90-ஸ் கிட்ஸ் செய்ய பயந்த விஷயத்தை அசால்டாக செய்யும் 2K கிட்ஸ்.. ஆஃபீஸில் நடக்கும் அலப்பறைகள்!

இன்றைய கார்ப்பரேட் ஆஃபீஸ்களில் நடக்கும் மிக சுவாரஸ்யமான ஒரு போர் என்றால், அது 90ஸ் கிட்ஸுக்கும் 2கே கிட்ஸுக்கும் இடையே நடக்கும் பனிப்போர் தான். மில்லினியல்ஸ் என்று சொல்லப்படும் 90ஸ் கிட்ஸ் எப்போதுமே வேலைக்காக தங்களது வாழ்க்கையை அர்ப்பணித்துப் பழகியவர்கள். ஆனால், இப்போது வேலைக்கு வரும் ஜென் ஜி (Gen Z) தலைமுறையினரின் அணுகுமுறையே முற்றிலும் வேறாக இருக்கிறது. 

இவர்களது இந்த வித்தியாசமான போக்கை பார்த்து முந்தைய தலைமுறையினர் இது ஒரு மிகப்பெரிய ஆட்டிட்யூட் பிரச்சனை என்று அடிக்கடி குறை சொல்கிறார்கள். நிஜமாகவே இவர்களிடம் பிரச்சனை இருக்கிறதா அல்லது இவர்கள் சிந்தனை சற்று தெளிவாக இருக்கிறதா என்பதை இந்த பதிவில் பார்க்கலாம் வாங்க.

உழைப்பு Vs எல்லை!

மில்லினியல்ஸ் தலைமுறையினர் வேலை கிடைத்தால் போதும் என்று நினைத்து, மேனேஜர் சொல்லும் எல்லா வேலைகளையும் மறுப்பு சொல்லாமல் செய்வார்கள். வார இறுதி நாட்களிலும் லேப்டாப்பை திறந்துகொண்டு வேலை பார்ப்பதை தங்களது கடமையாகவும் ஒரு பெருமையாகவும் நினைத்தார்கள். ஆனால், இன்றைய ஜென் இஸட் இளைஞர்கள் இதில் ரொம்பவே கறாராக இருக்கிறார்கள். மாலை ஐந்து மணி ஆகிவிட்டால், எந்த ஒரு தயக்கமும் இல்லாமல் லேப்டாப்பை மூடிவிட்டு கிளம்பிவிடுகிறார்கள். 

தங்கள் தனிப்பட்ட நேரத்தை அலுவலகத்திற்காக தியாகம் செய்ய அவர்கள் கொஞ்சமும் தயாராக இல்லை. தங்களுக்கு எவ்வளவு சம்பளம் கொடுக்கப்படுகிறதோ, அந்த அளவிற்கான வேலையை மட்டும் சரியாக செய்து முடிப்பது இவர்களது பாலிசியாக இருக்கிறது. இதைத்தான் கார்ப்பரேட் உலகில் பலரும் திமிரு மற்றும் ஈகோ என்று தவறாகப் புரிந்துகொள்கிறார்கள்.

அதிகாரத்தை நோக்கும் விதம்!

முன்பெல்லாம் பாஸ் ஒரு வேலையைச் சொன்னால், அது சரியோ தவறோ அப்படியே தலை ஆட்டிவிட்டு செய்யும் பழக்கம் மில்லினியல்ஸிடம் பரவலாக இருந்தது. அனுபவத்திற்கும் பதவிக்குமே அவர்கள் அதிக மரியாதை கொடுத்தார்கள். ஆனால் இன்றைய இளைய தலைமுறையினர் அப்படி கிடையாது. ஒரு வேலையை எதற்காக செய்ய வேண்டும், இதனால் நிறுவனத்திற்கும் எனக்கும் என்ன பயன் என்று நேருக்கு நேராக லாஜிக்கலாக வாதிடுகிறார்கள். தங்களுக்குரிய மரியாதை கிடைக்கவில்லை என்றால், அடுத்த நிமிடமே ராஜினாமா கடிதத்தை நீட்டவும் இவர்கள் கொஞ்சமும் தயங்குவதில்லை.

மனநலனுக்கு முக்கியத்துவம்!

கடுமையான காய்ச்சல் அல்லது உடல்நிலை சரியில்லை என்றால் மட்டுமே விடுமுறை எடுக்கும் காலம் எல்லாம் மலையேறிவிட்டது. தங்களுக்கு அதிக மன அழுத்தம் இருந்தால், எனக்கு இன்று மென்டல் ஹெல்த் பிரேக் தேவை என்று கூலாக லீவ் போடும் தைரியம் இந்த புதிய கிட்ஸிடம் மட்டும்தான் இருக்கிறது. மன உளைச்சலோடு வேலை பார்ப்பதை விட, ஒரு நாள் ஓய்வு எடுப்பது தப்பு கிடையாது என்பது இவர்களது அசைக்க முடியாத நம்பிக்கை. இதை பார்க்கும் முந்தைய தலைமுறையினருக்கு இது கொஞ்சம் அதிர்ச்சியாகவே இருக்கிறது.

இந்த ஜென் ஜி தலைமுறையினரிடம் இருப்பது ஆட்டிட்யூட் பிரச்சனை கிடையாது. அவர்கள் தங்கள் வாழ்க்கைக்கும் வேலைக்கும் இடையே ஒரு தெளிவான கோட்டை ரொம்ப நேர்த்தியாக வரைந்து வைத்திருக்கிறார்கள். மில்லினியல்ஸ் தங்களது உரிமைகளை கேட்க பயந்தார்கள், ஆனால் இன்றைய இளைஞர்கள் அதை நெஞ்சை நிமிர்த்தி தைரியமாகக் கேட்கிறார்கள்.

இவர்களைப் பார்த்து குறை சொல்வதை விட, வேலைக்கும் சொந்த வாழ்க்கைக்கும் எப்படி ஒரு சரியான பேலன்ஸ் வைப்பது என்பதை முந்தைய தலைமுறையினர் இவர்களிடம் இருந்துதான் கற்றுக்கொள்ள வேண்டும்.