நீலம், பச்சை, ஆரஞ்சு... ஆவின் பால் பாக்கெட் நிறங்களின் ரகசியம் தெரியுமா? உங்களுக்கு எது சிறந்தது?

வண்ணக் குறியீடுகளும் அவற்றின் நன்மைகளும்:

தமிழ்நாட்டில் உள்ள ஆவின், அமுல் மற்றும் பிற பால் பிராண்டுகள், நுகர்வோர்கள் சுலபமாகப் பாலின் வகையை அடையாளம் காண ஒரு வண்ணக் குறியீட்டு முறையைப் பின்பற்றுகின்றன. இந்த முறை இந்தியா முழுவதும் பரவலாகப் பயன்படுத்தப்படுகிறது.

நீல நிற பாக்கெட்டுகள்: சுமார் 3% கொழுப்புள்ள டோன்டு பாலைக் குறிக்கின்றன. இது தேநீர், காபி அல்லது குடிப்பதற்கு அன்றாடப் பயன்பாட்டிற்கு ஏற்றது. மிதமான கொழுப்புடன் ஊட்டச்சத்தை சமநிலைப்படுத்துவதால், உடல் எடை அல்லது கொழுப்பைக் கட்டுப்படுத்து பவர்களுக்கு இது சிறந்தது.

பச்சை நிற பாக்கெட்டுகள்: சுமார் 4.5% கொழுப்புள்ள தரப்படுத்தப்பட்ட பாலைக் குறிக்கின்றன. இது சற்று கிரீமியாக இருப்பதால், பானங்களில் செறிவான சுவையை விரும்பும் குடும்பங்களுக்கு ஏற்றது. சமச்சீரான ஊட்டச்சத்து தேவைப்படும் பெரியவர்களுக்கு ஏற்றது.

ஆரஞ்சு நிற பாக்கெட்டுகள்: 6% கொழுப்புள்ள ஃபுல் கிரீம் பாலைக் குறிக்கின்றன. இது செறிவான மற்றும் கிரீமியான சுவையுடையது. குழந்தைகள், வளரும் பதின்ம வயதினர் அல்லது தயிர், இனிப்பு வகைகள் தயாரிக்க ஏற்றது. இது அதிக கலோரிகளையும், ஆற்றலையும் வழங்குகிறது.

மெஜந்தா(Magenta) சிவப்பு பாக்கெட்டுகள்: வெறும் 1.3% கொழுப்புச் சத்து மட்டுமே கொண்ட பாலைக்(double-toned) குறிக்கின்றன. இதய நோய்கள், நீரிழிவு நோய் உள்ளவர்கள் அல்லது கடுமையான எடைக்கட்டுப்பாட்டு உணவுமுறையில் இருப்பவர்களுக்கு இது பரிந்துரைக்கப் படுகிறது.

இந்த நான்கைத் தாண்டிய பிற வண்ணங்கள் இருக்கிறதா?:

நீலம், பச்சை, ஆரஞ்சு மற்றும் மெஜந்தா/சிவப்பு ஆகியவற்றைத் தவிர, சில பிராண்டுகள் பசுவின் பால் அல்லது சிறப்பு வலுவூட்டப்பட்ட(special fortified) வகைகளுக்காக மஞ்சள் பாக்கெட்டுகளையும் பயன்படுத்துகின்றன. இவை குறைவாகவே காணப்பட்டாலும் சில பிராந்தியங்களில் உள்ளன. எப்போது இந்த முறை அமலானது?

இந்தியாவில் பால் பாக்கெட்டுகளுக்கான வண்ணக் குறியீட்டு முறை, நுகர்வோர் பல்வேறு வகையான பால்களை விரைவாக அடையாளம் காணும் ஒரு எளிய வழியாக 1980-கள் மற்றும் 1990-களில் அறிமுகமானது. இது ஒரு முறையான சட்டத்தின் மூலம் கொண்டு வரப்படவில்லை என்றாலும்...

இந்திய உணவுப் பாதுகாப்பு மற்றும் தர நிர்ணய ஆணையத்தின் (FSSAI) வழிகாட்டுதலின் கீழ் இது ஒரு பொதுவான தொழில்முறை நடைமுறையாக மாறியது. அமுல் (Amul), மதர் டெய்ரி (Mother Dairy) மற்றும் ஆவின் (Aavin) போன்ற முன்னணி பால் நிறுவனங்கள், பாலில் உள்ள கொழுப்புச்சத்தின் அளவை வேறுபடுத்திக் காட்ட நீலம், பச்சை, ஆரஞ்சு மற்றும் சிவப்பு போன்ற வண்ணங்களைப் பயன்படுத்தத் தொடங்கின. பல்வேறு கல்வித் தகுதி வேறுபாடுகள் இருந்த அப்போதைய இந்தியாவில் பாலின் வகையை எளிதாக அடையாளம் காணவேண்டிய தேவையே இத்திட்டத்தின் உருவாக்கத்திற்குக் காரணமாக அமைந்தது.

காலப்போக்கில் ஒரு நடைமுறைத் தரநிலையாக (de facto standard) பரவலானது. உலகளவில் பெரும்பாலான நாடுகள் வண்ணங்களுக்குப் பதிலாக எழுத்துப்பூர்வமான லேபிள்களையோ (labels) அல்லது அதன் முடிகளை வைத்து வியாபாரம் ஆகிறது. பாலின் விலைதான் உங்களுக்கு முக்கியமா?

சிலர் பணத்தைச் சேமிப்பதற்காகவோ அல்லது தங்கள் பட்ஜெட்டுக்குத் தகுந்தவாறோ பால் பாக்கெட்டுகளைத் தேர்ந்தெடுக்கிறார்கள்; ஆனால், இந்தத் தேர்வு எப்போதும் அவர்களின் ஆரோக்கியத்திற்கு உகந்ததாக இருக்காது.

ஒவ்வொரு வண்ணக் குறியீட்டுப் பாலும், வெவ்வேறு வயதிற்குட்பட்டவர்கள் மற்றும் உடல் தேவைகளுக்காக வடிவமைக்கப்பட்ட ஒரு குறிப்பிட்ட ஊட்டச்சத்து விவரத்தைக் கொண்டுள்ளது. உதாரணமாக, முழு கொழுப்புள்ள பால் குழந்தைகளின் வளர்ச்சிக்கு உதவுகிறது.

அதே சமயம் குறைந்த கொழுப்புள்ள(Double toned) பால் பெரியவர்கள் கொழுப்பைக் கட்டுப்படுத்த உதவுகிறது. விலையை மட்டும் கருத்தில்கொண்டு தேர்ந்தெடுப்பது குறுகிய கால சேமிப்பைத் தந்தாலும், நீண்டகால ஆரோக்கியத்திற்கு ஆபத்தை விளைவிக்கும். ஆரோக்கிய நன்மைகளுடன், வாழ்க்கை முறைத் தேவைகளின் அடிப்படையில் பாலைத் தேர்ந்தெடுப்பதே புத்திசாலித் தனமான அணுகுமுறையாகும்.

இந்தத் தகவல்களை அறிந்துகொள்வதன் மூலம், உங்கள் குடும்பத்தினரின் வயது மற்றும் ஆரோக்கியத் தேவைகளுக்கு ஏற்ற சரியான பாலை நீங்கள் துல்லியமாகத் தேர்வு செய்ய முடியும். தேவையற்ற மருத்துவச் செலவுகளைக் குறைத்து, சரியான ஊட்டச்சத்தைப் பெற்று, உங்கள் அன்றாட பட்ஜெட்டையும் ஆரோக்கியத்தையும் ஒரே நேரத்தில் சீராகப் பராமரிக்கும் தெளிவான முடிவை உங்களால் எடுக்க முடியும்.