குழந்தைகளின் நகம் கடிக்கும் பழக்கத்தை போக்குவது எப்படி?

நகம் கடித்தல் (Nail Biting) மனிதர்களின் அசாதாரணப் பழக்க வழக்கங்களில் ஒன்று. இது ஒரு வகை நோயாகவே கருதப்படுகிறது. இதனை ஆங்கிலத்தில் Onychophagia என்கின்றனர். மனஅழுத்தம், மன முரண், குழப்பம், தாழ்வு மனப்பான்மை, ஒத்துப் போக முடியாமை, இக்கட்டான மனநிலை போன்ற பலவித உள்ளியல் காரணிகளால் இப்பழக்கம் ஏற்படுவதாக ஆராய்ச்சியாளர்கள் கூறுகின்றனர். இது குறித்த மேலும் சில தகவல்களை இப்பதிவில் பார்ப்போம்.

சிறியவர்களில் இருந்து பெரியவர்கள் வரை வயது பேதமின்றி பலருக்கும் நகம் கடிக்கும் பழக்கம் இருக்கின்றது. நகம் கடிக்கும் பழக்கும் பெரும்பாலும் குழந்தைப் பருவத்திலேயேத் தொடங்கி விடுகிறது. பருவ வயதில் அனேகமானவர்கள் இப்பழக்கத்திலிருந்து விடுபட்டு விடுகிறார்கள். குறிப்பிட்ட சிலரால் இப்பழக்கத்திலிருந்து விடுபட முடிவதில்லை. அவர்கள் வயது வந்த பின்னரும் இப்பழக்கத்தைத் தொடர்கிறார்கள். பெரும்பான்மையினர் தம்மை மறந்த நிலையிலேயே நகங்களைக் கடிக்கிறார்கள். பலர் தமது இந்தச் செயற்பாட்டினால் திருப்தியின்மையை அடைந்தாலும், இந்தப் பழக்கத்திலிருந்து மீள முடியாதவர்களாகவே இருக்கிறார்கள்.

ஒரு குழந்தை தனது நகங்களைக் கடிக்கத் தொடங்குவது, அந்தக் குழந்தைக்கு அது வாழும் சூழலில் ஏதோ ஒன்றுடனோ அல்லது யாரோ ஒருவருடனோ ஏதோ ஒரு பிரச்சனை இருக்கிறது என்பதற்கான அறிகுறி என்கின்றனர்.

• குழந்தைகளில் 30 சதவிகிதம் பேர் நகங்களைக் கடிக்கும் பழக்கம் உடையவர்களாக இருக்கின்றனர்.

• வயது வந்தவர்களில் 10 முதல் 15 சதவிகிதம் பேர் நகங்களைக் கடிக்கும் பழக்கம் உள்ளவர்களாக இருக்கின்றன்ர்.

• நகம் கடிக்கும் பழக்கம் ஆழ்மன அழுத்தத்தின் வெளிப்பாடு என்கிறார் ஜெர்மனியைச் சேர்ந்த மார்க்கஸ் பைபெல். பெரியவர்களிடம் அனேகமாக இந்த ஆழ் மன முரண் தொழில் இடங்களிலோ, தனிப்பட்ட வாழ்க்கையிலோ ஏற்படும்.

• குழந்தைகளிடம் அவர்களைச் சுற்றியுள்ள பிரச்சனைகளின் பிரதிபலிப்பும், அவர்களது கடினமான நிலைகளின் உணர்ச்சி வெளிப்பாடுகளும் கூட நகம் கடித்தலுக்குக் காரணமாகின்றன என்கிறார் ஜெர்மனியைச் சேர்ந்த சிசெல்லா டிரேயர் என்பவர். நகம் கடித்தலின் மூலம் அவர்கள் தமது மன அழுத்தத்தைக் குறைத்துக் கொள்கிறார்கள் என்றும் அவர் குறிப்பிடுகிறார்.

பொதுவாக,

• தங்களை மற்றவர்கள் மதிக்காமல் ஒதுக்குகிறார்கள் என்ற பயம், தாழ்வு மனப்பான்மை கொண்டவர்கள் தங்கள் நகங்களைக் கடிக்கிறார்கள்.

• தங்களது கோபங்களை மற்றவர்கள் மீது காட்டமுடியாத இயலாமை நிலையைக் கொண்டவர்கள் தங்கள் நகங்களைக் கடிக்கிறார்கள்.

  என்று நகம் கடிப்பதற்கான் முக்கியக் காரணமாகச் சொல்லப்படுகிறது. நகம் கடிக்கும் பழக்கம் குழந்தைப் பருவத்திலேயேப் பெரும்பான்மையாகத் தொடங்குவதால், அப்பருவத்திலேயே குழந்தைகளைப் அப்பழக்கத்திலிருந்து விடுவிக்க முயற்சிக்க வேண்டும். அதற்குக் கீழ்காணும் சில வழிமுறைகளைப் பின்பற்றிப் பார்க்கலாம்.

• கைகளுக்கு வேறு வேலைகள் கொடுத்தல். (குழந்தைகள் கடிக்கக் கூடிய வளையம், பந்து போன்ற பொருட்களைக் கைகளில் கொடுக்கலாம்.)

• மருந்துக்கடையில் கிடைக்கக் கூடிய கசப்புத் தன்மையுள்ள மருந்து, எண்ணெய், சாயம் போன்றவற்றில் ஏதாவதொன்றை விரல்களில் பூசி விடுதல் அல்லது விரல்களை அவற்றுள் தோய்த்தெடுத்தல்.

• விரல்களை துணிகளால் சுற்றிக் கட்டி விடுதல் அல்லது கையுறை போட்டு விடுதல். (குழந்தைகள் தொலைக்காட்சியில் மூழ்கியிருக்கும் பொழுதுகளில் நகங்களை அதிகமாகக் கடிக்கிறார்கள். அந்த நேரங்களில் இந்த முறையைக் கையாளலாம்.)

• குறிப்பிட்ட சிறிது நேரத்துக்கு நகங்களைக் கடிக்காமல் இருந்தால், குழந்தைக்கு மகிழ்ச்சி தரக் கூடிய ஒரு பொருளைத் தருவதாக வாக்குறுதி கொடுத்தல்

• நகங்களைப் பராமரித்தல் (நகங்களை ஒட்ட வெட்டி, நகங்களுக்குரிய அரத்தால் தேய்த்து, நகங்களை உரமாக்கக் கூடிய சாயம் பூசி, அதன் பின் எண்ணெய் பூசி, மசாஜ் செய்து விடலாம்.)

• குழந்தைகளின் நகம் கடிக்கும் பழக்கத்தைக் கண்டிப்பதோ, பேசுவதோ நகங்களைக் கடிப்பதிலிருந்து மீளுவதற்கு இதுவரை உதவியதில்லை. குழந்தைகளுக்கு ஏற்பட்டிருக்கும் அழுத்தத்தைத் தீர்க்க உதவிட வேண்டும்.

• குழந்தைகள் தம்மை மறந்த நிலையிலேயே நகங்களைக் கடிக்கிறார்கள். அந்த நேரங்களில் பெற்றோர் அதை மெதுவாகச் சுட்டிக் காட்ட வேண்டும். பொது இடங்களில் நகங்களைக் கடித்தல் கூடாது என்பதைக் குழந்தைக்கு அன்போடு அறிவுறுத்த வேண்டும்.

• நகம் கடித்தல் மன அழுத்தத்தின் வெளிப்பாடு. ஆதலால், பெற்றோர் குழந்தை ஏதாவது வகையில் குழந்தை மனம் வருந்திக் கொண்டிருக்கிறதோ என்பதையும், அந்த மன அழுத்தம் குழந்தைக்கு வீட்டில் ஏற்பட்டதா? அல்லது பள்ளியில் ஏற்பட்டதா? என்பதைக் கண்டறிந்து அதிலிருந்து குழந்தை மீளுவதற்கான வழிகளைச் செய்ய வேண்டும்.