வாட்டர் பாட்டில் கழுவாமலே பயன்படுத்துறீங்களா? போச்சு! அவ்வளவுதான்!

இப்போது நாம் எங்கு சென்றாலும் தண்ணீர் குடிப்பதற்கான வாட்டர் பாட்டில்களை கையோடு எடுத்துச் செல்வது அனைவரிடமும் மிக முக்கியமான ஒரு பழக்கமாக மாறிவிட்டது. உடலை எப்போதும் நீரேற்றமாக வைத்துக்கொள்ள இது பெரிதும் உதவுகிறது. ஆனால் நாம் தினமும் பயன்படுத்தும் வாட்டர் பாட்டில் உள்ளே ஒருவிதமான கெட்ட வாசனை வீசுவதை பலரும் கவனித்திருக்க வாய்ப்புள்ளது. அந்த மோசமான வாசனையை விரட்ட சில சுலபமான வழிகளை இப்போது பார்க்கலாம்.

கிருமிகளின் கூடாரமாகும் தண்ணீர் பாட்டில்கள்!

பலரும் பிளாஸ்டிக் அல்லது எவர்சில்வர் பாட்டில்களில் தொடர்ந்து மீண்டும் மீண்டும் தண்ணீரை நிரப்பி பயன்படுத்துவார்கள். ஆனால் அதனை தினமும் முறையாகக் கழுவும் பழக்கம் பலரிடம் இருப்பதில்லை. குடித்த பிறகு நமது எச்சில் வழியாக பல நுண்ணுயிரிகள் உள்ளே செல்ல வாய்ப்புள்ளது. 

குறிப்பாக இனிப்பு பானங்கள் மற்றும் புரோட்டீன் ஷேக் குடித்த பிறகு அதை சரியாக சுத்தம் செய்யாவிட்டால் நிலைமை மிகவும் மோசமாகிவிடும். இதனால் உள்ளே இருக்கும் ஈரப்பதம் காரணமாக பாக்டீரியா மற்றும் பூஞ்சை போன்ற நுண்ணுயிரிகள் மிக வேகமாக வளரத் தொடங்கும். இதுவே நாளடைவில் ஒருவிதமான துர்நாற்றத்தை உருவாக்குவதோடு மட்டுமில்லாமல் நமது ஒட்டுமொத்த உடல் ஆரோக்கியத்தையும் கடுமையாக பாதிக்கும்.

சமையலறை பொருட்களே சிறந்த தீர்வு! 

இந்த கெட்ட வாசனையை ஒழிக்க கடைகளில் விற்கும் விலையுயர்ந்த ரசாயனங்கள் நமக்குத் தேவையில்லை. உங்கள் சமையலறையில் இருக்கும் பேக்கிங் சோடா சிறிதளவு எடுத்து உள்ளே போட்டு சிறிது வெந்நீர் ஊற்றி நன்றாகக் குலுக்க வேண்டும். சுமார் இருபது நிமிடங்கள் கழித்து பிரஷ் கொண்டு தேய்த்து கழுவினால் நாற்றம் முற்றிலும் நீங்கிவிடும். அதேபோல எலுமிச்சை சாறு, கல் உப்பு கலவையும் கிருமிகளை அழித்து நல்ல இயற்கை நறுமணத்தைத் தரும்.

மிகவும் பழைய பிடிவாதமான கறைகள் மற்றும் வாசனையை நீக்க வெள்ளை வினிகர் அல்லது ஆப்பிள் சைடர் வினிகர் மிகச்சிறந்த ஒரு இயற்கை தீர்வாக செயல்படுகிறது. வினிகர் கலந்த வெதுவெதுப்பான நீரில் பாத்திரத்தை அரை மணி நேரம் நன்றாக ஊறவைக்க வேண்டும். அதன்பின்னர் சுத்தமான தண்ணீரில் இரண்டு மூன்று முறை அலசினால் அதில் உள்ள கண்ணுக்குத் தெரியாத கிருமிகள் கூட முழுவதுமாக அழிந்து சுத்தமாகிவிடும்.

மூடி மற்றும் விளிம்புகளில் கவனம் தேவை! 

பாத்திரத்தின் உள்பகுதியை மட்டும் கழுவினால் மட்டும் போதாது. அதன் மூடி மற்றும் விளிம்பு பகுதிகளில் தான் அதிகப்படியான அழுக்குகள் மற்றும் கிருமிகள் எப்போதுமே தங்கியிருக்கும். அங்குள்ள சிலிகான் ரப்பர் வளையங்களை தனியாகக் கழற்றி மிதமான சோப்பு நீரில் நன்றாகத் தேய்த்துக் கழுவ வேண்டும். மூடியின் இண்டு இடுக்குகளில் இருக்கும் பாசிகளை அகற்ற சிறிய பிரஷ்களைப் பயன்படுத்துவது மிகவும் அவசியமான ஒன்றாகும். அப்போதுதான் முழுமையான சுத்தம் என்பது நூறு சதவீதம் சாத்தியமாகும்.

சரியான உலர வைக்கும் முறை! 

பாத்திரத்தை நன்றாகக் கழுவியவுடன் அப்படியே மூடியைப் போட்டு உடனே மூடி வைத்துவிடக் கூடாது. உள்ளே இருக்கும் ஈரப்பதம் முழுமையாகக் காயும் வரை அதனைத் தலைகீழாகவோ அல்லது சற்று சாய்வாகவோ திறந்து வைத்திருக்க வேண்டும். மீண்டும் சிறிதளவு ஈரப்பதம் இருந்தாலும் அது கிருமிகள் வளர்வதற்கு ஒரு நல்ல சூழலை உடனே ஏற்படுத்திக் கொடுத்துவிடும். எனவே வெளிப்புறக் காற்று உள்ளே புகும் படி நன்றாக உலர வைப்பது என்பது பாத்திரத்தைக் கழுவுவதை விட மிக முக்கியமான ஒன்றாகும்.

எல்லாவற்றிற்கும் மேலாக கண்ணாடி அல்லது தரமான ஸ்டெயின்லெஸ் ஸ்டீல் பாட்டில்களைப் பயன்படுத்துவது உடலின் ஆரோக்கியத்திற்கு மிகவும் நல்லது. பிளாஸ்டிக் பொருட்களைப் பயன்படுத்தினால் அவற்றில் கீறல்கள் விழும்போது குறிப்பிட்ட கால இடைவெளியில் கட்டாயம் மாற்றிவிட வேண்டும். 

தினமும் ஒருமுறையாவது வெந்நீர் மற்றும் லிக்விட் சோப் கொண்டு சுத்தப்படுத்துவது சிறந்த பலனைத் தரும்.