குழந்தைகளின் சிரிப்பு, கலை, இசை: முழுமையான வளர்ச்சிக்கு உதவும் 3 மந்திரங்கள்!

குழந்தையின் வளர்ச்சியில் அறிவு, உடல், மனம் மட்டுமல்லாமல், சிருஷ்டி சக்தியும் (Creativity) முக்கியப் பங்கு வகிக்கிறது. சிரிப்பு, கலை, இசை போன்றவை குழந்தையின் கற்பனை உலகத்தை விரிவாக்கி, அவர்களுக்கு தனித்துவமான சிந்தனை மற்றும் திறன்களை வழங்குகின்றன. அவை குறித்து இந்தப் பதிவில் காண்போம்.

குழந்தையின் சிரிப்பு - மன நலத்தின் அடித்தளம்: சிரிப்பு என்பது ஒரு இயற்கை மருந்து. சிரிக்கும் குழந்தைகள் அதிக உற்சாகத்துடன் வாழ்கின்றனர். சிரிப்பு மன அழுத்தத்தை குறைத்து, குழந்தைகளில் நல்ல சமூக உறவுகளை வளர்க்கிறது. பெற்றோர்கள் குழந்தையுடன் விளையாடி, சிரிக்க வைக்கும் சூழல் உருவாக்கினால் அவர்களின் தன்னம்பிக்கை அதிகரிக்கிறது.

கலை - கற்பனையின் கதவு: வரைதல், ஓவியம், சிற்பம் போன்ற கலை வடிவங்கள் குழந்தைகளுக்கு வெளிப்படுத்தும் மொழி ஆகிறது. கலைக்குள் ஈடுபடும்போது, குழந்தைகள் புதுமையான சிந்தனையை கற்றுக்கொள்கிறார்கள். இது கவனக்குறைவு, கோபம், சோர்வு போன்ற உணர்வுகளை சமநிலைப்படுத்த உதவுகிறது. சிறு வயதில் கலை வளர்த்தெடுக்கப்படும்போது, குழந்தைகள் பிரச்னைகளை புதுமையாகத் தீர்க்கும் திறனைப் பெறுகின்றனர்.

இசை - மனம் மற்றும் அறிவை இணைக்கும் பாலம்: இசை குழந்தைகளின் மொழி, கற்றல் திறனை அதிகரிக்கிறது. இசையில் ஈடுபடும்போது மூளையின் இரு பக்கங்களும் (Left & Right Brain) செயல்பட்டு அறிவு வளர்ச்சி வேகமாகிறது. லயத்திற்கு ஏற்ப பாடும் அல்லது இசைக்கருவி வாசிக்கும் குழந்தைகளில் ஒழுங்கு, பொறுமை, கவனம் அதிகரிக்கிறது. இசை குழந்தையின் மனநலத்தையும், உள் அமைதியையும் பேணுகிறது.

சிருஷ்டி வளர்ப்பின் சக்தி: குழந்தை தனது எண்ணங்கள், உணர்வுகளை வெளிப்படுத்தும் சக்தி பெறுகிறது. கலை மற்றும் இசை புதுமையான கேள்விகளை எழுப்பும் திறனை வளர்க்கிறது. குழுவாகப் பாடுதல் அல்லது நாடகம் ஆடுதல், ஒத்துழைப்பை கற்பிக்கிறது. கோபம், துக்கம், பயம் போன்றவற்றை சமாளிக்க உதவுகிறது. அறிவு, உணர்ச்சி, உடல், ஆன்மிகம் ஆகிய அனைத்தும் சமநிலைப்படுகின்றன.

தந்தை - தாயின் பங்கு குழந்தை மனநலத்தில்: குழந்தைக்கு அன்பும் அக்கறையும் தரும் சூழல், மன அமைதியையும் நம்பிக்கையையும் வளர்க்கிறது. வீட்டில் தகராறு, வன்முறை, அவமதிப்பு போன்றவை இருந்தால் குழந்தை பயம், பதற்றம், தாழ்வு மனப்பான்மை கொண்டு வளர வாய்ப்பு அதிகம். சிறு வயதில் குழந்தைகள் தங்களின் கோபம், துக்கம், மகிழ்ச்சி போன்ற உணர்ச்சிகளை எப்படி வெளிப்படுத்துவது என்று அறியாமல் தவிக்கிறார்கள். தந்தை, தாய் அவர்களை கேட்டுக் கொண்டு, “உனக்கு கோபம் வந்திருக்கிறதே, அதை அமைதியாக சொல்லலாம்” என்று கற்றுக் கொடுத்தால் குழந்தை உணர்ச்சி கட்டுப்பாட்டை கற்றுக்கொள்கிறது.

குழந்தைகள் பெற்றோரின் அன்பு, அரவணைப்பு, பாராட்டு ஆகியவற்றை உணரும்போது தன்னம்பிக்கை வளரும். “நீ முயன்றாய், அதுவே பெரிய சாதனை” என்று ஊக்குவிக்கும் வார்த்தைகள், அவர்களின் மனநிலையை சீராக வைத்திருக்கும். “தோல்வி வந்தால் மீண்டும் முயற்சி செய்” என்று சொல்லி வழி காட்டும் பெற்றோர்கள், குழந்தையின் மன வலிமையை அதிகரிக்கிறார்கள்.

பெற்றோர் தங்களது வாழ்க்கை முறையால் குழந்தைகளுக்கு முன்னுதாரணமாக இருந்து சாந்தமாக சண்டைகளைத் தீர்த்தால், குழந்தைகளும் அதே குணத்தை பின்பற்றுவர். மன அழுத்தத்தை சீராக கையாளும் பெற்றோரைப் பார்த்து, குழந்தைகளும் ஆரோக்கியமான வழிகளைக் கற்கின்றனர். நண்பர்களுடன் விளையாடுதல், குடும்பத்தினருடன் நேரம் செலவிடுதல் போன்ற சமூக அனுபவங்களை பெற்றோர்கள் ஏற்படுத்தித் தரும்போது, குழந்தை தன்னம்பிக்கை மற்றும் கருணை மனப்பான்மை பெறுகிறது.

குழந்தைகளின் சிரிப்பு, கலை, இசை ஆகியவை அவர்களின் எதிர்காலத்தை கட்டமைக்கும் முக்கியமான கருவிகள். பெற்றோர்கள் மற்றும் ஆசிரியர்கள் குழந்தைகளை விளையாட்டு, கலைச்செயல், இசை வழியாக சுதந்திரமாக வெளிப்படுத்த உதவினால், அவர்கள் புத்திசாலி மட்டுமல்லாது, முழுமையான மனிதராக உருவாக முடியும்.