இண்டக்ஷன் அடுப்பில் எதை சமைக்கலாம் எதை தவிர்க்கலாம் என்பதற்கான முழு விவரம் இதோ!

சமீப காலமாக உலக நாடுகளில் நடக்கும் பல போர் பதற்றங்களால் நமது ஊரில் சமையல் கேஸ் சிலிண்டர்களுக்கு பெரிய தட்டுப்பாடு வரத் தொடங்கியுள்ளது. இதனால் நடுத்தர மக்கள் பலரும் கேஸ் அடுப்பிற்கு மாற்று வழியாக இண்டக்ஷன் எனப்படும் கரண்ட் அடுப்புகளை ஆர்வமாக வாங்கி பயன்படுத்த ஆரம்பித்துவிட்டார்கள். 

பார்ப்பதற்கு மாடர்னாகவும் அழகாகவும் இருக்கும் இந்த அடுப்பை வாங்கிய பலருக்கும் ஒரு பெரிய குழப்பம் இருக்கும். இதில் வழக்கம் போல சாதம் வடிக்கலாமா, பூரி சுடலாமா என பல குழப்பங்கள் மனதில் ஓடும். இந்த அடுப்பில் எதெல்லாம் சமைக்கலாம், எந்தெந்த விஷயங்களை கட்டாயம் தவிர்க்க வேண்டும் என்பதை பற்றி இந்தப் பதிவில் பார்க்கலாம்.

அன்றாட சமையலுக்கு!

நமது வீட்டில் தினசரி செய்யும் பெரும்பாலான உணவுகளை இந்த கரண்ட் அடுப்பில் ஈஸியாக செய்துவிடலாம். காலையில் எழுந்தவுடன் வைக்கும் டீ, காபி முதல் மதிய நேரத்திற்கான சாதம், குழம்பு மற்றும் காய்கறி பொரியல் என அனைத்தையும் எந்த ஒரு சிரமமும் இல்லாமல் இதில் சமைக்க முடியும்.

குழந்தைகளுக்கு பிடிக்கும் மேகி, பாஸ்தா செய்வது மற்றும் பால் காய்ச்சுவது போன்ற வேலைகளையும் இதில் சீக்கிரமாகவே முடித்துவிடலாம். கேஸ் அடுப்பை விட இது வேலைகளை சுலபமாக்கிவிடும்.

எண்ணெயில் பொரிக்கும் உணவுகள்!

பொதுவாக கரண்ட் அடுப்பில் எண்ணெய் பலகாரங்கள் செய்ய முடியாது என்று பலர் நினைப்பார்கள். ஆனால் அது முற்றிலும் தவறான ஒரு எண்ணம். இதில் நீங்கள் தாராளமாக பூரி, வடை போன்றவற்றை சுட்டு எடுக்கலாம். ஆனால் இதில் கவனிக்க வேண்டிய முக்கியமான விஷயம் வெப்பநிலையை சரியாக பராமரிப்பது தான். 

இந்த அடுப்பில் எண்ணெய் மிக வேகமாக சூடாகிவிடும் என்பதால், அடிப்பாகம் தடிமனாக இருக்கும் வாணலியை பயன்படுத்துவது அவசியம். மிதமான சூட்டில் வைத்து பொரித்தால் உணவுகள் கருகாமல் சூப்பராக வரும்.

தவிர்க்க வேண்டிய விஷயங்கள்!

எல்லா உணவுகளையும் இதில் சமைக்கலாம் என்றாலும், சில குறிப்பிட்ட விஷயங்களை நாம் தவிர்த்து தான் ஆக வேண்டும். பல மணி நேரம் மிதமான தீயில் வைத்து மெதுவாக வேகவைக்க வேண்டிய உணவுகளை இதில் சமைப்பது கொஞ்சம் சிரமமான காரியம்.

சரியான பாத்திரங்கள்!

இந்த அடுப்பிற்கு என ஒரு தனிப்பட்ட டெக்னாலஜி இருக்கிறது. இதன் மேல் வைக்கும் பாத்திரத்தின் அடிப்பகுதி காந்த சக்தியை ஈர்க்கும் வகையில் இரும்பு அல்லது எஃகு எனப்படும் ஸ்டீல் மெட்டீரியலில் செய்யப்பட்டிருக்க வேண்டும். வெறும் அலுமினியம் அல்லது செம்பு பாத்திரங்களை இந்த அடுப்பு கொஞ்சம் கூட ஏற்றுக்கொள்ளாது. அதனால் கடைகளில் பாத்திரங்கள் வாங்கும் போது இண்டக்ஷன் பேஸ் உள்ளதா என்பதை பார்த்து வாங்குவது முக்கியம்.

கேஸ் சிலிண்டர் இல்லை என்ற கவலையை இந்த இண்டக்ஷன் அடுப்புகள் முழுமையாகப் போக்கிவிடும். சரியான பாத்திரங்களை தேர்ந்தெடுத்து, அடுப்பின் வெப்பத்தை எப்படி கன்ட்ரோல் செய்வது என்ற சின்ன ட்ரிக்கை மட்டும் நீங்கள் கற்றுக்கொண்டால் போதும். உங்களின் சமையல் வேலை சரிபாதியாக குறைந்துவிடும்.