மீதமுள்ள டைல்ஸ் இருக்கா... பார்சல் பண்ணி குப்பையில் போடாதீங்க, இந்த 5 ஐடியா பாருங்க!

புதிதாக வீடு கட்டும்போதோ அல்லது வீட்டை மராமத்து செய்யும்போதோ நாம் எதிர்கொள்ளும் ஒரு பெரிய தலைவலி, வேலை முடிந்த பிறகு மிச்சமாகும் டைல்ஸ் கற்கள் தான். ஒன்று அல்லது இரண்டு பெட்டி கற்களை என்ன செய்வது என்று பலருக்கும் ஒரு பெரிய குழப்பம் இருக்கும். அவற்றை வீட்டின் மொட்டை மாடியிலோ அல்லது படிக்கட்டுக்கு அடியிலோ போட்டு வைப்போம். பல வருடங்கள் கழித்து அவை உடைந்து குப்பைக்குச் செல்லும். 

ஆனால், ஆயிரக்கணக்கில் பணம் கொடுத்து வாங்கிய அந்தப் பொருட்களை அப்படி வீணாக்கக் கூடாது. உங்கள் வீட்டில் தூசு படிந்து கிடக்கும் அந்தப் பொருட்களைப் பயன்படுத்தி, வீட்டின் இன்டீரியரை எப்படிப் பல ஆயிரங்கள் செலவு செய்த ஒரு பிரீமியம் லுக் கொண்ட இடமாக மாற்றுவது என்பதற்கான 5 அட்டகாசமான ஐடியாக்களை இந்தப் பதிவில் பார்க்கலாம் வாங்க.

1. மீதமுள்ள டைல்ஸ் மூலம் பிரீமியம் டேபிள் டாப்!

உங்கள் வீட்டில் பழைய மரத்தாலான டீப்பாய் அல்லது டைனிங் டேபிள் இருந்தால் இந்த ஐடியா உங்களுக்கு ஒரு ஜாக்பாட். அதன் மேல் பகுதியில் கொஞ்சம் டைல்ஸ் ஒட்டும் பசையைத் தடவி, உங்களிடம் உள்ள கற்களை அழகாக ஒட்டி விடுங்கள். ஓரங்களில் வெள்ளைப் சிமெண்ட் வைத்துப் பூசிவிட்டால் போதும். இப்போது பார்த்தால், அது பல ஆயிரங்கள் கொடுத்து வாங்கிய ஒரு இத்தாலியன் மார்பிள் டேபிள் போலத் தகதகவென மின்னும். சூடான பாத்திரங்களை இதன் மீது வைத்தாலும் மரம் கெட்டுப்போகாது.

2. கிச்சன் ஹாட் பேட்ஸ்!

சமையலறையில் சூடான பாத்திரங்களை அப்படியே மேடையில் வைத்தால் கறை படிந்துவிடும். உங்களிடம் இருக்கும் மீதமுள்ள டைல்ஸ் துண்டுகளின் அடிப்புறத்தில் ஒரு தடிமனான அட்டையையோ அல்லது ஃபெல்ட் சீட் துணியையோ பசைபோட்டு ஒட்டி விடுங்கள். அவ்வளவு தான், உங்கள் கிச்சனுக்குத் தேவையான அட்டகாசமான ட்ரிவெட் ரெடி. இதை டைனிங் டேபிளில் வைத்துப் பாத்திரங்களை வைக்கும் போது, பார்ப்பதற்கே மிகவும் ரிச்சாக  இருக்கும்.

3. பிளான்டர் பாக்ஸ்!

வீட்டுத் தோட்டம் அல்லது பால்கனியில் செடி வளர்க்கும் ஆர்வம் இருந்தால் இந்த டிரிக்கை உடனே செய்யுங்கள். நான்கு சதுர வடிவக் கற்களை எடுத்து, அவற்றை ஒரு பெட்டி போலச் சதுர வடிவத்தில் நிறுத்தி, உட்புறமாக வலுவான ஒட்டும் பசையைக் கொண்டு ஒட்டி விட வேண்டும். இதோ, பளபளப்பான ஒரு நவீன பிளான்டர் பாக்ஸ் தயார். சாதாரண பிளாஸ்டிக் தொட்டிகளைப் போல இது வெயிலில் வெடித்துப் போகாது.

4. மொசைக் ஆர்ட்!

உங்களிடம் இருக்கும் கற்கள் எல்லாமே வெவ்வேறு நிறங்களில் உடைந்த துண்டுகளாக இருந்தால் கவலையே வேண்டாம். அவற்றை ஒரு சுத்தியலால் இன்னும் சிறு சிறு துண்டுகளாக உடைத்துக் கொள்ளுங்கள். உங்கள் வீட்டுச் சுவரிலோ அல்லது முகம் பார்க்கும் கண்ணாடியின் ஓரங்களிலோ இந்த வண்ணத் துண்டுகளைக் கலந்து ஒட்டி ஒரு மொசைக் ஆர்ட்  செய்ய முடியும். இந்த டிசைன் உங்கள் சுவருக்கு ஒரு பிரம்மாண்டமான லுக்கைக் கொடுக்கும்.

5. ஸ்டெப்பிங் ஸ்டோன்ஸ்!

உங்களுக்கு ஒரு சிறிய தோட்டம் அல்லது மண் தரை இருந்தால், மழைக் காலங்களில் சேறாகாமல் இருக்க இந்தக் கற்களைப் பயன்படுத்தலாம். தரையில் கொஞ்சம் செதுக்கிவிட்டு, இந்தக் கற்களை வரிசையாக ஒரு நடைபாதை போலப் பதித்து விடுங்கள். இது உங்கள் தோட்டத்திற்கு சிறப்பான தோற்றத்தை கொடுக்கும்.

இந்த எளிய அட்டகாசமான ஐந்து டிப்ஸ்களை உங்கள் வீடுகளிலும் இன்றே முயற்சி செய்து பாருங்கள்.