தீபாவளிக்கு பின் தெருவெங்கும் பட்டாசுக் காகிதங்களா? உடனே செய்ய வேண்டிய அவசியமான விஷயங்கள்!

தீபாவளி என்றாலே புத்தாடைகள், இனிப்புகள், உறவினர்களின் சந்திப்பு, பட்டாசு வெடிக்கும் மகிழ்ச்சி என வீடெங்கும் கொண்டாட்டமாக இருக்கும். ஆனால், தீபாவளி முடிந்த மறுநாள் காலையில் வீட்டுக்கு வெளியே பார்த்தால் எங்கு பார்த்தாலும் பட்டாசுக் காகிதங்கள், மத்தாப்பு குச்சிகள், பட்டாசுப் பெட்டிகள் எனக் குப்பைகள் சிதறிக் கிடக்கும். இவற்றை அப்படியே விட்டுவிடாமல் எப்படி சுத்தம் செய்வது? எந்தெந்த விஷயங்களில் கவனமாக இருக்க வேண்டும்? வாங்க தெரிந்து கொள்வோம்.

1. பட்டாசு வெடித்ததும் அவசரப்படாதீர்கள்!

பட்டாசு வெடித்த உடனேயே அந்த இடத்தைச் சுத்தம் செய்யத் தொடங்கி விடக்கூடாது. சில பட்டாசுகளில் உள்ளே நெருப்பு அணையாமல் இருக்கலாம். அதனால் சிறிது நேரம் கழித்தே குப்பைகளைச் சேகரிக்க வேண்டும். அதுவரை குழந்தைகளை அந்தப் பக்கம் செல்ல விடாதீர்கள். குறிப்பாக, பாதி எரிந்த பட்டாசுகளைத் தொடவே கூடாது.

2. தண்ணீரில் நனைத்த பிறகு அகற்றுங்கள்!

பட்டாசு வெடித்த பிறகு கிடக்கும் காகிதங்கள், மத்தாப்பு குச்சிகள் ஆகியவற்றில் சிறிய நெருப்புத் துண்டுகள் இருக்கலாம். அதனால் அவற்றைச் சேகரிக்கும் முன்பு முழுமையாக அணைந்துவிட்டதா என்பதை உறுதி செய்ய வேண்டும். பாதுகாப்பாகச் சேகரித்த பிறகு தண்ணீரில் நன்றாக நனைத்து, மீண்டும் தீப்பிடிக்க வாய்ப்பில்லாதபடி செய்யலாம். வெடிக்காத பட்டாசுகளுக்கு இந்த முறையைப் பயன்படுத்தாமல் தனியாகக் கையாள வேண்டும்.

3. பட்டாசுக் குப்பைகளை எப்படிப் பிரிக்க வேண்டும்?

பட்டாசு வெடித்த பிறகு கிடைக்கும் குப்பைகள் எல்லாமே ஒரே மாதிரியானவை கிடையாது. எரிந்த பட்டாசுக் காகிதங்கள், மத்தாப்பு குச்சிகள், ராக்கெட் குச்சிகள், பட்டாசுப் பெட்டிகளின் அட்டைகள், பிளாஸ்டிக் கவர்கள் எனப் பல வகையான குப்பைகள் இருக்கும். இவற்றை எல்லாம் ஒன்றாகக் கலந்து போடாமல் தனித்தனியாகப் பிரித்து வையுங்கள்.

முழுமையாக எரிந்து, நன்றாக அணைந்துவிட்ட காகிதங்கள் மற்றும் அட்டைகளைத் தனியாகச் சேகரிக்கலாம். பிளாஸ்டிக் கவர்களையும் தனியாகப் பிரிக்க வேண்டும். வெடிக்காமல் இருக்கும் பட்டாசுகளையும், பாதி எரிந்த பட்டாசுகளையும் மற்ற குப்பைகளுடன் சேர்க்கவே கூடாது. அவற்றைத் தொடாமல் பாதுகாப்பான இடத்தில் வைத்து, சம்பந்தப்பட்ட அதிகாரிகளின் அறிவுறுத்தலின்படி அகற்ற வேண்டும்.

4. குப்பைகளைச் சுத்தம் செய்யும்போது கவனம்!

பட்டாசுக் குப்பைகளை வெறும் கைகளால் அள்ளக்கூடாது. கைகளில் காயம் ஏற்படாமல் இருக்க கையுறை அணிந்துகொள்ள வேண்டும். கால்களில் செருப்பு அணிந்திருக்க வேண்டும். குப்பைகளைச் சேகரிக்க நீளமான துடைப்பத்தைப் பயன்படுத்தலாம். சிறிய குழந்தைகளை இந்த வேலையில் ஈடுபடுத்த வேண்டாம். பெரியவர்கள் மட்டுமே கவனமாகச் சுத்தம் செய்ய வேண்டும்.

5. தெருவில் குப்பைகளைப் போடாதீர்கள்!

நம்ம வீட்டுக்கு முன்னால் பட்டாசு வெடித்திருந்தாலும், அதன் குப்பைகளைத் தெருவிலேயே விட்டுவிடக் கூடாது. மற்றவர்கள் நடந்து செல்லும்போதும், வாகனங்களில் செல்லும்போதும் சிரமம் ஏற்படும். அதனால் நம்ம வீட்டு வாசலைச் சுத்தம் செய்வதுடன், தெருவிலும் குப்பைகள் இல்லாமல் பார்த்துக்கொள்ள வேண்டும். சாக்கடையிலும் மழைநீர் செல்லும் பாதையிலும் பட்டாசுக் குப்பைகளைக் கொட்டாதீர்கள்.

6. வெடிக்காத பட்டாசுகளை என்ன செய்வது?

சில நேரங்களில் பட்டாசுகள் வெடிக்காமல் அப்படியே இருக்கும். அப்படிப்பட்ட பட்டாசுகளை மீண்டும் பற்ற வைக்க முயற்சி செய்யாதீர்கள். தண்ணீரில் நனைந்த பட்டாசுகளை உலர்த்தி மீண்டும் பயன்படுத்துவதும் ஆபத்தானது. அவற்றைத் தொடாமல் குழந்தைகளுக்கு எட்டாத இடத்தில் வைத்து, உள்ளூர் தீயணைப்புத் துறை அல்லது நகராட்சி வழங்கும் வழிகாட்டுதலின்படி அகற்ற வேண்டும்.

7. பட்டாசுக் குப்பைகளை எரிக்காதீர்கள்!

சேகரித்த பட்டாசுக் குப்பைகளை ஒரே இடத்தில் குவித்து நெருப்பு வைத்துக் கொளுத்துவது மிகவும் ஆபத்தானது. ஏற்கெனவே எரிந்துவிட்டதாக நினைக்கும் பட்டாசுகளில் கூட வெடிக்காத மருந்துப் பொருட்கள் இருக்கலாம். இதனால் எதிர்பாராத விபத்துகள் ஏற்பட வாய்ப்புள்ளது. எனவே, பட்டாசுக் குப்பைகளை ஒருபோதும் எரிக்காமல், உள்ளாட்சி அமைப்பின் அறிவுறுத்தலின்படி அகற்ற வேண்டும்.

8. வீட்டில் செல்லப்பிராணிகள் இருந்தால் கவனம்!

நாய், பூனை போன்ற செல்லப்பிராணிகள் பட்டாசுச் சத்தத்தைக் கேட்டுப் பயப்படுவதுடன், கீழே கிடக்கும் குப்பைகளையும் முகர்ந்து பார்க்கும். சில நேரங்களில் அவற்றை வாயில் போட்டுக் கொள்ளவும் வாய்ப்பிருக்கிறது. அதனால் பட்டாசு வெடித்த இடத்தில் அவற்றைத் தனியாக விடாதீர்கள். குப்பைகளை முழுமையாகச் சுத்தம் செய்த பிறகே அந்த இடத்திற்குச் செல்ல அனுமதியுங்கள்.

கொண்டாட்டம் மட்டுமல்ல... சுத்தமும் முக்கியம்!

தீபாவளி அன்று புத்தாடை அணிந்து, பலகாரங்கள் சாப்பிட்டு, பட்டாசு வெடித்து மகிழ்கிறோம். அதேபோல மறுநாள் காலையில் நம் வீட்டையும் தெருவையும் சுத்தமாக வைத்துக் கொள்வதிலும் அக்கறை காட்ட வேண்டும். நம் வீட்டை மட்டும் சுத்தமாக வைத்தால் போதாது. நம்மைச் சுற்றியுள்ள இடங்களையும் சுத்தமாக வைத்துக் கொள்வோம். அப்போதுதான் நம் தீபாவளிக் கொண்டாட்டம் முழுமையடையும்!

வாசகர்கள் பாதுகாப்பான மற்றும் படிப்படியான முறைகள் மூலம், தீபாவளிக்குப் பிந்தைய பட்டாசுக் குப்பைகளை அகற்றுவது எப்படி என்பதை அறிந்துகொள்கிறார்கள்; இதன் மூலம் குழந்தைகள், செல்லப்பிராணிகள் மற்றும் சுற்றுச்சூழலை மறைந்திருக்கும் விபத்துகளிலிருந்து பாதுகாக்க முடியும்.