மாணவர்களே! நல்ல வேலை கிடைக்கணுமா? இதோ உங்களுக்கான 6 வழிகாட்டி குறிப்புகள்!

பெரும்பாலான கல்வி நிறுவனங்களில் தற்போது கல்லூரி இறுதி ஆண்டு தேர்வுகள் முடிந்துள்ள நிலையில், வாழ்க்கையின் புதிய கட்டமாக வேலை பெறுவதே இன்றைய இளைஞர்களின் முக்கிய இலக்காக மாறியுள்ளது. வேலை தேடும் நிலையில், பல மாணவர்கள் சில அடிப்படையான விஷயங்களை கவனிக்காமல் தவறுகள் செய்யக்கூடிய சூழல் உருவாகிறது. நல்ல வேலை வாய்ப்புகளைப் பெற, பல அம்சங்களைப் புரிந்துக் கொண்டு திட்டமிட்டு செயல்பட வேண்டியது அவசியமாகிறது. அந்த வகையில், வேலை தேடும் ஒவ்வொரு மாணவரும் கடைபிடிக்க வேண்டிய சில முக்கியமான வழிமுறைகளை இக்கட்டுரையில் தெரிந்து கொள்வோம்.

1. ரெஸ்யூமே மற்றும் கவர் லெட்டர் தயாரித்தல்:

வேலைவாய்ப்பு தேடுவதற்கான மிக முக்கியமான படி இதுவே. ரெஸ்யூமேயில் உங்கள் கல்வித் தகுதி, இன்டர்ன்ஷிப் அனுபவங்கள், திட்டங்கள், திறன்கள் மற்றும் பிற சாதனைகளை தெளிவாகவும், சுருக்கமாகவும் குறிப்பிட வேண்டும்.

நீங்கள் விண்ணப்பிக்கும் வேலைக்கு ஏற்றவாறு உங்கள் ரெஸ்யூமேயை மாற்றியமைப்பது அவசியம். மேலும், ஒரு கவர் லெட்டர் மூலம் நீங்கள் ஏன் அந்த வேலைக்கு பொருத்தமானவர் என்பதை நிறுவனத்திற்கு விளக்க முடியும்.

2. நெட்வொர்க்கிங் உருவாக்குதல்:

வேலை தேடும்போது நெட்வொர்க்கிங் மிகவும் முக்கியம். உங்கள் பேராசிரியர்கள், சீனியர்கள், நண்பர்கள், இன்டர்ன்ஷிப் செய்த நிறுவனங்களின் சக ஊழியர்கள் மற்றும் தொழில்முறை நிகழ்வுகளில் சந்திக்கும் நபர்களுடன் தொடர்பில் இருங்கள்.

லிங்க்ட்இன் போன்ற தளங்களில் உங்கள் தொழில்முறை நெட்வொர்க்கை உருவாக்குங்கள். நல்ல வேலை வாய்ப்புகள் பெரும்பாலும் பரிந்துரைகள் மூலமாகவே வருகின்றன.

3. வேலை தேடும் தளங்களில் பதிவு செய்யுங்கள்:

நௌக்ரி, மான்ஸ்டர், லிங்க்ட்இன், கிளாஸ்டோர் போன்ற வேலை தேடும் தளங்களில் உங்கள் சுயவிவரத்தை உருவாக்கி, பதிவு செய்யுங்கள். தினமும் புதிய வேலை வாய்ப்புகளைத் தேடி பார்த்து, உங்களுக்கு ஏற்ற வேலைகளுக்கு உடனே விண்ணப்பிக்கவும்.

4. திறமைகளை மேம்படுத்துதல்:

உங்கள் துறையில் புதிதாக என்னென்ன தொழில் நுட்பங்கள் அல்லது திறன்கள் தேவைப்படுகின்றன என்பதை ஆராய்ந்து, அவற்றை கற்றுக் கொள்ளுங்கள். ஆன்லைன் படிப்புகள், சான்றிதழ் படிப்புகள் அல்லது குறுகிய காலப்பயிற்சி வகுப்புகளில் சேர்ந்து உங்கள் திறமைகளை மேம்படுத்துங்கள். இது உங்கள் ரெஸ்யூமேவுக்கு கூடுதல் வலிமை சேர்க்கும்.

5. மாதிரி நேர்காணல்களில் பங்கேற்பது:

நேர்காணல் அனுபவத்தைப் பெறுவதற்கு மாதிரி நேர்காணல்கள் மிகவும் பயனுள்ளதாக இருக்கும். உங்கள் நண்பர்கள் அல்லது வழிகாட்டிகளிடம் உங்களை நேர்காணல் செய்யுமாறு கேட்டுக் கொண்டு, பொதுவான கேள்விகளுக்குப் பதிலளிக்கும் பயிற்சி எடுத்துக் கொள்ளுங்கள். இது உங்கள் தன்னம்பிக்கையை வளர்த்து, உண்மையான நேர்காணல்களை நேர்த்தியுடன் எதிர்கொள்ள உதவும்.

6. தொடர்ச்சியான முயற்சியும் நம்பிக்கையும்:

வேலை தேடுவது ஒரு நீண்ட பயணம். இருப்பினும், மனம் தளராமல் தொடர்ந்து முயற்சி செய்யுங்கள். ஒவ்வொரு நிராகரிப்பும் ஒரு புதிய கற்றல் அனுபவம் என்பதை நினைவில் கொள்ளுங்கள். உங்கள் திறமைகளின் மீது நம்பிக்கை வைத்து, விடாமுயற்சியுடன் செயல்படுங்கள். சரியான வாய்ப்பு உங்களைத் தேடி வரும். கல்லூரிப் படிப்பு முடிந்த மகிழ்ச்சியுடன், மேற்கூறிய வழிமுறைகளைப் பின்பற்றி உங்கள் வாழ்க்கையின் அடுத்த கட்டத்தை நம்பிக்கையுடன் தொடங்குங்கள்.