மண்பானை வாங்கியதும் இந்த தப்பை மட்டும் செஞ்சிடாதீங்க.. பாதுகாப்பாக பராமரிக்க சூப்பர் டிப்ஸ்!

நமது முன்னோர்கள் இந்த கொடூரமான வெயிலை சமாளிக்க ஒரு சூப்பரான வழியை கண்டுபிடித்து வைத்துள்ளார்கள். அதுதான் மண்பானை தண்ணீர். எந்த ஒரு மின்சாரமும் இல்லாமல் இயற்கையாகவே தண்ணீரை சில்லென்று மாற்றும் இந்த பானையின் நன்மைகள் மற்றும் அதை எப்படி சரியாக பயன்படுத்துவது என்பதை பற்றி இப்போது பார்ப்போம்.

ஆரோக்கியத்தை அள்ளித்தரும் நன்மைகள்!

களிமண்ணால் செய்யப்படும் இந்த பானைகளில் கண்ணுக்கு தெரியாத சிறு துவாரங்கள் இருக்கும். அதன் வழியாக தண்ணீர் கசிந்து ஆவியாகும் போது உள்ளே இருக்கும் தண்ணீர் இயற்கையாகவே மிகவும் குளிர்ச்சியாக மாறிவிடும். பிரிட்ஜ் தண்ணீரை குடித்தால் பலருக்கு உடனே சளி பிடிக்கும் அல்லது தொண்டை கட்டிக்கொள்ளும். 

ஆனால் இந்த பானை தண்ணீர் தொண்டைக்கு மிகவும் இதமாக இருக்கும். மேலும் இதில் இயற்கையாகவே காரத்தன்மை இருப்பதால், நமது உடலில் உள்ள அமிலத்தன்மையை சமன் செய்து செரிமான பிரச்சனைகளை ஓட ஓட விரட்டும். பிளாஸ்டிக் பாட்டில்களில் இருக்கும் எந்த ஒரு கெமிக்கலும் இதில் கிடையாது என்பதால் இது நூறு சதவீதம் பாதுகாப்பானது மற்றும் மெட்டபாலிசத்தை அதிகரிக்கக் கூடியது.

தண்ணீர் குடிக்கும் சரியான முறை!

தாகமாக இருக்கிறது என்று ஒரே மூச்சில் பானை தண்ணீரை கடகடவென அப்படியே குடிப்பது தவறான பழக்கமாகும். அரை மணி நேரத்திற்கு ஒருமுறை கொஞ்சம் கொஞ்சமாக சிப் செய்து குடிப்பது தான் உடலுக்கு மிகவும் நல்லது. வெளியில் வெயிலில் அலைந்துவிட்டு வீட்டிற்கு வந்ததும் ஒரு பத்து நிமிடம் கழித்து இந்த தண்ணீரை குடித்தால் உடல் சூடு உடனே தணியும். 

உங்களுக்கு இன்னும் கூடுதல் சுவையும் குளிர்ச்சியும் தேவைப்பட்டால், பானைக்குள் கொஞ்சம் புதினா அல்லது துளசி இலைகளை போட்டு வைக்கலாம். அதேபோல மிகவும் சூடான உணவுகளை சாப்பிட்ட உடனே இந்த குளிர்ந்த நீரை குடிப்பதை சற்று தவிர்க்க வேண்டும்.

சுத்தம் செய்யும் சிம்பிள் ரகசியம்!

பானையை சரியாக பராமரிக்காவிட்டால் அதில் கிருமிகள் சேர்ந்து பல நோய்களை உருவாக்கிவிடும். இரண்டு அல்லது மூன்று நாட்களுக்கு ஒருமுறை வெதுவெதுப்பான தண்ணீரை ஊற்றி பானையை நன்றாக கழுவ வேண்டும். இதை சுத்தம் செய்ய எக்காரணம் கொண்டும் சோப்பு அல்லது லிக்விட்களை பயன்படுத்தவே கூடாது. 

அப்படி செய்தால் கெமிக்கல்கள் பானையின் துவாரங்களில் நிரந்தரமாக தங்கிவிடும். அதற்கு பதிலாக உப்பு அல்லது பேக்கிங் சோடா போட்டு கழுவிவிட்டு வெயிலில் காய வைப்பது ஒரு அட்டகாசமான ஐடியா. புதிதாக வாங்கும் பானையை ஒரு நாள் முழுவதும் தண்ணீரில் ஊறவைத்த பிறகு தான் பயன்படுத்த தொடங்க வேண்டும்.

மண்பானை என்பது நமது ஆரோக்கியத்தை காக்க முன்னோர்கள் விட்டுச்சென்ற ஒரு மாபெரும் பொக்கிஷம். எப்போதுமே பானையை நேரடியாக தரையில் வைக்காமல் ஒரு ஸ்டாண்ட் மீது வைப்பது தான் மிகவும் சிறந்தது. பல நாட்கள் அடைத்து வைத்த தண்ணீரை குடிக்காமல் தினமும் புதிய தண்ணீரை மாற்றி வாருங்கள். 

இந்த கோடைக்காலத்தில் செயற்கையான குளிர்பானங்களை முற்றிலுமாக தவிர்த்துவிட்டு, இயற்கையான முறையில் நமது உடலை குளிர்ச்சியாகவும் ஆரோக்கியமாகவும் வைத்துக்கொள்ள ஒரு மண்பானையை உடனே வாங்கி வீட்டில் வையுங்கள்.