இனி உங்கள் சமையலறை ஒரு 'ஹெல்த் சென்டர்'! நஞ்சில்லா மாற்றத்திற்கான 8 எளிய ஸ்டெப்ஸ்!

இன்றைய அவசர உலகில் நமது சமையலறைகளில் நீக்கமற நிறைந்திருப்பது பிளாஸ்டிக் பொருட்கள்தான். மளிகைப் பொருட்கள் முதல் குடிநீர் வரை அனைத்திற்கும் பிளாஸ்டிக் டப்பாக்களையே பயன்படுத்துகிறோம். ஆனால், இந்த "நவீன வசதி" நமது ஆரோக்கியத்திற்கும், நாம் வாழும் பூமிக்கும் எவ்வளவு பெரிய அச்சுறுத்தல் என்பதை நாம் சிந்திப்பதில்லை. பழையபடி எவர்சில்வர் மற்றும் மண் பாண்டங்களுக்கு மாறுவது ஒன்றும் கடினமான காரியம் அல்ல.

மாற்றத்தை எப்படித் தொடங்குவது?

ஒரே நாளில் சமையலறையில் உள்ள அனைத்து பிளாஸ்டிக் பொருட்களையும் தூக்கி எறியவேண்டிய அவசியம் இல்லை. கீழே உள்ள எளிய முறைகளைப் பின்பற்றி படிப்படியாக பிளாஸ்டிக் பயன்பாட்டைக் குறைக்கலாம்:

மளிகைப் பொருட்கள் சேமிப்பு:

பருப்பு, அரிசி, சர்க்கரை போன்றவற்றைச் சேமிக்க எவர்சில்வர்  டப்பாக்கள் அல்லது கண்ணாடி ஜாடிகளை பயன்படுத்துங்கள். கண்ணாடி ஜாடிகளின் உள்ளே இருக்கும் பொருட்கள் என்னவென்று வெளியே இருந்தே தெரிந்து கொள்ளலாம். ஆனால் கவனமாக கையாளவேண்டும். எவர்சில்வர்  டப்பாக்களின் மேல் லேபில் எழுதி ஒட்டி வைக்கலாம்.  கல் உப்பு, பொடி உப்பு போன்றவற்றை பீங்கான் ஜாடிகளில் போட்டு வைக்கலாம்.

குடிநீர் சேமிப்பு:

பிளாஸ்டிக் கேன்களில் குடிநீரை சேமித்து வைத்து உபயோகிக்கக்கூடாது. எவர்சில்வர் அண்டாக்கள் சிறந்தவை. பிளாஸ்டிக் பாட்டில்களில் தண்ணீர் பிடித்து குடிப்பதை உடனே நிறுத்துங்கள். இதற்குப் பதிலாக மண் பானை அல்லது செப்புப் பாத்திரங்களை பயன் படுத்தலாம். பயணங்களின்போது பிளாஸ்டிக் பாட்டில்களுக்குப் பதில் ஸ்டீல் வாட்டர் பாட்டில்களைப் பயன்படுத்தும் பழக்கத்தை ஏற்படுத்திக்கொள்ளுங்கள்.

லஞ்ச் பாக்ஸ்:

குழந்தைகளுக்கும் அலுவலகம் செல்பவர்களுக்கும் பிளாஸ்டிக் டிபன் பாக்ஸ்களுக்குப் பதில் ஸ்டீல் டிபன் பாக்ஸ்களை மாற்றலாம். குறிப்பாகச் சூடான உணவை பிளாஸ்டிக் பெட்டியில் வைப்பதைத் தவிர்க்கவேண்டும். இது உணவின் சுவையைத் தக்கவைப்பதோடு ஆரோக்கியத்திற்கும் நல்லது.

சமையல் கரண்டிகள்:

பிளாஸ்டிக் அல்லது நைலான் கரண்டிகளுக்குப் பதில் மரக்கரண்டிகள் அல்லது ஸ்டீல் கரண்டிகளைப் பயன்படுத்துங்கள். சூடான குழம்பில் பிளாஸ்டிக் கரண்டிகள் படும்போது நுண்-பிளாஸ்டிக் துகள்கள் உணவில் கலப்பதைத் தடுக்க இது உதவும்.

தயிர் மற்றும் ஊறுகாய்:

தயிர் உறை ஊற்ற பிளாஸ்டிக் கிண்ணங்களுக்குப் பதில் மண் சட்டிகளைப் பயன்படுத்தினால் தயிர் அதிக கெட்டியாகவும், சுவையாகவும் இருக்கும். ஊறுகாயைப் பீங்கான் ஜாடிகளில் வைப்பது அதன் தரத்தைக் கெடாமல் பாதுகாக்கும்.

காய்கறி சேமிப்பு:

ஃபிரிட்ஜில் காய்கறிகளை வைக்க பிளாஸ்டிக் கவர்களுக்குப் பதில் துணிப் பைகளை பயன் படுத்துங்கள். இது காய்கறிகள் நீண்ட நேரம் வாடாமல் புத்துணர்ச்சியுடன் இருக்க உதவும்.

அஞ்சறைப் பெட்டியின் அவசியம்:

கடுகு, சீரகம், சோம்பு, மிளகு, வெந்தயம் போன்ற பொருட்களை பிளாஸ்டிக் டப்பாக்களில் போட்டு வைக்காமல் அழகான ஆரோக்கியமான எவர்சில்வர் அஞ்சறைப் பெட்டிக்கு மாறுங்கள்.

பழைய பொருட்களை மறுசுழற்சி செய்தல்:

வீட்டில் ஏற்கனவே இருக்கும் பிளாஸ்டிக் டப்பாக்களைத் தூக்கி எறியாமல், அவற்றைச் செடி வளர்க்கும் தொட்டிகளாகவோ அல்லது சமையலறை அல்லாத வேறு தேவைகளுக்கோ (உதாரணத்திற்கு: ஊசி, நூல் சேமிக்க) பயன்படுத்திக்கொள்ளலாம்.

பாரம்பரியப் பொருட்கள் தரும் நன்மைகள்:

உலோக மற்றும் மண் பாத்திரங்கள் உணவின் சத்துக்களை அப்படியே தக்கவைக்கின்றன. பிளாஸ்டிக் பொருட்கள் சீக்கிரம் உடைந்தோ அல்லது பழையதாகவோ மாறிவிடும். ஆனால், எவர்சில்வர் பாத்திரங்கள் தலைமுறை தாண்டி உழைக்கும்; இது ஒரு சிக்கனமான முதலீடு. நாம் பிளாஸ்டிக்கைப் பயன்படுத்துவதை நிறுத்தினாலே, நம் வீட்டைச் சுற்றி குப்பைகள் சேருவது குறையும்.

மாற்றம் என்பது நம்மிடமிருந்துதான் தொடங்கவேண்டும். பிளாஸ்டிக் இல்லாத சமையலறை என்பது வெறும் கனவு அல்ல; அது ஒரு ஆரோக்கியமான வாழ்வியல் முறை. கொஞ்சம் கொஞ்சமாகப் பழைய பிளாஸ்டிக் டப்பாக்களை மாற்றி, பாரம்பரியப் பொருட்களுக்கு மாறுவோம். இது நம் குடும்பத்தின் ஆரோக்கியத்தை உறுதி செய்வதோடு, இயற்கையையும் காக்கும் ஒரு சிறந்த அறப்பணியாகும்.