்கா? வெயிட் போடாம இருக்க இந்த 5 சீக்ரெட்டை கண்டிப்பா தெரிஞ்சுக்கோங்க!

காலையில் எழுந்தவுடனோ அல்லது வேலைப்பளுவால் ரொம்பவே சோர்வாக இருக்கும்போதோ, ஒரு டம்ளர் ஜில்லென்ற கோல்ட் காபி (Cold Coffee) குடித்தால் அந்த நாளே செம பிரெஷ்ஷாக மாறிவிடும். ஆனால், வெளியே கடைகளில் வாங்கும் காபியிலோ, நாம் வழக்கமாக வீட்டில் தயாரிக்கும் காபியிலோ சுவையை கூட்டுவதற்காக ஏகப்பட்ட வெள்ளை சர்க்கரை மற்றும் கொழுப்பு நிறைந்த பொருட்களைச் சேர்க்கிறார்கள். 

இது நாளடைவில் உடல் எடையை அதிகரிப்பது மட்டுமில்லாமல் பல ஆரோக்கிய பிரச்சனைகளையும் கொண்டு வரும். அதற்காக காபி குடிக்கும் பழக்கத்தையே விட்டுவிட வேண்டிய அவசியம் கிடையாது. உங்களுக்குப் பிடித்த இந்த பானத்தை அதன் சுவை கொஞ்சம் கூட மாறாமல், ஆரோக்கியமான முறையில் எப்படி மாற்றுவது எனப் பார்க்கலாம் வாங்க.

கொழுப்பு நிறைந்த பால் வேண்டாம்!

பொதுவாக கோல்ட் காபி தயார் செய்யும்போது அதிக கொழுப்புள்ள சாதாரண பசும்பால் அல்லது பாக்கெட் பாலைத் தான் நாம் பயன்படுத்துவோம். இது காபியின் தடிமனைக் கூட்டினாலும் உடலில் தேவையற்ற கொழுப்பைச் சேர்க்கும். இதற்கு ஒரு அருமையான ஆல்டர்நேட்டிவ் என்றால் அது பாதாம் பால் தான். இதில் கலோரிகள் ரொம்பவே குறைவு என்பது மட்டுமில்லாமல், நமது உடலுக்குத் தேவையான புரதம், மக்னீசியம் மற்றும் வைட்டமின்-ஈ போன்ற சத்துக்கள் ஏராளமாக நிறைந்துள்ளன.

ஆரோக்கியமான இனிப்பு வகைகள்!

காபி கசக்காமல் இருக்க வேண்டும் என்பதற்காக நாம் அள்ளிப் போடும் வெள்ளை சர்க்கரை ஒரு மிகப்பெரிய ஸ்லோ பாய்சன். எடையைக் குறைக்க நினைப்பவர்கள் முதலில் தவிர்க்க வேண்டியது இந்த சர்க்கரையைத் தான். இதற்குப் பதிலாக ரொம்பவே இயற்கையான இனிப்புச் சுவையைத் தரும் சுத்தமான தேன் அல்லது மேப்பிள் சிரப் கலந்து குடித்துப் பாருங்கள். இது காபியின் அசல் சுவையைக் கெடுக்காமல் இருப்பதோடு, உடலுக்குத் தேவையான நல்ல எனர்ஜியையும் கொடுக்கிறது.

விப்ட் க்ரீமிற்கு குட்பை!

கஃபேக்களில் கொடுப்பது போல காபியின் மேலே அழகாக விப்ட் க்ரீம் வைத்து குடிப்பது பார்ப்பதற்கு நன்றாகத் தான் இருக்கும். ஆனால் அதில் எந்த ஒரு சத்தும் கிடையாது, முழுக்க முழுக்க வெறும் கலோரிகள் மட்டுமே உள்ளது. அந்த க்ரீமிற்குப் பதிலாக ஒரு ஸ்பூன் பாதாம் பட்டர் சேர்த்துப் பாருங்கள். இது உங்களின் காபியை இன்னும் ரொம்பவே கிரீமியாக மாற்றுவதோடு, உடலுக்குத் தேவையான ஆரோக்கியமான கொழுப்பு மற்றும் புரதச்சத்தையும் அள்ளித் தரும்.

ஐஸ் கியூப்ஸ்!

ஜில்லென்று குடிக்க வேண்டும் என்பதற்காக நிறைய ஐஸ் கட்டிகளை காபியில் போடுவது வழக்கம். ஆனால் அந்த கட்டிகள் உருகத் தொடங்கியதும் காபியின் தடிமன் குறைந்து அது வெறும் தண்ணீர் போல மாறிவிடும். இந்த பிரச்சனையைத் தவிர்க்க, நீங்கள் காய்ச்சிய பால் அல்லது காபி டிகாஷனையே ஐஸ் ட்ரேயில் ஊற்றி ஃப்ரீசரில் வைத்து கட்டியாக்கிப் பயன்படுத்துங்கள். இப்படிச் செய்யும்போது கடைசிவரை காபியின் ஸ்ட்ராங்கான சுவை குறையவே குறையாது.

பட்டைத் தூள்!

எல்லாவற்றையும் சரியாகச் செய்த பிறகு, கடைசியாக உங்கள் காபியின் மேல் லேசாக கொஞ்சம் பட்டைப் பொடியைத் தூவி விடுங்கள். இது காபியின் வாசனையை வேற லெவலுக்குக் கொண்டு செல்வது மட்டுமில்லாமல், உங்கள் உடலின் செரிமான மண்டலத்தைச் சீராக்கி நோய் எதிர்ப்புச் சக்தியையும் பலமடங்கு அதிகரிக்கும்.

ஆரோக்கியமான உணவுகள் எல்லாமே சுவை இல்லாமல் தான் இருக்கும் என்ற பழைய காலத்து நம்பிக்கையை நாம் முதலில் உடைக்க வேண்டும். தேவையற்ற சர்க்கரை, கொழுப்புகளைத் தவிர்த்துவிட்டு, மேலே சொன்ன இந்த சிம்பிளான மாற்றுப் பொருட்களைப் பயன்படுத்திப் பாருங்கள்.