உஷார்! தேனீக்கள் உங்கள் வீட்டைச் சுற்றி வட்டமிட்டால்? உடனே கவனியுங்கள்!

சில நேரங்களில் உங்கள் வீட்டைச் சுற்றி திடீரென தேனீக்கள் அதிகமாக வட்டமிடுவதைப் பார்த்திருப்பீர்கள். அப்போது பாதுகாப்பாக இருக்க அவற்றின் கூடு இருக்கிறது என்று தேடிப் பார்ப்பது பெரிய சவாலாக இருக்கும். இது போன்ற சமயங்களில் தேன்கூடு எங்கு இருக்கிறது என்று தெரியாமல் வீட்டைச் சுற்றி நடமாடுவது பாதுகாப்பானது அல்ல. ஆனால் சில எளிய குறிப்புகளை வைத்து அந்த தேனீக் கூடு எங்கே இருக்கிறது என்பதை நாம் சுலபமாகக் கண்டுபிடிக்க முடியும். 

பறக்கும் திசையை கவனிக்கவும்! 

தேனீக்களின் பயணப் பாதையை கவனிப்பது மிகச் சிறந்த சரியான அணுகுமுறை. தேனீக்கள் பூக்களிலிருந்து தேனைச் சேகரித்த பிறகு, நேராகத் தங்கள் கூட்டை நோக்கித்தான் பறக்கும். உங்கள் வீட்டுத் தோட்டத்தில் உள்ள பூக்கள் அல்லது தண்ணீர் தேங்கும் இடங்களில் அவை வந்து செல்வதைக் கவனியுங்கள்.

தேனீக்கள் எந்தத் திசையை நோக்கி அதிக எண்ணிக்கையில் நேர்கோட்டில் பறந்து செல்கின்றன என்பதைப் பாருங்கள். அந்த திசையைப் பின்தொடர்ந்தால் கூடு எங்குள்ளது என்பதை துல்லியமாகக் கணிக்கலாம்.

ரீங்கார சத்தத்தைக் கேட்கவும்! 

அதிகாலை அல்லது மாலை நேரங்களில் சுற்றுப்புறம் மிகவும் அமைதியாக இருக்கும். அந்த நேரத்தில் வீட்டைச் சுற்றி மெதுவாக நடந்து பாருங்கள். மரப் பொந்துகள், சுவர் இடுக்குகள் அல்லது கூரையின் ஓரங்களில் காதை வைத்துக் கேளுங்கள். தேனீக்களின் தொடர்ச்சியான ரீங்கார சத்தம் உங்களுக்குத் தெளிவாகக் கேட்கும். இந்த சத்தம் எந்த இடத்திலிருந்து மிகவும் சத்தமாக வருகிறதோ, அங்குதான் நிச்சயமாக கூடு அமைந்திருக்கும்.

பொதுவான இடங்களைப் பார்க்கவும்! 

தேனீக்கள் எப்போதும் மிகவும் பாதுகாப்பான, நிழலான இடங்களையே கூடுகட்டத் தேர்ந்தெடுக்கும். வீட்டைச் சுற்றியுள்ள உயரமான மரக்கிளைகள், அடர்த்தியான செடிகள், மரப் பொந்துகளை முதலில் கவனியுங்கள். வீட்டின் வெளிப்புறத்தில் உள்ள பால்கனி ஓரங்கள், சன்ஷேட் அடிப்புறம், பழைய ஓடுகள் அல்லது கூரை இடுக்குகளைச் சோதியுங்கள்.

வீட்டின் பின்புறம் பயன்படுத்தாமல் போட்டு வைக்கப்பட்டிருக்கும் பழைய மரப்பெட்டிகள், டயர்கள், பழைய பானைகள் அல்லது துளைகள் உள்ள சுவர்களையும் தேடிப் பார்க்க வேண்டும்.

நீர் நிலைகளைச் சுற்றியுள்ள பகுதிகள்! 

உயிர்வாழத் தேனீக்களுக்குத் தண்ணீர் மிகவும் அவசியம். உங்கள் வீட்டில் எங்கேனும் குழாய்களில் தண்ணீர் சொட்டுகிறதா என்று பாருங்கள். செடிகளுக்கு ஊற்றிய தண்ணீர் தேங்கி நிற்கும் இடங்கள் அல்லது திறந்த நீர் தொட்டிகளைச் சுற்றித் தேனீக்கள் மொய்த்தால் கவனமாக இருங்கள். இதற்குக் காரணம் அவற்றின் கூடு மிக அருகிலேயே இருக்கிறது என்று அர்த்தம்.

தேனீ கூட்டைக் கண்டுபிடித்தவுடன், அதன் மிக அருகில் செல்வதோ அல்லது கற்களை எறிந்து கலைக்க முயற்சிப்பதோ மிகவும் ஆபத்தானது. நீங்களாகவே தீ வைப்பதோ அல்லது புகை போடுவதோ கூடாது. இது தேனீக்களை ஆக்ரோஷமாக்கி, மனிதர்களை மொத்தமாகத் தாக்கத் தூண்டும்.

கூடு வீட்டிற்குள் அல்லது ஆபத்தான இடத்தில் இருந்தால், உடனடியாகத் தேனீ வளர்ப்பவர்கள் அல்லது தீயணைப்புத் துறையினரின் உதவியை நாடுங்கள். அவர்களின் உதவியுடன் தேனீக்களைப் பாதுகாப்பாக அகற்றுவதே உங்களுக்கும் குடும்பத்தினருக்கும் சிறந்தது.