டாய்லெட் பேஸை சுத்தம் செய்ய இந்த ஒரு பொருள் போதும்… கிருமிகள் உடனே அழியும்!

Toilet cleaning tips: நமது வீடுகளில் கழிவறையை சுத்தம் செய்வது என்பது வாராந்திர வேலைகளில் மிக முக்கியமான ஒன்றாகும். நாம் ஒவ்வொரு முறையும் டாய்லெட் பவுல் மற்றும் சீட் போன்ற இடங்களை மிகவும் கவனமாக தேய்த்து சுத்தம் செய்வோம். அதை முடித்தவுடன் மொத்த வேலையும் முடிந்துவிட்டது என்று நிம்மதியாக வந்துவிடுவோம். ஆனால் பெரும்பாலும் நாம் அனைவரும் கோட்டை விடும் ஒரு இடம் டாய்லெட்டின் அடிப்பகுதி. 

தரையும் பீங்கானும் சந்திக்கும் அந்த சிறிய இடைவெளியில்தான் நமது கழிவறையின் பெரும்பாலான அழுக்குகளும் கிருமிகளும் தஞ்சம் அடைகின்றன. இந்த மறைமுகமான கிருமிகளை அழிக்க விலையுயர்ந்த ரசாயனங்கள் எதுவும் தேவையில்லை. நமது சமையலறையில் எளிதாக கிடைக்கும் வெள்ளை வினிகர் ஒன்றே போதுமானது. 

கண்ணுக்குத் தெரியாத ஆபத்துகள்!

பொதுவாக கழிவறையில் கெட்ட வாடை வரத் தொடங்கிய பிறகுதான் நாம் அதை சுத்தம் செய்ய முற்படுவோம். ஆனால் அதற்கு பல வாரங்களுக்கு முன்பே அங்குள்ள சிறிய தரை இடுக்குகளில் கிருமிகள் சத்தமில்லாமல் வளரத் தொடங்கிவிடும். ஜர்னல் ஆஃப் அப்ளைடு மைக்ரோபயாலஜி (Journal of Applied Microbiology) என்ற புகழ்பெற்ற மருத்துவ ஆய்விதழ் இது குறித்து ஒரு அதிர்ச்சியான தகவலை வெளியிட்டுள்ளது. 

டாய்லெட் பரப்புகளில் இருக்கும் ஆபத்தான மலக்கிருமிகள், கழிவறையின் தரை, கை கழுவும் குழாய்கள் மற்றும் சுவர்களுக்கும் மிக எளிதாக பரவிவிடுகின்றன. நமது சுத்தம் செய்யும் பிரஷ்கள் மற்றும் ஈரப்பதம் மூலமாகவே இந்த கண்ணுக்குத் தெரியாத கிருமிகள் இடம் பெயர்கின்றன என்பதை நாம் கட்டாயம் உணர்ந்து கொள்ள வேண்டும்.

வெள்ளை வினிகர்!

இந்த பெரிய பிரச்னைக்கு வெள்ளை வினிகர் ஒரு அற்புதமான தீர்வைத் உடனடியாக தருகிறது. இதில் இயற்கையாகவே ஐந்து சதவீதம் அசிட்டிக் அமிலம் உள்ளது. விலை உயர்ந்த மருத்துவமனை தர கிருமிநாசினிகளுக்கு இணையாக இது சிறப்பாக செயல்படும் திறன் கொண்டது. டாய்லெட் பேஸ் மற்றும் அதனை சுற்றியுள்ள தரையில் வினிகரை நன்கு ஸ்ப்ரே செய்து, சுமார் பதினைந்து நிமிடங்கள் நன்றாக ஊற விட வேண்டும். 

அதன் பின் ஒரு சுத்தமான ஈரத்துணியால் துடைத்து எடுத்தால், பிடிவாதமான நாற்றம் மற்றும் கடினமான உப்புக்கறைகள் அனைத்தும் மாயமாக மறைந்துவிடும்.

சுத்தம் செய்வதில் நாம் செய்யும் தவறுகள்!

சுத்தம் செய்யும் பொருட்களை அடித்த உடனேயே துடைப்பதுதான் பெரும்பாலான மக்கள் செய்யும் மிகப்பெரிய தவறு. எந்த ஒரு கிருமிநாசினியும் தனது முழுமையான வேலையை செய்ய குறைந்தது பத்து நிமிடங்களாவது தேவைப்படும். அடித்த உடனே துடைத்தால் கிருமிகள் சாவதில்லை, அவை இடம் மட்டுமே மாறுகின்றன. 

அதேபோல மிகவும் ஆழமான மஞ்சள் கறைகளை நீக்க, இரவு முழுவதும் வினிகரை ஊற்றி வைத்துவிட்டு, மறுநாள் காலை சிறிது பேக்கிங் சோடா சேர்த்து தேய்த்தால் கழிவறை புத்தம்புதிதாக மாறும். ஃப்ளஷ் செய்யும் கைப்பிடிகளை நாம் அடிக்கடி தொடுவதால் அதையும் கிருமிநாசினி கொண்டு துடைக்க மறக்க வேண்டாம்.

கழிவறையை வாரத்திற்கு ஒரு முறையாவது முறையாக சுத்தம் செய்வது வீட்டின் முழுமையான சுகாதாரத்திற்கு மிகவும் அவசியமாகும். குறிப்பாக டாய்லெட் பிரஷை பயன்படுத்திய பின் கிருமிநாசினி அடித்து நன்றாக உலர வைத்து எடுப்பது பல நோய்களை அண்ட விடாமல் தடுக்கும். ஈரமாக அப்படியே மூடி வைப்பது கிருமிகளின் உற்பத்திக்கு வழிவகுக்கும்.