நாம் தினமும் சாப்பிடும் பழங்களின் உண்மையான தாயகம் எது தெரியுமா? வியக்க வைக்கும் வரலாறு!

மனித குலத்தின் உணவு வரலாற்றில் பழங்கள் மிக முக்கியப் பங்கு வகிக்கின்றன. நாம் அன்றாடம் உட்கொள்ளும் பல சுவையான பழங்கள் நம்முடைய சொந்த ஊரைச் சேர்ந்தவை அல்ல; அவை உலகின் வெவ்வேறு மூலைகளில் தோன்றி, காலப்போக்கில் உலகெங்கும் பரவியவை ஆகும். அன்னாசி, பேரீச்சை, பப்பாளி, ஆரஞ்சு, வெண்ணெய் பழம் மற்றும் திராட்சை ஆகிய புகழ்பெற்ற பழங்களின் உண்மையான தாயகமும், அவற்றின் வரலாற்றுப் பின்னணியும் வியப்புக்குரியவை.

1. அன்னாசிப் பழம் (Pineapple): பூர்வீகம்: தென்னமெரிக்கா (பிரேசில் மற்றும் பராகுவே பகுதிகள்)

அன்னாசிப் பழம் வைட்டமின் சி மற்றும் மாங்கனீசு நிறைந்த, புத்துணர்ச்சியூட்டும் வெப்பமண்டல பழமாகும். மேலும், இதில் ‘புரோமிலைன்’ (Bromelain) எனும் என்சைம் உள்ளது. இது உணவில் உள்ள புரதச்சத்தை எளிதில் செரிக்க உதவுகிறது. அதனால் இது ஒரு சிறந்த செரிமானப் பழமாகக் கருதப்படுகிறது.

2. பேரீச்சம்பழம் (Dates): பூர்வீகம்: மத்திய கிழக்கு மற்றும் சிந்து சமவெளி (அரேபியா, பெர்சியா)

பேரீச்சை பழம் இயற்கையான சர்க்கரை மற்றும் நார்ச்சத்து கொண்ட ஆற்றல் மிக்க பழமாகும். ‘பாலைவனத்தின் தங்கம்’ என்று அழைக்கப்படும் இது.

மிகத் தொன்மையான காலம் தொட்டு அரேபிய மற்றும் பெர்சிய பகுதிகளில் ஒரு முழுமையான உணவாகப் பயன்படுத்தப்பட்டு வருகிறது. உடலில் உடனடியாக ஆற்றலை அதிகரித்து, சோர்வை நீக்கும் தன்மை கொண்டது.

3. பப்பாளி பழம் (Papaya): பூர்வீகம்: மத்திய அமெரிக்கா மற்றும் தென் மெக்சிகோ

பப்பாளி பழம் ‘பப்பேன்’ (Papain) என்சைம் மூலம் ஜீரண சக்தியை மேம்படுத்தும் சுவையான பழமாகும். இது செரிமானத்தை அதிகரிப்பது மட்டுமல்லாமல், வைட்டமின் ஏ மற்றும் சி நிறைந்தது என்பதால், கண் பார்வை மற்றும் தோல் ஆரோக்கியத்திற்கு மிகவும் நல்லது. உடலில் உள்ள நச்சுக்களை வெளியேற்றவும் இது உதவுகிறது.

4. ஆரஞ்சு பழம் (Orange): பூர்வீகம்: தென்கிழக்கு ஆசியா (தென் சீனா, வடகிழக்கு இந்தியா)

உலகெங்கும் விரும்பி உண்ணப்படும் ஆரஞ்சு, நோய் எதிர்ப்பு சக்தியை வலுப்படுத்தும் வைட்டமின் சி நிறைந்த சிட்ரஸ் பழமாகும். இதன் தோல் பகுதிகளில் இருக்கும் ‘லிமோனைன்’ (Limonene) போன்ற ஆன்டி-ஆக்ஸிடன்ட்டுகள் பல ஆரோக்கிய நன்மைகளைக் கொண்டவை. மேலும், இது சிறுநீரக கற்கள் உருவாகாமல் தடுக்கவும் உதவுகிறது.

5. வெண்ணெய் பழம் (Avocado): பூர்வீகம்: மெக்சிகோ மற்றும் மத்திய அமெரிக்கா

ஊட்டச்சத்துக்கள் நிறைந்த வெண்ணெய் பழம் இதயத்திற்கு ஆரோக்கியமான கொழுப்புக்கள் நிறைந்த ‘சூப்பர் ஃபுட்’ ஆகும். பழங்களிலேயே மிகக் குறைந்த அளவு சர்க்கரையும், மிக அதிக அளவு ஆரோக்கியமான கொழுப்பு (ஒலிவிக் அமிலம்) மற்றும் பொட்டாசியம் கொண்ட ஒரே பழம் இதுதான். இதனால் இது ‘பழங்களின் வெண்ணெய்’ என்று அழைக்கப்படுகிறது.

6. திராட்சைப் பழம் (Grapes): பூர்வீகம்: தென் காகசஸ் பகுதி (ஜார்ஜியா, அர்மீனியா)

தென் காகசஸ் பகுதியிலிருந்து பரவிய திராட்சை, ஆன்டி-ஆக்ஸிடன்ட்டுகள் நிறைந்த, ஆயிரக்கணக்கான ஆண்டுகளாக பயிரிடப்படும் ஒரு தொன்மையான பழமாகும். குறிப்பாக, திராட்சையில் உள்ள ‘ரெஸ்வெராட்ரோல்’ (Resveratrol) எனும் ஆன்டி-ஆக்ஸிடன்ட் இதயம் தொடர்பான நோய்கள் வராமல் தடுக்கவும், உடலில் வீக்கத்தைக் குறைக்கவும் முக்கியப் பங்கு வகிக்கிறது.

நாம் அன்றாடம் உண்ணும் ஒவ்வொரு பழத்திற்கும் ஒரு நீண்ட வரலாற்றுப் பின்னணியும், அதற்கே உரிய தனித்துவமான ஆரோக்கிய நன்மைகளும் உள்ளன. உலகளாவிய வர்த்தகம் மற்றும் மனித இடப்பெயர்வுகள் மூலமாகவே இந்தப் பழங்கள் இன்று அனைத்துப் பகுதி மக்களுக்கும் கிடைத்து, நம் உணவு முறையை மேம்படுத்தி உள்ளன.

தினமும் நாம் சுவைக்கும் பல பழங்கள் உலகின் வெவ்வேறு மூலைகளில் இருந்து நம்மை வந்தடைந்த வரலாற்றையும், அவற்றின் அசத்தலான ஆரோக்கிய நன்மைகளையும் முழுமையாகப் புரிந்து கொண்டு பயனடையலாம்.