பருப்பு வேகவைக்கும் போது குக்கர் இனி பொங்கவே பொங்காது... கவலையை போக்கும் சூப்பர் டிப்ஸ்!

தினமும் காலையில் அவசர அவசரமாக சமைக்கும் போது எல்லோர் வீட்டிலும் நடக்கும் ஒரு எரிச்சலான விஷயம் குக்கர் பொங்குவது தான். பருப்பு அல்லது அரிசியை வைத்துவிட்டு மற்ற வேலைகளை பார்த்துக்கொண்டிருக்கும் போது, குக்கரில் இருந்து மஞ்சள் நிறத்தில் தண்ணீர் பொங்கி வழிந்து அடுப்பு முழுவதும் நாசமாகும். 

இதை மெனக்கெட்டு சுத்தம் செய்வதே பலருக்கும் பெரிய தலைவலியாக மாறும். தண்ணீர் அளவாக வைத்தாலும் சில நேரங்களில் இந்தப் பிரச்சனை வந்து நம்மை பாடாய்ப்படுத்தும். இப்படி டென்ஷன் ஆகும் இல்லத்தரசிகளுக்கு சில சூப்பரான வழிமுறைகள் உள்ளன. 

ஒரு சின்ன ஸ்பூன் போதும்!

பருப்பு அல்லது வேறு ஏதேனும் தானியங்களை குக்கரில் போட்டு தேவையான தண்ணீர் ஊற்றிய பிறகு, மூடியை மூடுவதற்கு முன்பாக ஒரு சிறிய இரும்பு ஸ்பூனை உள்ளே போட்டு விடுங்கள். ஸ்பூன் இல்லை என்றால் ஒரு சிறிய எவர்சில்வர் கிண்ணத்தை கூட உள்ளே போடலாம். தண்ணீர் கொதிக்கும் போது பருப்பில் உள்ள சில வேதிப்பொருட்கள் ஒன்றாக சேர்ந்து நிறைய குமிழ்களை உருவாக்கும். 

அந்த குமிழ்கள் தான் நுரையாக மாறி விசில் வழியாக வெளியே பொங்கி வருகிறது. உள்ளே இருக்கும் அந்த மெட்டல் ஸ்பூன் காற்றில் ஏற்படும் அழுத்தத்தை பெருமளவு குறைத்து குமிழ்கள் அதிகமாக உருவாவதை அடியோடு தடுத்து நிறுத்துகிறது. இது கச்சிதமாக வேலை செய்யும் ஒரு சிம்பிளான அறிவியல் ட்ரிக்ஸ்.

எண்ணெய் மற்றும் சரியான தண்ணீர் அளவு!

ஸ்பூன் போடுவதற்கு பதிலாக இன்னொரு அட்டகாசமான ஐடியாவும் இருக்கிறது. குக்கரை மூடுவதற்கு முன்பு தண்ணீரில் ஒரு ஸ்பூன் சமையல் எண்ணெயை ஊற்றி விடுங்கள். எண்ணெய் சேர்க்கும் போது மேற்பரப்பில் ஏற்படும் அழுத்தம் குறைந்து உள்ளே நுரை உருவாவது கட்டுப்படுத்தப்படும். அதேபோல, பருப்பு மூழ்கும் அளவிற்கு மட்டும் தண்ணீரை அளவாக வைப்பது மிகவும் புத்திசாலித்தனமான ஒரு விஷயம். அளவுக்கு அதிகமாக தண்ணீரை ஊற்றினால் அது கட்டாயம் விசில் வழியாக வெளியேறி உங்களின் கிச்சனை வீணாக்கிவிடும்.

ரப்பர் பராமரிப்பு!

குக்கர் மூடியில் இருக்கும் கேஸ்கட் எனப்படும் ரப்பர் தளர்ந்து போய் பழையதாக இருந்தாலும் தண்ணீர் ஈஸியாக வெளியே கசிய ஆரம்பிக்கும். அதனால் ஆறு மாதத்திற்கு ஒருமுறை அந்த ரப்பரை மாற்றுவது அவசியம். இப்போதெல்லாம் பொங்காமல் இருக்க பிரத்யேகமாக வடிவமைக்கப்பட்ட புதிய மாடல் குக்கர்கள் மார்க்கெட்டில் நிறைய கிடைக்கின்றன. 

பழைய குக்கருக்கு விடை கொடுத்துவிட்டு புதியதை வாங்கலாம். அதேபோல குக்கர் இல்லாமல் திறந்த பாத்திரத்தில் ஏதேனும் சமைக்கும் போது பொங்குவதை தடுக்க, அந்த பாத்திரத்தின் வாய்ப்பகுதியில் ஒரு மரக்கரண்டியை குறுக்காக வைத்து விட்டால் போதும். பொங்குவது உடனே அடங்கிவிடும்.

பிரஷர் குக்கர் நமது சமையல் நேரத்தை பெருமளவு மிச்சப்படுத்துகிறது என்பதில் எந்த ஒரு மாற்றுக்கருத்தும் இல்லை. ஆனால் அதை சரியான முறையில் கவனமாக கையாளவில்லை என்றால் குடும்பங்களில் பெரிய விபத்துகள் நடக்க அதிக வாய்ப்புள்ளது என பல ஆய்வுகள் கூட எச்சரிக்கின்றன.